کراچی : جمیعت علمائے اسلام (ف) کے رہنما حافظ حمداللہ نے کہا ہے کہ شیخ وقاص اکرم کل بانی پی ٹی آئی کو بھی گالیاں دیں گے۔
اے آر وائی نیوز کے پروگرام الیونتھ آور میں خصوصی گفتگو کرتے ہوئے جمیعت علمائے اسلام (ف) کے رہنما حافظ حمداللہ نے پی ٹی آئی رہنما شیخ وقاص اکرم پر کڑی تنقید کی۔
پی ٹی آئی رہنما شیخ وقاص اکرم کی جانب سے مولانا فضل الرحمان پر کی جانے والی تنقید کے جواب میں ان کا کہنا تھا کہ شیخ وقاص اکرم کی سیاسی لوٹے ہونے کے علاوہ کوئی حیثیت نہیں۔
انہوں نے کہا کہ کل یہ بانی پی ٹی آئی کو بھی گالیاں دیں گے، ان کا کہنا تھا کہ چیئرمین تحریک انصاف بیرسٹر گوہر اور پی ٹی آئی کی دیگر قیادت یہ بتائے اگر ان کا بھی یہی موقف ہے تو پھر ہم بھی جواب دیں۔
ان کا کہنا تھا کہ پشتو میں یہ کہاوت مشہور ہے کہ پتھر اسی درخت کو مارا جاتا ہے جس میں پھل ہو،
مولانا فضل الرحمان ایک پھل دار درخت کی مانند ہیں اس لیے ان کیخلاف بیانات داغے جارہے ہیں، پی ٹی آئی والے ہمارے بھائی ہیں تنقید کرسکتے ہیں، پی ٹی آئی والے بتائیں کہ وہ شیخ وقاص کے بیان کے ساتھ کھڑے ہیں یا نہیں؟
پی ٹی آئی کی مخصوص نشستوں کے فیصلے سے متعلق پوچھے گئے ایک سوال کے جواب میں انہوں نے کہا کہ پشاور ہائیکورٹ نے پہلے جو فیصلہ دیا اب دوبارہ سپریم کورٹ نے بھی وہی فیصلہ دیا ہے، تینوں فیصلوں یا کیس میں جے یو آئی ف فریق نہیں تھی۔
حافظ حمداللہ کا کہنا تھا کہ سپریم کورٹ کے ججز نے کہا ہے کہ انہوں نے قانون کے مطابق فیصلہ دیا ہے، قانونی فیصلے کے مطابق ہمیں مخصوص نشستیں مل رہی ہیں تو ہم کیا کہہ سکتے ہیں۔
جے یو آئی رہنما نے کہا کہ کے پی میں پی ٹی آئی کی حکومت ختم کرنا کس کی خواہش ہے؟ پی ٹی آئی کی حکومت ختم کی جاتی ہے تو یقیناً ان ہی کی خواہش ہوگی جنہوں نے بنائی، اب آگے کس کی حکومت ہوگی کچھ نہیں سوچا۔
دریائے سوات سانحے کے حوالے سے انہوں نے وضاحت دی کہ سوات کا واقعہ کے پی میں ہوا جہاں پی ٹی آئی کی حکومت ہے اس لیے اس پر تنقید کی، سوات واقعہ جے یو آئی حکومت میں ہوتا تو اس پر بھی تنقید کرتا، کیا کےپی کی حکومت صرف بسکٹ کھانے کیلئے بیٹھی ہے۔
