اسلام آباد: اسپانسرشپ حج اسکیم میں درخواستوں کی وصولی کیلئےایک ہفتے اور ریگولر حج اسکیم میں درخواستوں کی وصولی میں 2 اپریل تک توسیع کردی گئی۔
تفصیلات کے مطابق اسپانسرشپ حج اسکیم میں درخواستوں کی وصولی کیلئےایک ہفتے توسیع کا فیصلہ کرلیا گیا ، اس حوالے سے ترجمان مذہبی امور نے بتایا کہ سمندرپارپاکستانیوں کو رقوم بھجوانے میں مشکلات کےبعد فیصلہ کیا، سمندر پار پاکستانی7اپریل تک اسپانسرشپ حج اسکیم میں رقوم بھجوا سکیں گے۔
ترجمان کا کہنا تھا کہ رقوم وزارتِ مذہبی امورکےڈالراکاؤنٹ میں بذریعہ ٹی ٹی یاوائرٹرانسفر ہوں گی ، رقوم کی تصدیق اورپروسیس کیلئے درخواست گزار یا قریبی بینک سےرابطہ رکھیں۔
مذہبی امور کے ترجمان نے بتایا کہ اسپانسرشپ حج سکیم کےدرخواست گزاروں کو بغیر قرعہ اندازی کامیاب قرار دیا جائے گا، حج درخواست گزار مزید معلومات اور پروسیس کیلئے نامزد بینکوں سے رجوع کریں۔
ترجمان کے مطابق ریگولر حج اسکیم میں درخواستوں کی وصولی میں 2 اپریل تک توسیع کردی ہے ، نامزد بینک ہفتہ اور اتوار کو حج درخواستوں کی وصولی کیلئے کھلے رہیں گے، نامزد بینک کھولنے کی اجازت حاصل کرنے کیلئے اسٹیٹ بینک سے رابطہ کر لیا گیا ہے۔
یاد رہے وزارت مذہبی امور نے حج اخراجات میں کمی کی نوید سناتے ہوئے کہا تھا کہ سرکاری اسکیم کے تحت عازمین حج کو 45 ہزار روپے کمی ممکن ہوگی۔
وزرات مذہبی امور کا کہنا تھا کہ پاکستانی کرنسی مزید گراوٹ کاشکار نہ ہوئی تو فائدہ عازمین کو منتقل کریں گے، سعودی حکومت سے مذاکرات کرکے پیکج کو سستا کرنے کی کوشش کررہےہیں۔
وزرات مذہبی امور نے کہا تھا کہ کوشش ہے کہ شمالی ریجن کیلئےسرکاری حج پیکج11 لاکھ 30 ہزار تک لایاجائے اور جنوبی ریجن کیلئے سرکاری حج پیکج سستاہوکر11لاکھ20ہزارتک دستیاب ہوسکے۔
