اسلام آباد: وفاقی وزیر مواصلات مراد سعید نے کہا ہے کہ بلاول بھٹو کی پریس کانفرنس سے تحریک انصاف کا دعویٰ ثابت ہو گیا ہے، حادثاتی چیئرمین یاد رکھیں، وزیر اعظم مستعفی نہیں ہوں گے۔
تفصیلات کے مطابق بلاول بھٹو کی آج کی پریس کانفرنس کا جواب دیتے ہوئے وفاقی وزیر مراد سعید نے کہا ہے کہ ہم روز اوّل سے کہتے آ رہے ہیں ابن زرداری ابو بچاؤ مہم چلا رہے ہیں، ثابت ہو گیا کہ حادثاتی چیئرمین کی سیاست اس نکتے پر کھڑی ہے کہ ابو کو سہولتیں دلواؤ۔
مراد سعید نے کہا کہ بلاول کو مولانا سے جو عقیدت ہے اس کے پیچھے بھی ابو کی جان چھڑانے کا ہدف کار فرما ہے، لیکن میں کہتا ہوں کہ جس کی وہ امید لگائے بیٹھے ہیں، حادثاتی چیئرمین کو مولانا سے ایسا کچھ نہیں ملے گا۔
یہ بھی پڑھیں: وزیر اعظم جلد استعفیٰ دینے والے ہیں: بلاول بھٹو کا دعویٰ
وفاقی وزیر کا کہنا تھا ابو کی لوٹ مار بچانے کے لیے حادثاتی چیئرمین نظریات کو بھی خیر باد کہہ چکے ہیں، سندھ کارڈ کھیل کر بلاول کے بڑوں کو فائدہ پہنچانا ان کی کوئی خوش فہمی ہو سکتی ہے، لیکن سچ یہ ہے کہ کرپشن اور چور بازری کی سیاست سندھ میں آخری سانسیں لے رہی ہے، سندھ اب خود کو چوروں کے اس قبیلے سے لا تعلق کر رہا ہے۔
مراد سعید نے کہا کہ حادثاتی چیئرمین کو یاد رکھنا چاہیے کہ وزیر اعظم مستعفی نہیں ہوں گے، آپ کے ابو سے لوٹ مار کا مال بھی نکلوائیں گے۔
واضح رہے کہ آج اسلام آباد میں پریس کانفرنس کرتے ہوئے چیئرمین پاکستان پیپلز پارٹی بلاول بھٹو نے دعویٰ کیا کہ وزیر اعظم عمران خان جلد استعفیٰ دینے والے ہیں۔
