کولمبو: سری لنکن پولیس نے کرکٹ ٹیم کے فاسٹ باؤلر نووان کلاسیکرا کو 28 سالہ شخص کو کار تلے کچل کر ہلاک کرنے پر گرفتار کرنے کے بعد ضمانت پر رہا کردیا۔
پولیس کے مطابق 34 سالہ نووان کلاسیکرا کی کار کولمبو سے 15 کلومیٹر دور A-1 ہائی وے پرمخالف سمت سے آنے والے موٹرسائیکل سوار سے جاٹکرائی جس کے نتیجے میں موٹرسائیکل سوار ہلاک ہوگیا۔
پولیس کا کہنا تھا کہ ‘انہیں معمول کی تفتیش کے سلسلے میں حراست میں لیا گیا تھا تاہم رہا کردیا گیا’۔
پولیس نے کہا کہ’موٹرسائیکل سوار زخموں کی تاب نہ لاتے ہوئے ہلاک ہوا تھا لیکن کوئی اور نقصان نہیں ہوا’۔
سری لنکا کی جانب سے 2005 میں نیوزی لینڈ کے خلاف بین الاقوامی کرکٹ میں ڈیبو کرنے والے کلاسیکرا نے 21 ٹیسٹ میچوں میں 48 وکٹیں حاصل کی ہیں تاہم ابھی تک ان کی جانب سے اس حادثے کے حوالے سے کوئی موقف سامنے نہیں آیا۔
کلاسیکرا نے رواں سال جون میں ایک روزہ اور ٹی ٹوئنٹی میں بھرپور توجہ دینے کی غرض سے ٹیسٹ کرکٹ سے کنارہ کشی کا اعلان کیا تھا۔
واضح رہے سری لنکا میں گزشتہ سال ٹریفک حادثات میں 2ہزار700 کے قریب افراد ہلاک ہوئے جن میں سے نصف موٹرسائیکل سواروں کی تھی۔
