پشاور : سعودی مذہبی وزیر نے پاکستان کا حج کوٹا بڑھانے کی یقین دہانی کرادی۔
تفصیلات کے مطابق وفاقی وزیر مذہبی امور سردار یوسف نے آج اپنے سعودی ہم منصب سے ملاقات کی ہے اور دوران گفتگو حج کوٹے میں اضافے، درخواستوں کی جمع کرانے کی میعاد اور دیگر امور پر تفصیلی تبادلہ خیال کیا۔
ذرائع کے مطابق سعودی مذہبی وزیر نے پاکستانی ہم منصب کی باتوں کو غور سے سنا اور حج کوٹا بڑھانےکی یقین دہانی کراتے ہوئے دیگر امور کو بھی احسن طریقے سے حل کرنے میں دلچسپی ظاہر کی۔
علاوہ ازیں دورانِ ملاقات دوطرفہ تعلقات اور باہمی دلچسپی کےامور پر بھی تبادلہ خیال کیا گیا اور امت مسلمہ کے اتحاد اور یکجہتی کے لیے مذید اقدامات کی ضرورت پر زور دیا گیا۔
اس دوران سعودی وزیر نے دہشت گردی کے خلاف جنگ میں پاکستانی افواج اور عوام کی قربانیوں کو سراہتے ہوئے کہا کہ دہشت گردی کے خلاف جنگ میں علما اہم کردار ادا کرسکتے ہیں اور انتہا پسندی کے عفریت کو قابو میں لا سکتے ہیں۔
اس موقع پر پاکستانی وزیر مذہبی امور نے اپنے ہم منصب کا شکریہ کا ادا کیا اور امت مسلمہ اور حرمین شریفین کے لیے سعودی حکومت کی خدمات کی تعریف کی۔
واضح رہے کہ سعودی وزیر مذہبی امور امام کعبہ کے ہمراہ جمعیت علمائے پاکستان کے صد سالہ اجتماع شرکت کے لیے پشاور پہنچے ہیں جہاں ان کا استقبال پاکستانی وزیر برائے مذہبی امور سمیت اعلیٰ حکام نے کیا۔
