Tag: حافظ قرآن

لاہور کے علاقہ مصری شاہ میں کھمبے سے لٹکی دھاتی ڈور سے سولہ سالہ حافظ قرآن کرنٹ لگنے سے جاں بحق ہوگیا، لواحقین نے لاش سڑک پر رکھ کر احتجاج کیا۔

تفصیلات کے مطابق لاہور میں پتنگ بازی کے باعث ایک  اور نوجوان جان کی بازی ہار گیا، لاہور کے علاقے مصری شاہ میں بجلی کی تاروں پر پتنگ کا دھاتی مانجھا لٹک رہا تھا کہ اس دوران کھمبے کے قریب سے گزرتے ہوئے سولہ سالہ حافظ قرآن صہیب اس کی زد میں آگیا۔

دھاتی ڈور میں کرنٹ کے باعث نوجوان نے وہیں تڑپ کر جان دے دی، جوان بیٹے کی موت نے گھر میں قیامت برپا کردی، بیٹے کی جدائی میں تڑپتی ماں اور غم سے نڈھال باپ نے حکومت پنجاب سے پتنگ بازی پرمکمل پابندی لگانے کا مطالبہ کرتے ہوئے کہا ہے کہ ہم نہیں چاہتے کہ ایسا واقعہ کسی اور کے ساتھ ہو ۔

اہل محلہ کا کہنا ہے کہ بجلی کے تار بچوں کیلئے خطرے کا باعث بنے ہوئے ہیں, لواحقین نے صہیب کی لاش سڑک پررکھ کراحتجاجی مظاہرہ کیا، مظاہرے کے باعث سڑک پر ٹریفک جام ہوگیا بعد ازاں پولیس حکام کی یقین دہانی کے بعد مظاہرین منتشر ہوگئے۔

صوبہ پنجاب میں آج بھی پابندی کے باوجود پتنگ بازی میں دھاتی ڈور کا آزادانہ استعمال جاری ہے، حکومت پنجاب اس قانون پر آج تک عمل درآمد نہ کراسکی۔

مزید پڑھیں : لاہوریوں کے لیے خوشخبری، حکومت پنجاب نے بسنت منانے کی اجازت دے دی

واضح رہے کہ اس سے قبل بھی راولپنڈی اور لاہور میں پتنگ بازی کے دوران گلے میں ڈور پھرنے سے راولپنڈی میں پیراں فقیراں اور سکستھ روڈ میں دو موٹر سائیکل سوارجاں بحق ہوگئے تھے دیگر حادثات میں تیئس افراد زخمی ہو کر اسپتال پہنچے۔

اس کے علاوہ راولپنڈی میں ہی ایک اورواقعے میں راول روڈ پرگولی لگنے سے حسا س ادارے کے آفیسر کا ڈرائیور زخمی ہوگیا۔ ریسکیو ذرائع کے مطابق نوجوان کوبسنت کے موقع پر کی جانے والی فائرنگ کے دوران گولی لگی۔