ARYNews.tv | Urdu – Har Lamha Bakhabar

Tag: حادثہ

  • امریکا میں طیارہ گھر پر جا گرا

    امریکا میں طیارہ گھر پر جا گرا

    امریکا میں ایک چھوٹا طیارہ ایک گھر پر جا گرا، حادثے میں 9 ماہ کی بچی سمیت 3 افراد جاں بحق ہوگئے، قیمتی جانوں کے نقصان کے بعد حادثے کی تحقیقات وسیع پیمانے پر جاری ہیں۔

    امریکی میڈیا کے مطابق یہ واقعہ امریکی ریاست اوٹاہ میں پیش آیا جہاں ایک چھوٹا طیارہ ایک گھر کے بیک یارڈ میں کریش ہوگیا۔ طیارہ گرتے ہی مکان میں آگ بھڑک اٹھی۔

    ویسٹ جورڈن پولیس کے مطابق طیارے میں پائلٹ سمیت 6 افراد سوار تھے جن میں 3 بچے بھی شامل تھے۔ حادثے میں پائلٹ، جہاز میں سوار ایک خاتون اور 9 ماہ کے بچے کی ہلاکت کی تصدیق ہوگئی ہے۔

    گھر کی مالکہ حادثے کے وقت گھر میں موجود تھیں جو معمولی زخمی ہوئیں، ان کے علاوہ 3 مزید افراد بھی زخمی ہوئے، جن میں سے ایک 12 سالہ بچے کو معمولی طبی امداد دے کر گھر بھیج دیا گیا، ایک خاتون کی حالت نازک بتائی جارہی ہے۔

    حادثے کے بعد جائے حادثہ پر متعدد میڈیکل ہیلی کاپٹرز، آگ بجھانے والی گاڑیاں اور ایمبولینسز پہنچ گئیں جنہوں نے فوری طور پر زخمیوں کو اسپتال منتقل کیا۔

    فی الحال اس کا تعین نہیں ہوسکا کہ طیارہ تکنیکی خرابی کی وجہ سے کریش ہوا یا پائلٹ کی غفلت کے باعث حادثہ پیش آیا۔

    فیڈرل ایوی ایشن ایڈمنسٹریشن کا کہنا ہے کہ طیارے نے ساؤتھ ویلی ریجنل ایئرپورٹ سے اڑان بھری اور صرف 2 میل کی اڑان کے بعد ہی اس کے ساتھ حادثہ پیش آگیا، حادثے کی مزید تحقیقات جاری ہیں۔

  • پی آئی اے طیارہ حادثے کی تحقیقات میں اہم پیش رفت

    پی آئی اے طیارہ حادثے کی تحقیقات میں اہم پیش رفت

    کراچی: شہر قائد میں ایئرپورٹ کے قریب آبادی پر گر کر تباہ ہونے والے پی آئی اے طیارے کی تحقیقات میں اہم پیش رفت سامنے آئی ہے۔

    تفصیلات کے مطابق ائیرکرافٹ ایکسیڈنٹ اینڈ انویسٹی گیشن بورڈ نے ائیرپورٹ رن وے کا دورہ کیا، تحقیقاتی ٹیم نے رن وے پر لگے کیمرے سے لینڈنگ کے مناظر دیکھے۔

    ذرائع کا کہنا ہے کہ فوٹیجز میں دیکھاگیا کہ کپتان نے طیارے کے گیئر کو ڈاؤن نہیں کیا،رن وے ایل25 پر طیارے کے انجن کے رگڑ کے نشانات ملے،سی اے اے کے ایڈیشنل ڈائریکٹر نے کیمروں کی ریکارڈنگ ٹیم کے حوالے کی۔

    کیمروں کی ریکارڈنگ میں دیکھا جاسکتا ہے کہ طیارے کا پہلا انجن اور پھر دوسرا انجن زمین پر ٹکرایا،بعد میں دونوں انجن زمین پر رگڑتے ہوئے طیارہ اوپر کی جانب اٹھا،طیارہ پھرگو راؤنڈ لینےگا،طیارہ 13منٹ فضامیں رہا اس کے بعدگر کرتباہ ہوگیا۔

    دوسری جانب پی آئی اے کی خصوصی ٹیمیں جائے حادثہ پر موجود ہیں، طیارے کے وائس ریکارڈر اور دیگر چیزوں کی تلاش جاری ہے، ٹیمیں تمام چیزوں کا جائزہ لے رہی ہیں۔

    یاد رہے کہ 22 مئی کو لاہور سے کراچی آنے والا پی آئی اے کا طیارہ لینڈنگ کے دوران ایئرپورٹ کے قریب آبادی پر گر کر تباہ ہوگیا تھا۔

  • پل میں شگاف پڑنے سے ہولناک حادثہ، ویڈیو وائرل

    پل میں شگاف پڑنے سے ہولناک حادثہ، ویڈیو وائرل

    روس میں ایک پل پر گہرا شگاف پڑ گیا جس کے بعد پیچھے آتی کار تیز رفتاری سے شگاف میں جا گری، خوش قسمتی سے خاتون ڈرائیور حادثے میں محفوظ رہیں۔

    یہ ہولناک واقعہ روس میں گزشتہ ماہ پیش آیا تھا جس کی ویڈیو اب سوشل میڈیا پر گردش کر رہی ہے، حادثے کی ویڈیو اسی گاڑی کے ڈیش کیم میں ریکارڈ ہوگئی۔

    ویڈیو میں دیکھا جاسکتا ہے کہ پل پر ایک واضح دراڑ موجود ہے جس کے اوپر سے ایک بھاری ٹرک گزرا، ٹرک کے گزرتے ہی پل اس مقام سے بیٹھ گیا۔

    شگاف پڑتے ہی ویڈیو میں پیچھے آتی گاڑی کے ڈرائیور کو چلاتے ہوئے سنا جاسکتا ہے، بظاہر ڈرائیور گاڑی کو روکنے کی کوشش کرتا ہے لیکن ناکام رہتا ہے اور گاڑی تیز رفتاری سے شگاف میں جا گرتی ہے۔

    بعد ازاں ایک اور ویڈیو میں ریسکیو اہلکار شگاف میں اتر کر اس جائزہ کا لیتے دکھائی دیتے ہیں۔ حادثے میں گاڑی کی خاتون ڈرائیور خوش قسمتی سے محفوظ رہیں جنہیں فوری طور پر گاڑی سے باہر نکال لیا گیا۔

  • بھارت میں عجیب و غریب واقعے نے پولیس کو چکرا دیا

    بھارت میں عجیب و غریب واقعے نے پولیس کو چکرا دیا

    نئی دہلی: بھارت میں ایک شخص کی لاش کو ایکسیڈنٹ کا شکار سمجھ کر اسپتال لایا گیا تاہم قریبی عمارت کی سی سی ٹی وی فوٹیج سے علم ہوا کہ مذکورہ شخص کو قتل کیا گیا ہے۔

    یہ واقعہ بھارتی ریاست راجھستان میں پیش آیا جہاں ایک شخص کو زخمی حالت میں حادثے کا شکار سمجھ کر جے پور اسپتال لایا گیا، ڈاکٹرز نے اسے مردہ قرار دیا۔ ابتدائی طور پر خیال کیا گیا کہ مذکورہ شخص روڈ ایکسیڈنٹ کا شکار ہوا ہے۔

    پولیس جائے وقوع پر پہنچی تو وہاں موجود انسٹی ٹیوٹ کے سی سی ٹی وی کیمرے کی فوٹیج چیک کی گئی، فوٹیج سے علم ہوا کہ مذکورہ شخص حادثے کا شکار نہیں ہوا بلکہ اسے قتل کیا گیا ہے۔

    سی سی ٹی وی فوٹیج کے مطابق جائے وقوع پر 3 افراد نے مذکورہ شخص پر حملہ کیا اور اس کے سر پر کچھ مارا جس سے وہ شخص زمین پر گر گیا۔

    اس شخص کے ساتھ 2 افراد اور موجود تھے تاہم وہ حملہ آوروں کو دیکھ کر فرار ہوگئے، بعد ازاں حملہ آور بھی بھاگ نکلے۔

    معاملے کی سنگینی کو دیکھتے ہوئے ایف ایس ایل کے اہلکاروں کو بھی وہاں طلب کیا گیا، پولیس نے حملہ آوروں اور مقتول کے ساتھیوں کی تلاش شروع کردی ہے۔ مقتول کے پاس سے کوئی شناختی دستاویز برآمد نہیں ہوئی۔

  • خطرناک حادثہ: موٹرسائیکل کی ٹنکی پھٹنے سے آگ بھڑک اٹھی، کئی افراد زخمی

    خطرناک حادثہ: موٹرسائیکل کی ٹنکی پھٹنے سے آگ بھڑک اٹھی، کئی افراد زخمی

    راولپنڈی: پنجاب میں موٹرسائیکل کی ٹنکی پھٹنے کا خطرناک حادثہ پیش آیا جس کے نتیجے میں 5 افراد زخمی ہوگئے۔

    تفصیلات کے مطابق یہ افسوس ناک حادثہ راولپنڈی کے صدر بڑے بازار میں پیش آیا۔ موٹر سائیکل کی ٹنکی پھٹنے سے آگ لگ گئی جس نے اطراف میں موجود شہریوں کو اپنے لپیٹ میں لے لیا۔

    ریسکیو ذرائع کا کہنا ہے کہ واقعے میں 5 افراد زخمی ہوئے جنہیں قریبی اسپتال منتقل کردیا گیا ہے۔

    متعلقہ اداروں نے واقعے سے متعلق تحقیقات کا آغاز کردیا۔

    پولیس کا کہنا ہے بائیک کی ٹنکی پھٹنے کی وجہ جاننے کی کوشش کی جارہی ہے۔ اہلکاروں نے جائے وقوعہ سے شواہد اکھٹے کرلیے جبکہ فائر فائٹرز کی ٹیموں نے آگ پر قابو پایا۔ اس دوران شہریوں نے بھی اپنی مدد آپ کے تحت آگ بجھانے کی کوشش کی۔ زخمیوں کو طبی امداد فراہم کی جارہی ہے۔

  • صوابی میں مکان کی چھت گرگئی، 4 افراد جاں بحق

    صوابی میں مکان کی چھت گرگئی، 4 افراد جاں بحق

    صوابی: خیبرپختونخوا میں مکان کی چھت گرگئی جس کی زد میں آکر 4 افراد ہلاک ہوگئے۔

    تفصیلات کے مطابق یہ افسوس ناک واقعہ کے پی کے کے شہر صوابی میں پیش آیا۔ ریسکیو ذرائع کا کہنا ہے کہ حادثے میں جاں بحق افراد کی تعداد چار ہے جبکہ کچھ زخمی بھی ہیں۔

    حادثے میں 3 افراد زخمی ہیں جنہیں اسپتال منتقل کردیا گیا ہے۔

    خیال رہے کہ رواں سال فروری میں خیرپختونخوا کے شہر چارسدہ میں مکان کی چھت گری تھی جس کے نتیجے میں 3 بچے جاں بحق ہوئے تھے۔ جبکہ اس سے قبل بھی متعدد بار ایسے ہولناک حادثے پیش آچکے ہیں۔

    چارسدہ، مکان کی چھت گر گئی، 3 بچے جاں بحق

    واضح رہے کہ گزشتہ ماہ صوبہ بلوچستان کے علاقے چمن میں مکان کی چھت گرنے سے 6 افراد جاں بحق اور 2 زخمی ہوگئے تھے۔ 7 جنوری کو کوہاٹ کے علاقے گھمکول میں مکان کی چھت گرنے سے خاتون سمیت 2 افراد جاں بحق ہوگئے تھے۔ مذکورہ کچے مکان کی چھت کمزور ہونے کے باعث گری تھی۔

  • سعودی محکمہ ٹریفک نے ڈرائیورز کو خبردار کردیا

    سعودی محکمہ ٹریفک نے ڈرائیورز کو خبردار کردیا

    ریاض: سعودی عرب میں محکمہ ٹریفک نے مقامی اور غیرملکی ڈرائیورز کو خبردار کیا ہے کہ سڑک پر لین کے مطابق گاڑیاں چلائیں بصورت دیگر سخت جرمانہ ہوگا۔

    عرب میڈیا کی رپورٹ کے مطابق سماجی رابطے کی ویب سائٹ ٹوئٹر پر سعودی محکمہ ٹریفک نے شہریوں کو متنبہ کیا کہ سڑک لین کی خلاف ورزی پر 300 سے 500 ریال تک جرمانہ ہوسکتا ہے۔

    مملکت میں محکمہ ٹریفک کی جانب سے ’محبان ٹریفک‘ کے نام سے آگہی مہم چلائی جا رہی ہے، جس کا مقصد سعودی عرب میں ٹریفک حادثات پر قابو پانا اور پابندیوں پر سختی سے عمل کروانا ہے۔

    محکمہ کا کہنا ہے کہ سڑک لین کا مقصد گاڑیوں کی رفتار سمیت چھوٹی اور بڑی گاڑیوں کو ان کے مقررہ راستوں پر گامزن رکھنا ہوتا ہے، بعض اوقات لین کی خلاف ورزی کی جاتی ہے جو بڑے حادثے کا سبب بھی بنتی ہے۔

    سعودی عرب میں خوفناک ٹریفک حادثہ: خواتین سمیت11غیرملکی جاں بحق

    یاد رہے کہ 23 فروری کو سعودی عرب میں ٹریفک حادثے میں 3 خواتین سمیت 11افراد جاں بحق ہوئے تھے جن میں سے صرف ایک کا تعلق سعودی عرب سے تھا باقی تمام افراد غیر قانونی تآرکین وطن تھے۔

  • سکھر: مسافر کوچ ٹرین کی زد میں آگئی، 19 افراد جاں بحق

    سکھر: مسافر کوچ ٹرین کی زد میں آگئی، 19 افراد جاں بحق

    سکھر: صوبہ سندھ میں روہڑی ریلوے پھاٹک پر مسافر کوچ ٹرین کی زد میں آگئی جس کے نتیجے میں 19 افراد جاں بحق جبکہ درجنوں زخمی ہوگئے۔

    تفصیلات کے مطابق روہڑی ریلوے پھاٹک پر افسوس ناک واقعہ پیش آیا ہے، مسافر کوچ ٹرین کی زد میں آگئی، حادثے میں 19 افراد جان کی بازی ہار گئے جبکہ 30 سے زائد افراد زخمی ہوگئے۔

    پولیس حکام نے بتایا کہ حادثے میں زخمی ہونے والے افراد کو اسپتال منتقل کیا جا رہا ہے جہاں انہیں طبی امداد دی جائے گی۔

    خیال رہے کہ گزشتہ ماہ 26 جنوری کو سندھ کے شہر خیرپور میں واری گوٹھ کے مقام پر برنس ایکسپریس کی 6 بوگیاں ٹریک سے اترگئی تھیں۔ ٹرین کے پٹری سے اترنے کے حادثے کے باعث 500 میٹر تک ٹریک کو نقصان پہنچا تھا۔

    لیاقت پور: تیزگام کی 3 بوگیوں میں آگ لگ گئی، 74 افراد جاں بحق

    یاد رہے کہ گزشتہ سال اکتوبر میں صوبہ پنجاب کے شہر لیاقت پور کے قریب تیز گام ٹرین کی 3 بوگیوں میں آگ لگ گئی تھی جس کے نتیجے میں 74 افراد جاں بحق ہوگئے تھے

  • اٹک: ڈمپر اور وین میں خوف ناک ٹکر، 6 جاں بحق، 11 شدید زخمی

    اٹک: ڈمپر اور وین میں خوف ناک ٹکر، 6 جاں بحق، 11 شدید زخمی

    اٹک: فتح جنگ روڈ قطبال ٹول پلازہ کے قریب ڈمپر اور وین میں خوف ناک ٹکر کے نتیجے میں 6 افراد جاں بحق جب کہ 11 شدید زخمی ہو گئے ہیں۔

    تفصیلات کے مطابق قطبال ٹول پلازہ کے قریب حادثہ ڈمپر اور ہائی ایس کے درمیان تصادم کی صورت میں پیش آیا، ڈمپر ڈرائیور کی غفلت اور غلط کراسنگ کی وجہ سے ڈمپر سامنے سے آنے والی ہائی ایس پر چڑھ دوڑا، جس سے 6 افراد جاں بحق اور 11 زخمی ہو گئے۔

    اطلاع ملنے پر ریسکیو ٹیم فوراً موقع پر پہنچ گئی، طبی امداد دینے کے بعد زخمیوں اور لاشوں کو تحصیل اسپتال فتح جنگ منتقل کر دیا گیا، حادثے کے بعد ڈمپر ڈرائیور موقع سے فرار ہو گیا، جاں بحق اور زخمیوں کا تعلق پنڈی گھیب سے ہے، ہائی ایس بھی راولپنڈی سے پنڈی گھیب جا رہی تھی۔

    جھل مگسی میں باراتیوں کی گاڑی کو حادثہ، 16 افراد جاں بحق

    یاد رہے کہ گزشتہ روز بلوچستان کے ضلع جھل مگسی میں باراتیوں سے بھری بس کھائی میں جا گری تھی جس کے نتیجے میں خواتین اور بچوں سمیت 16 افراد جاں بحق اور 30 زخمی ہو گئے تھے، جاں بحق افراد میں دولھے کے 2 بھائی بھی شامل تھے۔ لیویز ذرایع کے مطابق باراتیوں کی گاڑی کو حادثہ تیز رفتاری کے باعث پیش آیا تھا۔

    31 جنوری کو گوجر خان جی ٹی روڈ پر ٹریفک حادثے میں 4 افراد جاں بحق ہو گئے تھے، جن میں 3 سگے بھائی بھی شامل تھے۔ تیز رفتار کار سڑک کنارے کھڑے ٹرک سے ٹکرانے حادثہ پیش آیا تھا۔

  • سرگودھا: بھیرہ موٹر وے پر ہونے والا حادثہ معمہ بن گیا

    سرگودھا: بھیرہ موٹر وے پر ہونے والا حادثہ معمہ بن گیا

    سرگودھا: بھیرہ موٹر وے پر ہونے والا حادثہ معمہ بن گیا ہے، ٹائر پھٹا نہ سلنڈر، نہ ہی شارٹ سرکٹ ہوا، پھر وین میں آگ کیسے لگی؟ حادثے کی وجہ جاننے کی کوشش کی جا رہی ہے۔

    تفصیلات کے مطابق بھیرہ پولیس نے موٹر وے انسپکٹر مظہر عباس کی مدعیت میں واقعے کا مقدمہ درج کر لیا ہے، ایف آئی آر میں ڈرائیور محمد دیار کی غفلت، لاپرواہی اور تیز رفتاری کو وجہ قرار دے دیا گیا ہے۔ پولیس نے زخمی ڈرائیور کو اسپتال میں زیر حراست بھی لے لیا۔

    ایف آئی آر کے متن میں لکھا گیا ہے کہ فیصل آباد کے اڈا مالک، منیجر کے خلاف قواعد کی خلاف ورزی پر مقدمہ درج کیا گیا ہے، اڈا مالک اور منیجر قواعد کی خلاف ورزی نہ کرتے تو حادثہ نہ ہوتا۔

    وین میں آتش زدگی سے متاثر ہونے والے مسافر سڑک کنارے لیٹ گئے ہیں

    سرگودھا موٹروے پر وین میں آتشزدگی، 11 افراد جاں بحق

    یاد رہے کہ گزشتہ روز وفاقی دارالحکومت اسلام آباد سے لاہور جانے والی وین میں آگ لگنے سے 11 افراد جاں بحق جب کہ متعدد زخمی ہو گئے تھے، وین میں آگ اچانک بھڑکی تھی، جس کی زد میں آنے والے مسافر موت کا شکار ہوئے، حادثے میں زخمی ہونے والے افراد کو طبی امداد کے لیے اسپتال منتقل کیا گیا جن میں سے کچھ کی حالت تشویش ناک بتائی جاتی ہے۔

    ابتدائی طور پر یہ بات سامنے آئی تھی کہ وین میں آگ شارٹ سرکٹ کے باعث لگی تاہم تحقیقات کا سلسلہ جاری رہا، وزیر اعلیٰ پنجاب عثمان بزدار نے بھی حادثے کی رپورٹ طلب کر لی تھی۔