ARYNews.tv | Urdu – Har Lamha Bakhabar

Tag: حادثہ

  • سعودی عرب: آئل ریفائنری میں حادثہ، 2 ملازمین ہلاک، دو شدید زخمی

    سعودی عرب: آئل ریفائنری میں حادثہ، 2 ملازمین ہلاک، دو شدید زخمی

    ریاض: سعودی عرب میں آئل ریفائنری میں ہونے والے حادثے کے نتیجے میں دو ملازمین ہلاک اور دو شدید زخمی ہوگئے۔

    تفصیلات کے مطابق سعودی عرب کی سرکاری آئل کمپنی آرامکو کے ریفائنری پلانٹ کی سالانہ اوور ہالنگ کے دوران ہونے والے ایک حادثے میں دو ملازمین ہلاک اور دو زخمی ہوگئے۔

    غیر ملکی خبر رساں ادارے کا کہنا ہے کہ حادثے کے وقت پلانٹ بند تھا جس کے باعث زیادہ جانی نقصان نہیں ہوا، بعد ازاں ریسکیو عملے نے فوری کارروائی کرتے ہوئے نقصان پر قابو پانے کی کوشش کی۔

    ریسکیو اداروں نے امدادی کاموں کا آغاز کرتے ہوئے ہلاک اور زخمی ہونے والوں کو قریبی اسپتال منتقل کیا جہاں ایک زخمی کی حالت نازک بتائی جارہی ہے جبکہ دیگر ملازمین کو محفوظ مقام پر منتقل کردیا گیا ہے اور حالات قابو میں ہیں۔

    سعودی عرب، بس اورآئل ٹینکرمیں تصادم، 4 برطانوی معتمرین جاں بحق

    کمپنی کی انتظامیہ کی جانب سے جاری کردہ بیان میں کہا گیا کہ پلانٹ پر پہلے سے طے شیڈول کے تحت مینٹی ننس جاری تھی۔ ملازمین کی حفاظت پہلی ترجیح ہے۔ کمپنی انتظامیہ اور حکومت نے حادثے کی نوعیت کے متعلق کچھ نہیں بتایا۔

  • لاہور اور تربت میں مختلف حادثات، 3 افراد جاں بحق، کئی زخمی

    لاہور اور تربت میں مختلف حادثات، 3 افراد جاں بحق، کئی زخمی

    لاہور: پنجاب کے دارالحکومت لاہور اور بلوچستان کے شہر تربت میں مختلف حادثے کے باعث تین افراد جاں بحق اور متعدد زخمی ہوگئے۔

    تفصیلات کے مطابق لاہور میں مصطفی آباد کے علاقے میاں میر کالونی کے قریب ایک شخص ٹرین تلے آکر جاں بحق ہوگیا، 65 سالہ شخص ریلوے لان عبور کر رہا تھا کہ ٹرین کی زد میں آکر ہلاک ہوا۔

    پولیس کا کہنا ہے کہ متوفی کی شناخت نہیں ہو سکی، لاش کو ایدھی ایمبولینس کے ذریعے مردہ خانے منتقل کر دیا گیا ہے۔

    دوسری جانب بلوچستان کے شہر تربت سے مشرق کی جانب 90کلومیٹر دور ہوشاب کراس پر 2گاڑیوں میں تصادم کے نتیجے میں ایک شخص جاں بحق اور 4زخمی ہوگئے۔

    لیویز ذرائع کے مطابق بدھ کے روز تربت سے پنجگور جانے والی وین ہوشاپ کراس کے قریب ایرانی ڈیزل بردار گاڑی زمباد سے ٹکرانے کے نتیجے میں زمباد ڈرائیور رحمت اللہ موقع پر جاں بحق ہوگیا۔

    حادثے میں وین ڈرائیور امیر فداسوردو پنجگور اور اسداللہ زخمی ہوگئے جبکہ زمبادگاڑی پر سوار 2 افراد بھی زخمی ہوئے جنہیں فوری طور پر تربت اسپتال منتقل کردیا گیا جہاں مزید کارروائیاں جاری ہیں۔

    علاوہ ازیں قلات میں بھی ٹریفک حادثہ پیش آیا جس کے نتیجے میں ایک شخص جان کی بازی ہار گیا۔ پولیس کے مطابق قومی شاہراہ پر مزدہ ٹرک اور موٹر سائیکل کی ٹکر سے لطیف نامی شخص جاں بحق ہوا۔

    پو لیس نے فوری کارروائی کرکے ٹرک ڈرائیور کو گر فتار کرکے لاش کو اسپتال منتقل کر دیا جہاں ضروری کارروائی کے بعد لاش ورثاء کے حوا لے کر دی گئی۔

  • لاہور: ٹریکٹر ٹرالی کی موٹرسائیکل کو ٹکر،4 افراد جاں بحق

    لاہور: ٹریکٹر ٹرالی کی موٹرسائیکل کو ٹکر،4 افراد جاں بحق

    لاہور: صوبہ پنجاب کے دارالحکومت لاہور میں ٹریکٹر ٹرالی نے موٹرسائیکل کو کچل دیا، حادثے میں خاتون اور تین بچے جاں بحق ہوگئے۔

    تفصیلات کے صوبہ پنجاب کے شہر لاہور میں ٹریکٹر ٹرالی کی موٹرسائیکل کو ٹکرسے خاتون سمیت 4 افراد جان کی بازی ہارگئے۔ حادثے کے بعد ڈرائیور جائے وقوعہ سے فرار ہوگیا۔

    پولیس کے مطابق یہ افسوس ناک حادثہ گجرکالونی کے قریب اُس وقت پیش آیا جب تیز رفتار ٹریکٹرٹرالی ڈرائیور سے بےقابو ہو کر موٹرسائیکل سے جا ٹکرائی حادثے میں خاتون اور تین بچے جاں بحق ہوگئے۔

    پولیس حکام کا کہنا ہے کہ بائیک کمسن لڑکا چلا رہا تھا، پولیس نے ٹریکٹر ٹرالی کو تحویل میں لے لیا جبکہ ڈرائیور موقع سے فرار ہوگیا۔ پولیس نے قانونی کارروائی کے بعد لاشوں کو ورثا کے حوالے کردیا ہے۔

    یاد رہے کہ رواں سال مارچ میں کراچی کے علاقے لانڈھی داؤد چورنگی کے قریب ٹرالر کی ٹکر سے موٹرسائیکل پر سوار دو خواتین جاں بحق جبکہ ایک شخص زخمی ہوگیا تھا۔

    حادثے کے بعد پولیس نے موقع پر پہنچ کر لاشوں اور زخمی کو اسپتال منتقل کیا تھا۔ پولیس نے ٹرالر کو تحویل میں لے لیا تھا جبکہ ڈرائیور موقع سے فرار ہوگیا تھا۔

  • رحمان بابا ایکسپریس کو حادثہ، 10 مسافر زخمی

    رحمان بابا ایکسپریس کو حادثہ، 10 مسافر زخمی

    ٹوبہ ٹیک سنگھ: پشاور سے کراچی جانے والی رحمان بابا ایکسپریس کی 4 بوگیاں پٹری سے اترگئیں جس کے نتیجے میں 10 مسافر زخمی ہوگئے۔

    تفصیلات کے مطابق پشاور سے کراچی جانے والی رحمان بابا ایکسپریس کو ٹوبہ ٹیکس سنگھ ریلوے اسٹیشن کے قریب حادثہ پیش آیا جس کے نتیجے میں 10 مسافر زخمی ہوگئے۔

    ریسکیو حکام کے مطابق رحمان بابا ایکسپریس کی 4 بوگیاں پٹری سے اترگئیں، حادثے کے باعث ٹریک پر ٹرینوں کی آمدورفت معطل ہوگئی۔

    حادثے میں زخمی ہونے والے مسافروں کو ڈی ایچ کیو اسپتال منتقل کردیا گیا جہاں انہیں طبی امداد دی جا رہی ہے جبکہ ریلیف ٹرین اور انجن کو حادثے کی جگہ روانہ کردیا گیا۔

    ریلوے ذرائع کے مطابق ابتدائی تحقیقات میں پتہ چلا کہ حادثہ ڈرائیورصغٖیرعباس کی نااہلی کے باعث پیش آیا، صغیرعباس مال گاڑی کا ڈرائیور تھا، مسافرٹرین چلانے لگا۔

    ترجمان ریلوے کے مطابق اے سی پارلر مسافروں کو ریلیف ٹرین سے روانہ کردیا گیا جبکہ اکانومی کلاس مسافروں کو متبادل ٹرین سے روانہ کیا جائے گا۔

    صادق آباد ٹرین حادثہ، جاں بحق افراد کی تعداد 22 ہوگئی

    اس سے قبل رواں سال جولائی میں مسافر ٹرین اکبر ایکسپریس اور مال گاڑی میں تصادم کے نتیجے میں 22 افراد جاں بحق ہوگئے تھے جبکہ 84 افراد زخمی ہوئے تھے۔

    وزیر ریلوے شیخ رشید احمد نے اکبرایکسپریس حادثے کو انسانی غلطی قرار دیتے ہوئے جاں بحق افراد کے لواحقین کے لیے9،9 لاکھ جبکہ شدید زخمیوں کو پانچ لاکھ اور کم زخمی افراد کو 2،2 لاکھ روپے دینے کا اعلان کیا تھا۔

  • لاہورمیں مکان کی چھت گرنے سے 3 افراد زخمی

    لاہورمیں مکان کی چھت گرنے سے 3 افراد زخمی

    لاہور: صوبہ پنجاب کے دارالحکومت لاہور میں بوسیدہ مکان کی چھت گرنے سے 3 افراد زخمی ہوگئے۔

    تفصیلات کے مطابق لاہور میں رنگ محل کے علاقے شاہ عالم مارکیٹ میں بوسیدہ مکان کی چھت گرنے کے نتیجے میں 3 افراد ملبے تلے دب گئے۔

    حادثے کی اطلاع ملنے پر ریسکیو 1122 کی ٹیموں نے موقع پر پہنچ کر امدادی کاروائی کرتے ہوئے تینوں افراد کو زخمی حالت میں ملبے سے نکال کر فوری طور پر اسپتال منتقل کر دیا جہاں انہیں طبی امداد دی جا رہی ہے۔

    لاہور: مکان کی چھت گرنے سے چھ افراد جاں بحق

    اس سے قبل رواں سال اپریل میں لاہور کے علاقے محلہ اسلم خان بھاٹی گیٹ میں مکان کی چھت گرنے سے چھ افراد جاں بحق ہوگئے تھے، جبکہ چار افراد کو زخمی حالت میں ملبے سے زندہ نکال لیا گیا تھا ، ہلاک ہونے والوں میں خواتین اور بچے شامل تھے۔

    ہرنائی میں مکان کی چھت گرنے سے ماں اور5 بچے جاں بحق

    یاد رہے کہ 25 مارچ 2019 کو بارش کے باعث ہرنائی کے علاقے زندہ پیر میں گھرلینڈ سلائیڈنگ کی زد میں آگیا تھا، ماں اور 5 بچے جاں بحق جبکہ 2 سال کی بچی معجزانہ طور پر محفوظ رہی تھی۔

  • وزیرریلوے شیخ رشید کا اکبرایکسپرس حادثے پر اظہارافسوس

    وزیرریلوے شیخ رشید کا اکبرایکسپرس حادثے پر اظہارافسوس

    راولپنڈی: وفاقی وزیر ریلوے شیخ رشید احمد نے اکبرایکسپریس حادثے پرافسوس کا اظہار کرتے ہوئے کہا کہ انسانی غفلت ہوئی تو ذمہ داروں کو نہیں چھوڑیں گے۔

    تفصیلات کے مطابق وزیر ریلوے شیخ رشید احمد نے اکبر ایکسپریس حادثے کی تحقیقات کا حکم دیتے ہوئے حکام سے رپورٹ طلب کرلی۔

    شیخ رشید احمد نے کہا کہ انسانی غفلت ہوئی تو ذمہ داروں کو نہیں چھوڑیں گے، حادثے میں 8 سے 9 افراد کے جاں بحق ہونے کی اطلاع ہے۔

    وزیر ریلوے نے کہا کہ ٹرین حادثہ لوپ لائن پرہوا ہے، بتایا جا رہا ہے کہ حادثہ ساڑھے 4 بجے کے قریب ہوا ہے۔

    انہوں نے کہا کہ سگنل سسٹم میں بڑی کرپشن ہے، سگنل سسٹم 8 ارب سے شروع کیا گیا تھا 32 ارب پر پہنچ گیا، سگنل سسٹم تو لگ رہا ہے مگرٹریک بہت پرانا ہے۔

    صادق آباد : اکبرایکسپریس اور مال گاڑی میں تصادم، 10 افراد جاں بحق

    واضح رہے کہ ولہار پھاٹک کے قریب مسافر ٹرین اکبر ایکسپریس اور مال گاڑی میں تصادم ہوا جس کے نتیجے میں 10 افراد جاں بحق جبکہ 32 زخمی ہوئے۔

    اکبرایکسپریس حادثے کے بعد ٹرین آپریشن معطل ہے، بزنس ایکسپریس، کراچی ایکسپریس کو مختلف اسٹیشنزپرروک لیا گیا، گرین لائن، رحمان بابا ٹرین کا سفر بھی تعطل کا شکار ہے۔

  • میرپورماتھیلو کے قریب مسافر کوچ کو حادثہ، 2 افراد جاں بحق

    میرپورماتھیلو کے قریب مسافر کوچ کو حادثہ، 2 افراد جاں بحق

    گھوٹکی: صوبہ سندھ کے علاقے میر پور ماتھیلو کے قریب تیزرفتار مسافر کوچ الٹ گئی جس کے نتیجے میں 2 افراد جاں بحق جبکہ 10 زخمی ہوگئے۔

    تفصیلات کے مطابق گھوٹکی کے علاقے میرپور ماتھیلو کے قریب مسافر کوچ الٹ گئی، حادثے میں 2 افراد جان کی بازی ہار گئے اور 10 زخمی ہوگئے۔

    حادثے کی اطلاع ملتے ہی ریسکیو اہلکار جائے وقوعہ پر پہنچے اور زخمیوں کو طبی امداد کے لیے فوری ڈسٹرکٹ ہیڈ کوارٹر اسپتال منتقل کردیا گیا جہاں انہیں طبی امداد دی جا رہی ہے۔

    پولیس حکام کے مطابق مسافر کوچ صادق آباد سے سکھر جا رہی تھی کہ میرپورماتھیلو کے قریب حادثہ پیش آیا۔

    بدین میں مسافر کوچ کو حادثہ، 8 افراد جاں بحق

    یاد رہے کہ 19 اپریل کو دین میں مورجھر کے قریب کراچی سے آنے والی مسافر کوچ تیز رفتاری کے باعث الٹ گئی تھی، حادثے میں8 افراد جان کی بازی ہار گئے تھے۔

  • فیصل آباد: وین اور ٹرک میں تصادم، 8 افراد جاں بحق

    فیصل آباد: وین اور ٹرک میں تصادم، 8 افراد جاں بحق

    فیصل آباد: صوبہ پنجاب کے شہر فیصل آباد میں وین اور ٹرک کے درمیان تصادم کے نتیجے میں ایک ہی خاندان کے 8 افراد جاں بحق ہوگئے۔

    تفصیلات کے مطابق فیصل آباد میں ساہیانوالہ انٹرچینج موٹروے پروین اور ٹرک میں تصادم ہوا، حادثے میں 2 بچوں سمیت 8 افراد جان کی بازی ہار گئے جبکہ ایک شخص زخمی ہوگیا۔

    حادثے کی اطلاع ملتے ہی ریسکیو اہلکار موقع پر پہنچے اور لاشوں کو اسپتال منتقل کردیا۔ حادثے میں جاں بحق ہونے والوں میں 2 بچے اور 3 خواتین سمیت 8 افراد شامل ہیں۔

    پولیس حکام کا کہنا ہے کہ جاں بحق افراد کا تعلق ایک ہی خاندان سے ہے، وین میں سوار فیملی لاہورسے آ رہی تھی۔

    بھکرمیں ٹریلراورمسافروین کی ٹکر، 8 افراد جاں بحق

    اس سے قبل 30 جون کو صوبہ پنجاب کے شہر بھکر میں مسافر وین اور ٹریلر کے درمیان تصادم کے نتیجے میں ایک ہی خاندان کے 8 افراد جاں بحق جبکہ 7 افراد زخمی ہوگئے تھے۔

    بھکر میں ٹریفک حادثہ، 5 افراد جاں بحق

    یاد رہے کہ گزشتہ ماہ 8 جون کو بھکر میں ایم ایم روڈ پر فاضل اڈا کے قریب بس اور ٹریک میں تصادم ہوا تھا جس کے نتیجے میں 5 افراد جاں بحق جبکہ 18 زخمی ہوگئے تھے۔

  • شکارپور میں ٹریفک حادثہ، 6 افراد جاں بحق

    شکارپور میں ٹریفک حادثہ، 6 افراد جاں بحق

    شکارپور: صوبہ سندھ کے شہر شکارپور میں مسافرکوچ اور کار میں تصادم کے نتیجے میں 6 افراد جاں بحق جبکہ 15 سے زائد افراد زخمی ہوگئے۔

    تفصیلات کے مطابق شکارپور میں انڈس ہائی وے پر مسافر کوچ اور کار میں تصادم ہوا جس کے نتیجے میں کار میں سوار 3 خواتین سمیت 6 افراد جان کی بازی ہار گئے جبکہ 15 سے زائد افراد زخمی ہوگئے۔

    پولیس حکام کے مطابق لاشوں اور زخمیوں کو اسپتال منتقل کردیا گیا ہے، زخمیوں کو طبی امداد دی جا رہی ہے۔

    دوسری جانب چمن بائی پاس روڈ پر تیز رفتار آئل ٹینکر دکان میں گھس گیا، حادثے میں دکاندار زخمی ہوگیا۔ حادثے میں ٹینکر میں موجود آئل بہہ گیا، دکان زمین بوس ہوگئی۔

    یاد رہے کہ 9 جون کو صوبہ بلوچستان میں پسنی کوسٹل ہائی وے پر تیز رفتاری کے باعث گاڑی الٹ گئی تھی جس کے نتیجے میں 3 افراد جاں بحق جبکہ 9 افراد زخمی ہوگئے تھے۔

    کوئٹہ قومی شاہراہ پر ہولناک ٹریفک حادثہ، 13 افراد جاں بحق

    واضح رہے کہ 3 جون کو بلوچستان کے شہر ژوب میں کوئٹہ قومی شاہراہ پر قلعہ سیف اللہ کے قریب ٹرک اور وین میں آپس میں ٹکرا گئی تھی جس کے باعث تیرہ افراد جاں بحق ہوئے تھے۔

    پولیس کا کہنا تھا کہ حادثے میں جاں بحق ہونے والے 5افراد کا تعلق ایک ہی خاندان سے ہے، مسافر وین کوئٹہ سے ژوب آرہی تھی۔

  • جناح ایکسپریس حادثے میں جاں بحق اسسٹنٹ ڈرائیور کے بھائی نے ریلوے حکام کی رپورٹ مسترد کردی

    جناح ایکسپریس حادثے میں جاں بحق اسسٹنٹ ڈرائیور کے بھائی نے ریلوے حکام کی رپورٹ مسترد کردی

    حیدرآباد: جناح ایکسپریس حادثے میں جاں بحق اسسٹنٹ ڈرائیور کے بھائی کامران شاہ کا کہنا ہے کہ ریلوے حکام نے اپنی کوتاہیوں پر پردہ ڈالنے کے لیے حادثے کا سارا ملبہ ٹرین ڈرائیوروں پر ڈالنے کی کوشش کی ہے۔

    تفصیلات کے مطابق جناح ایکسپریس کے حادثے میں جاں بحق ہونے والے اسسٹنٹ ڈرائیور نعمان شاہ کے بھائی کامران شاہ نے حادثے کے بارے میں ریلوے حکام کی ابتدائی رپورٹ کو مسترد کرتے ہوئے کہا ہے کہ یہ جھوٹ پر مبنی رپورٹ ہے۔

    انہوں نے کہا کہ ریلوے حکام نے اپنی کوتاہیوں پر پردہ ڈالنے کے لیے حادثے کا سارا ملبہ ٹرین ڈرائیوروں پر ڈالنے کی کوشش کی ہے، اس سے حادثات کو روکنے میں کوئی مدد نہیں ملے گی۔

    کامران شاہ نے کہا کہ حکومت کو چاہیے کہ وہ ریلوے کے نظام، ٹرینوں کی حالت کو بہتر بنائے اسی سے حادثات پر قابو پایا جا سکتا ہے۔

    کراچی سے جانے والی جناح ایکسپریس مال گاڑی سے ٹکرا گئی، 3 افراد جاں بحق

    یاد رہے کہ 20 جون کو حیدرآباد کے قریب کراچی سے جانے والی جناح ایکسپریس مال گاڑی سے ٹکرا گئی تھی، حادثے میں تین افراد جاں بحق اور متعدد زخمی ہوگئے تھے۔

    وفاقی وزیر ریلوے شیخ رشید احمد نے حیدرآباد ٹرین حادثے کا نوٹس لیتے ہوئے حادثے کی متعلقہ افسران سے رپورٹ طلب کی تھی۔

    حیدرآباد میں ٹرین حادثے کی ابتدائی رپورٹ تیار

    حیدرآباد میں پیش آنے والے ٹرین حادثے کی ابتدائی رپورٹ میں خدشہ ظاہر کیا گیا تھا کہ حادثہ جناح ایکسپریس کے ڈرائیور، اسسٹنٹ کی غفلت سے پیش آیا۔