ARYNews.tv | Urdu – Har Lamha Bakhabar

Tag: حج کوٹہ

  • وزیر اعظم نے سرکاری حج کوٹہ کم رکھنے کی تجویز مسترد کر دی تھی

    وزیر اعظم نے سرکاری حج کوٹہ کم رکھنے کی تجویز مسترد کر دی تھی

    اسلام آباد (31 جولائی 2025): ذرائع نے کہا ہے کہ وزیر اعظم میاں شہباز شریف نے سرکاری حج کوٹہ کم رکھنے کی تجویز مسترد کر دی تھی۔

    تفصیلات کے مطابق وفاقی کابینہ میں حج پالیسی منظور کر لی گئی ہے، تاہم اجلاس میں تجویز آئی تھی کہ سرکاری کوٹہ 40 فی صد رکھا جائے، لیکن وزیر اعظم نے اسے مسترد کر کے 70 فی صد کیا۔

    کابینہ اجلاس میں فیصلہ ہوا کہ آئندہ سال پرائیویٹ حج کوٹہ صرف 30 فی صد ہوگا، وزیر اعظم نے کہا کہ حجاج کرام کو ہر قسم کی سہولتوں کی فراہمی یقینی بنائی جائے گی۔

    وزیر مذہبی امور نے بتایا کہ تخمینہ ساڑھے 11 سے ساڑھے 12 لاکھ روپے ہوگا، 2026 میں ایک لاکھ 79 ہزار سے زائد پاکستانی فریضہ حج پر جا سکیں گے۔

    حج پالیسی 2026 کی منظوری، سرکاری اور نجی کوٹہ سے متعلق بڑا فیصلہ

    دوسری طرف وزیر اعظم کے زیر صدارت اجلاس میں فیصلہ ہوا ہے کہ مہنگی چینی بیچنے والوں کے خلاف سخت کارروائی ہوگی، وزیر اعظم نے چینی کے سرکاری نرخ پر عمل درآمد یقینی بنانے کا حکم بھی دیا، شہباز شریف نے کہا چینی کی ایکس مل قیمت 165 روپے اور ریٹیل قیمت 173 روپے پر عمل درآمد کرایا جائے۔

    انھوں نے کہا کسی کو بھی عوام کے معاشی استحصال کی ہرگز اجازت نہیں دی جائے گی، وزیر اعظم کو بریفنگ میں بتایا گیا کہ چینی کی مصنوعی قلت پیدا کرنے والوں کے خلاف کارروائیاں جاری ہیں۔

  • سعودی عرب سے حج کوٹہ بڑھانے کی اپیل

    سعودی عرب سے حج کوٹہ بڑھانے کی اپیل

    حج 2025 کے فلائٹ شیڈول کا اعلان کر دیا گیا ہے تاہم ایک ملک نے سعودی عرب سے حج کوٹہ بڑھانے کی اپیل کر دی ہے۔

    سبق ویب سائٹ کے مطابق ملائیشیا نے سعودی وزارت حج کو درخواست دی ہے جس میں حج کوٹہ میں 10 ہزار عازمین کے اضافے کی اپیل کی گئی ہے۔

    ملائیشیا کے دینی امور کے محکمہ نے سعودی وزارت حج وعمرہ کو دی گئی درخواست میں یقین دہانی کرائی ہے کہ کوٹے میں اضافے پر ہمارے عازمین مملکت کے تمام ضوابط کی پابندی کریں گے۔

    ملائیشین حکام نے یہ بھی کہا ہے کہ ان کے عازمین جدہ کے کنگ عبدالعزیز انٹرنیشنل ایئرپورٹ اور مدینہ منورہ میں شہزاد محمد بن عبدالعزیز انٹرنیشنل ایئرپورٹ کے ذریعہ سفر حج کریں گے۔

    واضح رہے کہ ملائیشیا سے ہر سال 31600 عازمین فریضہ حج کی ادائیگی کے لیے حجاز مقدس آتے ہیں اور اگر سعودی وزارت درخواست منظور کرتی ہے تو یہ کوٹہ بڑھ کر 41 ہزار 600 ہو جائے گا۔

    https://urdu.arynews.tv/hajj-2025-flight-schedule-announced/

  • حج کوٹہ بڑھانے کیلئے کونسا ایشیائی ملک سعودی حکام سے بات چیت کررہا ہے؟

    حج کوٹہ بڑھانے کیلئے کونسا ایشیائی ملک سعودی حکام سے بات چیت کررہا ہے؟

    ایشیائی ملک کے حکام اپنے وطن سے حج کے لیے جانے والے عازمین کا کوٹہ بڑھانے کے سلسلے میں سعودی حکام سے بات چیت کررہے ہیں۔

    میڈیا رپورٹس کے مطابق انڈونیشی وزارت دینی امور نے بتایا ہے کہ انڈونیشی عازمین حج کا کوٹہ بڑھانے کے لیے سعودی حکام سے گفت و شنید ہورہی ہے، ایشیا ملک کے حکام چاہتے ہیں کہ ان کے زائرین کے لیے حج کوٹہ بڑھایا جائے۔

    سبق ویب سائٹ کے مطابق انڈونیشی حکام کا کہنا ہے کہ ہماری خواہش ہے کہ امسال انڈونیشی عازمین کے کوٹے میں اضافہ کیا جائے۔

    ’21ہزار سے زائد حج کوٹہ سعودی عرب کو واپس کرنےکی تیاریاں‘

    انڈونیشی وزارت مذہبی امور کے حکام نے بتایا کہ حج کے لیے ملک سے پہلا قافلے دو مئی سے 16 مئی کے درمیان سعودی عرب کی طرف رخت سفر باندھے گا،شیڈول کے تحت یہ قافلے مدینہ منورہ پہنچیں گے۔

    حج آپریشن کے حوالے سے انڈونیشی حکام نے مزید کہا ہے کہ انڈونیشیا سے آخری حج پرواز 31 مئی کو سعودی عرب کے لیے روانہ ہوگی۔

  • پاکستان کی تاریخ میں پہلی بار حج کوٹہ سعودی عرب کو واپس کردیا گیا

    پاکستان کی تاریخ میں پہلی بار حج کوٹہ سعودی عرب کو واپس کردیا گیا

    اسلام آباد : پاکستان نے تاریخ میں پہلی بار حج کوٹہ سعودی عرب کوواپس کردیا، کم درخواستیں موصول ہونے پر حج کوٹہ واپس کرنا پڑا۔

    تفصیلات کے مطابق پاکستان کی تاریخ میں پہلی بارحج کوٹہ سعودی عرب کوواپس کر دیا گیا ، وزارت مذہبی امور نے بتایا کہ سرکاری اسکیم کا 8 ہزارعازمین کو ملنے والا حج کوٹہ واپس کردیا ہے۔

    وزارت کا کہنا تھا کہ کم درخواستیں موصول ہونےپر حج کوٹہ واپس کرنا پڑا، حج کوٹہ واپس نہ کیا جاتا تو رہائش گاہوں کے کرایہ و دیگر اخراجات کی مد میں 24 ملین ڈالرز ادا کرنے پڑتے۔

    مذہبی امور نے مزید بتایا کہ حج کوٹے کی واپسی کا فیصلہ وفاقی کابینہ نےکیا، مہنگے حج کے سبب متعددپاکستانی درخواستیں ہی نہیں دے سکے۔

    یاد رہے رواں سال حج کے لیے پاکستان کا کوٹہ ایک لاکھ 79 ہزار افراد کا تھا، پاکستان کا رواں سال سرکاری حج اسکیم کا مجموعی کوٹہ 79 ہزار 600 ہے، جب کہ اسپانسر شپ کے تحت کوٹہ 43 ہزار تھا۔

    اسپانسر شپ کے تحت صرف 6 ہزار درخواستیں موصول ہوئی ہیں، جب کہ ریگولر اسکیم میں 43 ہزار کے کوٹے میں 30 ہزار سے زائد درخواستیں موصول ہوئیں، مجموعی طور پر 86 ہزار کے کوٹے میں صرف 36 ہزار سے زائد درخواستیں موصول ہوئیں۔

  • حکومت کی جانب سے غیر استعمال شدہ حج کوٹہ سعودی عرب کو واپس کیے جانے کا امکان

    حکومت کی جانب سے غیر استعمال شدہ حج کوٹہ سعودی عرب کو واپس کیے جانے کا امکان

    اسلام آباد: ذرائع کا کہنا ہے کہ حکومت کی جانب سے غیر استعمال شدہ حج کوٹہ سعودی عرب کو واپس کیے جانے کا امکان ہے۔

    تفصیلات کے مطابق رواں سال حج کے لیے مختص پاکستان کا کوٹہ پورا نہیں ہو سکا، کم درخواستیں موصول ہونے کی وجہ سے امکان ہے کہ اسے سعودی عرب کو واپس کر دیا جائے گا۔

    ذرائع کا کہنا ہے کہ یہ کوٹہ پرائیویٹ ٹورز آپریٹرز کو دینے پر بھی غور کیا جا رہا ہے، تاہم حج کوٹہ کی واپسی کا حتمی فیصلہ وفاقی کابینہ کرے گی۔

    رواں سال حج کے لیے پاکستان کا کوٹہ ایک لاکھ 79 ہزار افراد کا ہے، پاکستان کا رواں سال سرکاری حج اسکیم کا مجموعی کوٹہ 79 ہزار 600 ہے، جب کہ اسپانسر شپ کے تحت کوٹہ 43 ہزار تھا۔

    اسپانسر شپ کے تحت صرف 6 ہزار درخواستیں موصول ہوئی ہیں، جب کہ ریگولر اسکیم میں 43 ہزار کے کوٹے میں 30 ہزار سے زائد درخواستیں موصول ہوئیں، مجموعی طور پر 86 ہزار کے کوٹے میں صرف 36 ہزار سے زائد درخواستیں موصول ہوئیں۔

    ذرائع کا کہنا ہے کہ کم درخوستوں کی وصولی کی وجہ حج اخراجات میں 200 فی صد اضافہ ہے، سرکاری حج اسکیم کے پیکج والے عازمین کو دی جانے والی سبسڈی ختم کرنے کا فیصلہ کر دیا گیا ہے۔

    رواں سال سرکاری حج اسکیم 11 لاکھ 75 ہزار روپے مقرر ہے، جب کہ جنوبی علاقوں کے عازمین کے لیے ساڑھے 12 لاکھ تک کے اخراجات ہیں، اور پرائیویٹ حج آپریٹرز کے لیے کم از کم 13 لاکھ اور زیادہ سے زیادہ 20 لاکھ کے اخراجات ہیں۔

  • سعودی وزارت حج و عمرہ نے حج کوٹے کی تفصیلات جاری کر دی

    سعودی وزارت حج و عمرہ نے حج کوٹے کی تفصیلات جاری کر دی

    ریاض: سعودی وزارت حج و عمرہ نے رواں برس تمام ممالک کے لیے حج کوٹے کی تفصیلات جاری کر دی۔

    تفصیلات کے مطابق سعودی وزارت حج و عمرہ نے کہا ہے کہ بیرون مملکت اس سال ساڑھے 8 لاکھ عازمین حج پر آئیں گے جو کل تعداد کا 85 فی صد ہیں۔

    اس سال اندرون و بیرون مملکت سے عازمین کی تعداد 10 لاکھ مقرر کی گئی ہے، رواں برس پاکستان سے 81 ہزار 132 عازمین حج کے لیے آئیں گے۔

    وزارت حج و عمرہ نے کہا ہے کہ گزشتہ برسوں کے دوران جس ملک کے لیے جتنا حج کوٹہ مقرر تھا، رواں برس اس کا 45.2 فی صد حصہ مختص کیا گیا ہے، اس اصول کے مطابق سب سے زیادہ ایک لاکھ 51 ہزار عازمین حج انڈونیشیا سے آئیں گے، انڈونیشیا کے بعد سب سے زیادہ عازمین پاکستان سے آئیں گے۔

    سب سے کم عازمین انگولا سے آئیں گے ان کی کل تعداد 23 ہوگی، عرب ممالک میں سب سے زیادہ حج پر آنے والے مصر سے ہوں گے جن کی تعداد 35 ہزار 375 ہوگی۔

    سرکاری اعداد و شمار کے مطابق گزشتہ برس 58 ہزار 745 افراد نے فریضہ حج ادا کیا تھا، کرونا کی وبا سے قبل اکثر حجاج کی تعداد 20 لاکھ سے تجاوز کر جاتی تھی، یاد رہے کہ کرونا وائرس کی وبا پر قابو پانے کے لیے گزشتہ 2 برسوں میں حج کے موقع پر عازمین کی تعداد بہت کم تھی۔

    سعودی حکام کا کہنا ہے کہ اس سال 65 سال سے کم عمر افراد حج کر سکیں گے، اور تمام عازمین کو مملکت روانگی سے 72 گھنٹے قبل کرونا کی نیگٹیو پی سی آر ٹیسٹ رپورٹ پیش کرنی ہوگی، عازمین کے پاس سعودی وزارت صحت سے منظور شدہ ویکسین سرٹیفکیٹ ہونا چاہیے۔

  • وفاقی کابینہ اجلاس: وزیر اعظم کا زرتاج گل پر اظہار ناراضی

    وفاقی کابینہ اجلاس: وزیر اعظم کا زرتاج گل پر اظہار ناراضی

    اسلام آباد: وزیراعظم عمران خان کی زیر صدارت وفاقی کابینہ کا اجلاس ختم ہو گیا، وفاقی کابینہ نے متعدد ایجنڈا آئٹمز کی منظوری دے دی، شہریار آفریدی کو اینٹی نارکوٹکس وزارت کا اضافی چارج دے دیا گیا۔

    تفصیلات کے مطابق وفاقی کابینہ نے اضافی حج کوٹے میں 40 فی صد نجی ٹور آپریٹرز کو دینے کی منظوری دے دی، اجلاس میں وزارتِ توانائی کو عید کی چھٹیوں میں لوڈ شیڈنگ نہ کرنے کی ہدایت کی گئی۔

    ذرایع کا کہنا ہے کہ کابینہ نے انسداد دہشت گردی عدالت اسلام آباد کے لیے جج مقرر کرنے، عتیق احمد کو وفاقی تعلیمی بورڈ کا سیکریٹری تعینات کرنے کی منظوری دی۔

    اجلاس میں وزیر اعظم عمران خان نے معذور افراد کی بحالی اور اعانت کے لیے جامع پالیسی مرتب کرنے کی ہدایت کی، اس سلسلے میں معاون خصوصی ثانیہ نشتر اور ظفر مرزا کو آیندہ کابینہ اجلاس تک پالیسی بنانے کی ہدایت کی گئی۔

    بچوں کے حقوق کے لیے کمیشن کے قیام پر غور اگلے کابینہ اجلاس تک مؤخر کر دیا گیا۔

    کابینہ اجلاس میں وزیر اعظم عمران خان نے وفاقی وزیر زرتاج گل پر اظہار ناراضی بھی کیا، کہا کہ زرتاج گل کو ایسا نہیں کرنا چاہیے تھا، وزرا اختیارات کا نا جائز استعمال نہ کریں، وزرا نوکری، تقرر اور تبادلے کے لیے کسی محکمے کو خط نہ لکھیں۔

    وزیر اعظم نے دو ٹوک مؤقف اپناتے ہوئے کہا کہ سفارش کلچر ہماری حکومت کا منشور نہیں، دریں اثنا، وفاقی وزیر زرتاج گل کو سرکاری معاملات میں احتیاط کی ہدایت کی گئی۔ وزیر اعظم نے کہا کہ عزیز و اقارب کی بھرتی پر وزرا خلافِ ضابطہ کام نہ کریں۔

    وزیر اعظم اقتصادی صورت حال میں بہتری کے حوالے سے پر اعتماد نظر آئے، وزیر اعظم عمران خان نے کہا کہ قوم چند ماہ میں اقتصادی حوالے سے بہتری دیکھے گی۔

  • اسلام آباد ہائی کورٹ میں حج پالیسی2019 کو چیلنج کردیا گیا

    اسلام آباد ہائی کورٹ میں حج پالیسی2019 کو چیلنج کردیا گیا

    اسلام آباد : اسلام آباد ہائی کورٹ میں نجی ٹور آپریٹرز نے حج کوٹہ اور حج پالیسی 2019ءکو چیلنج کر دیا، جس پر عدالت نے سیکرٹری وزارت مذہبی امور اور سیکشن افسر کو نوٹس جاری کر دیا۔

    تفصیلات کے مطابق اسلام آباد ہائی کورٹ کے سنگل رکنی بنچ چیف جسٹس اطہر من اللہ نے نجی ٹور آپریٹرز کی حج کوٹہ اور حج پالیسی 2019ء کے خلاف درخواست پر سماعت کی۔

    سماعت میں عبدالخالق تند ایڈووکیٹ نے کہا حج پالیسی 2019 سپریم کورٹ کے فیصلے کے منافی ہے، پرائیویٹ حج کوٹہ کی تقسیم میں شفافیت کو مد نظر نہیں رکھا گیا اور حج کوٹہ کی تقسیم میں امتیاز برتا گیا۔

    عبدالخالق تند ایڈووکیٹ نے استدعا کی سپریم کورٹ کے احکامات کی روشنی میں حج کوٹہ کی تقسیم کا حکم دیا جائے، عدالت حج پالیسی 2019 کو کالعدم قرار دے اور نئی حج پالیسی تشکیل دینے کی ہدایات جاری کی جائیں۔

    عدالت نے سیکرٹری وزارت مذہبی امور اور سیکشن افسر کو نوٹس جاری کر دیا اور سماعت 10 دنوں تک کے لئے ملتوی کر دی۔

    مزید پڑھیں : لاہورہائی کورٹ نے حج پالیسی 2019 کے خلاف دائر درخواست خارج کردی

    اس سے قبل 14 فروری کو لاہور ہائی کورٹ میں حج پالیسی 2019 کے خلاف درخواست دائر کی گئی تھی ، جسے عدالت نے ناقابل سماعت قرار دیتے ہوئے خارج کردیا تھا۔

    یاد رہے کہ قبل وزارت مذہبی امور نے حج پالیسی 2019 جاری کی تھی، جس کے مطابق رواں سال ایک لاکھ 84 ہزار 210 پاکستانی حج ادا کرسکیں گے۔

    حج پالیسی 2019 کے مطابق سرکاری حج اسکیم کو 60 فیصد اور نجی حج اسکیم کے لیے 40 فیصد کوٹہ مختص کیا گیا، جس کے تحت درخواستیں 25 فروری سے 6 مارچ تک وصول کی جاسکیں گی۔

    وزارت مذہبی امور کا کہنا تھا کہ سرکاری اسکیم کے تحت ایک لاکھ 7 ہزار 526 اور نجی اسکیم کے تحت 71 ہزار 684 عازمین حج کے لیے جائیں گے۔

  • حج 2019: پاک سعودی مذاکرات آج ہوں گے

    حج 2019: پاک سعودی مذاکرات آج ہوں گے

    اسلام آباد: حج 2019 کے سلسلے میں معاہدے کرنے کے لیے وزارتِ مذہبی امور نے تیاریاں مکمل کر لیں، پاکستان اور سعودی عرب کے درمیان مذاکرات آج ہوں گے۔

    تفصیلات کے مطابق وزیرِ مذہبی امور اور سعودی ڈپٹی وزیرِ حج و عمرہ کے درمیان مذاکرات ہوں گے، مذاکرات میں پاکستانی عازمین حج سے متعلق امور کو حتمی شکل دی جائے گی۔

    [bs-quote quote=”پہلی بار مڈل مین کے بغیر براہِ راست سعودی کمپنیوں سے ٹینڈر طلب کیے گئے ہیں۔” style=”style-7″ align=”left” color=”#dd3333″][/bs-quote]

    ذرائع کے مطابق پاکستان سعودی عرب سے حج کوٹہ بڑھانے کا مطالبہ کرے گا، پاکستان اور سعودی عرب کے درمیان معاہدوں پر دستخط 12 دسمبر کو ہوں گے۔

    دریں اثنا حج 2019 کے سلسلے میں وزیرِ مذہبی امور کی زیرِ صدارت مکہ مکرمہ میں اجلاس منعقد ہوا، جس میں ڈی جی حج ساجد یوسفانی نے وزیرِ مذہبی امور اور سیکریٹری کو بریفنگ دی۔

    اجلاس میں بریفنگ حج انتظامات، کیٹرنگ اور رہائش ٹرانسپورٹ پر دی گئی، سعودی کمپنیوں سے کیٹرنگ، ٹرانسپورٹ اور رہائش کے لیے ٹینڈرز طلب کیے گئے ہیں۔

    بریفنگ میں وزارتِ مذہی امور کو بتایا گیا کہ پہلی بار مڈل مین کے بغیر براہِ راست سعودی کمپنیوں سے ٹینڈر طلب کیے گئے ہیں۔ اس موقع پر وزیرِ مذہبی امور پیر نور الحق قادری نے ہدایت کی کہ عازمینِ حج کے لیے بہترین انتظامات کیے جائیں۔