حافظ نعیم نے کہا ہے کہ پی ڈی ایم اور ایم کیو ایم نے مل کر کراچی کی پیٹھ پر چھرا گھونپا ہے، گزشتہ حکومت میں پی ٹی آئی اور ایم کیو ایم اتحادی تھے.
جماعت اسلامی کراچی کے امیر حافظ نعیم الرحمان کا نیوز کانفرنس میں کہنا تھا کہ کراچی سے پی ٹی آئی کی قومی اسمبلی کی 14 نشستیں تھیں، پی ٹی آئی کو مردم شماری پر آواز اٹھانا چاہیے تھی، ایم کیو ایم نے مردم شماری کی منظوری خاموشی سے قبول کی۔
حافظ نعیم نے مزید کہا کہ ایسا کرنے سے جعلی مردم شماری کی قانونی حیثیت بن گئی، اب ڈیجیٹل مردم شماری کے نام پر دھوکا دیا جائے گا، اگر ڈیجیٹل مردم شماری کروانی ہے تو طریقہ کار وضع ہونا چاہیے۔
انھوں نے کہا کہ جب خانہ شماری کی تو اعتراض ہوا کہ ٹھیک سے نہیں ہو رہی، جب مردم شماری شروع ہوئی تو بھی اعتراض سامنے آیا ہم نے بھی کیا، مردم شماری میں کراچی کی آبادی 2 کروڑ 3 لاکھ آئی ہے۔
رہنما جماعت اسلامی نے کہا کہ صرف دکھانے کے لیے مردم شماری ہوئی اعداد و شمار پہلے سے طے تھے، آبادی کی تعداد نادرا کے ڈیٹا سے نکال کر طے کی ہے، پنجاب سے تعلق رکھنے والوں کی لاکھوں میں تعداد ہے جو کراچی میں رہتے ہیں، اسی طرح لاکھوں کی تعداد میں اندرون سندھ کے لوگ کراچی میں رہ رہے ہیں۔
حافظ نعیم نے کہا کہ مردم شماری کے اصول کے مطابق انھیں کراچی میں گنا جانا چاہیے، کراچی میں لاکھوں پختون ہیں جن کا مستقل پتہ کے پی کا ہے انھیں بھی نہیں گنا جاتا، جو پورے پاکستان کی معیشت چلاتا ہے اس کی گنتی بھی پوری نہیں کرتے، ایک کروڑ 91 لاکھ لوگ ایسے ہیں جن کا مستقل پتہ کراچی کا ہے۔
انھوں نے کہا کہ ایم کیو ایم نے ایک پھر سے کراچی کو بیچ دیا، ایم کیو ایم والے کراچی کی پیٹ میں مسلسل چھرا گھونپ رہے ہیں، اگر ہمیں ساڑھے 3 کروڑ گن لیا جائے تو ہماری سیٹیں 35 تک چلی جائیں گی۔
حافظ نعیم نے کہا کہ کراچی کو صحیح معنوں میں گن لیا جائے تو سندھ اسمبلی سے وڈیرہ شاہی نکل جائے گی، محکمہ شماریات کا ایک ہی کام ہے کہ گنتی صحیح کرے وہ بھی ٹھیک نہیں کررہا، الیکشن کمیشن کا کام صرف الیکشن کرانا ہے وہ بھی ٹھیک نہیں کرواتا۔
انھوں نے کہا کہ ایم کیو ایم کہہ رہی ہے کہ بہت بڑی کامیابی حاصل کی ہے، ایک کروڑ 45 لاکھ افراد کو کم گنا گیا اور ایم کیو ایم کہتی ہے بڑی کامیابی حاصل ہوئی، ایم کیو ایم نے کیا کمال کیا جس پر خوشیاں منا کرعوام کو دھوکا دے رہے ہیں، ایم کیو ایم نے پیپلزپارٹی جیسی جماعت کا کراچی میں تسلط کروا دیا۔
حافظ نعیم کے مطابق سمجھ سے باہر ہے مراد علی شاہ این ایف سی ایوارڈ سے کیسے پیچھے ہٹ گئے، کراچی کی گنتی پوری ہو گی تو این ایف سی ایوارڈ بڑھ جائے گا۔
