Tag: حافظ حسین احمد

کراچی: پلان اے کی طرح پلان بی کی ناکامی کے بعد بھی جے یو آئی ف کے رہنما حافظ حسین احمد نے حیران کن دعویٰ کر دیا ہے۔

تفصیلات کے مطابق گزشتہ روز مولانا فضل الرحمان کا پلان بی بھی فیل ہو گیا ہے، رہبر کمیٹی نے شاہراہوں پر جاری دھرنے ختم کرنے کا اعلان کیا، تاہم حافظ حسین احمد نے دعویٰ کیا ہے کہ وہ اپنے مقصد میں کامیاب ہو گئے ہیں۔

رہنما جے یو آئی ف حافظ حسین احمد نے کہا عمران خان کو جس طرح اکثریت سے نوازا گیا تھا، اس پر ہمیں شکوہ تھا، جس کا جواب شکوہ آنے کے بعد ہم اپنے مقاصد میں کامیاب ہو گئے ہیں، الیکشن میں جعلی طریقے سے مینڈیٹ دیا گیا جو ہمیں تسلیم نہیں۔

جے یو آئی رہنما نے کہا کہ مذاکرات پر بنائی گئی حکومتی کمیٹیاں ناکام ہوئیں، چوہدری برادران کی جو کمیٹی تھی اس کے اسپانسر وہ نہیں تھے جو پہلی کمیٹیوں کے تھے۔

یہ بھی پڑھیں:  جے یوآئی(ف) نے پلان ’سی‘ کا اعلان کردیا

یاد رہے کہ دو روز قبل حافظ حمداللہ نے بھی عجیب و غریب منطق اختیار کرتے ہوئے کہا تھا کہ دھرنے سے عام شہریوں کو تکلیف نہیں ہو رہی، ہم شاہراہیں دن میں بند کرتے ہیں رات کو کھول دیتے ہیں۔

واضح رہے کہ گزشتہ روز جمعیت علمائے اسلام (ف) نے اے اور بی کے بعد پلان ’سی ‘ کا بھی اعلان کر دیا ہے، جس کے تحت ملک بھر کے اضلاع میں جلسے اور احتجاجی ریلیاں نکالی جائیں گی، اپوزیشن کی رہبر کمیٹی کے کنوینئر اکرم درانی نے میڈیا سے بات کرتے ہوئے کہا تھا کہ 4 نکات کا حصول ہمارا نصب العین ہے، حکومت بوکھلاہٹ کا شکار ہے، عمران خان گھر جائیں گے۔

اسلام آباد: جمیعت علمائے اسلام ف کے رہنما حافظ حسین احمد نے کہا ہے کہ پلان بی میں شہر کے باہر ہائی ویز کو بند کرنے کا فیصلہ کیا ہے۔

تفصیلات کے مطابق جمیعت علمائے اسلام (ف) کے مرکزی رہنما حافظ حسین احمد نے اے آروائی نیوز کے پروگرام باخبرسویرا میں بات کرتے ہوئے کہا کہ پلان اے میں معاہدے کی پاسداری کی گئی۔

حافظ حسین احمد نے کہا کہ پلان بی میں تمام طبقوں کو شامل کیا گیا ہے، پلان بی کو تمام اتحادی سیاسی جماعتوں کی حمایت حاصل ہے۔ انہوں نے کہا کہ چمن کوئٹہ شاہراہ پر دھرنا جاری ہے، شہر کے باہر ہائی ویز کو بند کرنے کا فیصلہ کیا ہے۔ جمیعت علمائے اسلام (ف) کے رہنما نے مزید کہا کہ حکومت مذاکرات کے حوالے سے کبھی سنجیدہ نہیں تھی۔

دوسری جانب تحریک انصاف کے رہنما نے اے آروائی نیوز کے پروگرام باخبرسویرا میں بات کرتے ہوئے کہا کہ مولانا کا دھرنا ذاتی مفاد کے لیے ہے، ریاست شاہراہوں کو بند کرنے کی اجازت نہیں دے گی۔

فرخ حبیب نے کہا کہ مولانا کا دھرنا کسی سیاسی مقصد کے لیے نہیں تھا، پلان اے ناکام ہوگیا،اب بی بھی ناکام ہوگا۔ انہوں نے کہا کہ مولانا کو ان کے حلقے کے لوگ مسترد کرچکے ہیں۔

مولانا فضل الرحمان نے دھرنا ختم کرنے کا اعلان کردیا

یاد رہے کہ گزشتہ روز جمیعت علمائے اسلام (ف) کے سربراہ مولانا فضل الرحمان نے اسلام آباد میں 14 روز سے جاری دھرنا ختم کرنے کا اعلان کیا تھا۔

مولانا فضل الرحمان کا کہنا تھا کہ آگے کا لائحہ عمل یہ ہوگا کہ کارکن شہروں میں نہ بیٹھیں تاکہ لوگ پریشان نہ ہوں، اگلے دھرنے شہروں کے اندر نہیں قومی شاہراہوں پر ہوں گے۔