ARYNews.tv | Urdu – Har Lamha Bakhabar

Tag: حج

  • 2025 میں کون لوگ حج نہیں کر سکیں گے؟ سعودی عرب کی ایڈوائزری آ گئی

    2025 میں کون لوگ حج نہیں کر سکیں گے؟ سعودی عرب کی ایڈوائزری آ گئی

    کراچی: سعودی وزارت حج و عمرہ کی جانب سے مذہبی امور کو حج 2025 سے متعلق ہیلتھ ایڈوائزری موصول ہو گئی ہے۔

    ترجمان مذہبی امور کے مطابق سعودی وزارت حج و عمرہ کی جانب سے اگلے برس کے حج کے لیے ایک ہیلتھ ایڈوائزری موصول ہوئی ہے، موصولہ مراسلے کے مطابق پیچیدہ امراض میں مبتلا افراد کو سفرِ حج پر روانہ نہیں ہو سکیں گے۔

    ایڈوائزری کے مطابق شدید موسم کے پیش نظر صرف تندرست و توانا عازمین کو سفرِ حج کی اجازت دی جائے گی، گردے، دل، پھیپھڑے، جگر اور کینسر کے پیچیدہ مریضوں کو سفرِ حج کی اجازت نہیں ہوگی۔

    ترجمان کے مطابق ڈیمنشیا اور متعدی امراض مثلاً ٹی بی اور کالی کھانسی سے متاثر افراد کو بھی سفر حج کی اجازت نہیں ہوگی۔ 12 سال سے کم عمر بچے اور حاملہ خواتین بھی حج کے لیے نہیں جا سکیں گی۔

    ایڈوائزری کے مطابق عازمینِ حج کے لیے گردن توڑ بخار، کرونا وائرس، موسمی انفلوئنزا، اور پولیو ویکسین لگوانا لازم ہوگا۔

  • قرۃ العین حیدر اور حجرِ اسود

    قرۃ العین حیدر اور حجرِ اسود

    قرۃُ العین حیدر نے بچیوں کے رسالے ”بنات“ سے لکھنا شروع کیا، ان کی پہلی کہانی ”چاکلیٹ کا قلعہ“ بنات میں شایع ہوئی تھی۔ قرۃُ العین حیدر اپنی کزن ڈاکٹر نور افشاں کے ساتھ ماری پور میں رہتی تھیں، جو ان دنوں پاکستان ایئر فورس میں اسکوارڈن لیڈر تھیں۔ میری ان سے پہلی اور آخری ملاقات ڈاکٹر نور افشاں کے گھر پر ہوئی۔

    آخری ملاقات ڈاکٹر نور افشاں کے بنگلے واقع بلاک بی نارتھ ناظم آباد میں ہوئی، کوئی سات، آٹھ سال پہلے جب وہ ہندوستان سے آئی تھیں، تو انہوں نے ڈاکٹر جمیل جالبی، مشفق خواجہ اور مجھ سے ملنے کی خواہش ظاہر کی۔ میں نے بڑے عرصے بعد ان کو دیکھا تھا، وہ ضعیف ہو چکی تھیں، مجھ کو دیکھ کر بڑا افسوس ہوا کہ وہ دائیں ہاتھ سے مفلوج ہوگئی ہیں، جس ہاتھ نے ان کا عمر بھر ساتھ دیا، اس ہی ہاتھ سے انہوں نے اپنے ضخیم ناول ”آگ کا دریا“ اور “سفینۂ غم دل“ اور بے شمار کہانیاں تحریر کیں۔

    مجھے اس کا علم اس وقت ہوا، جب میں نے انہیں ایک قلم پیش کرتے ہوئے کہا ”عینی بہن! ہمارے اور آپ کے خاندانی تعلقات 100 سال کے قریب ہوگئے ہیں، اس موقع پر میں ایک قلم آپ کو پیش کرنا چاہتا ہوں، جو ان تعلقات کی نشانی ہے۔“ انہوں نے بڑی خوشی سے قلم قبول کیا، اور خاص طور سے ہندوستان میں شروع ہونے والی تحریکِ نسواں میں ”عصمت“ اور ”تہذیبِ نسواں“ کا ذکر کیا، کہنے لگیں کہ پروفیسر وقار عظیم نے مردانہ ادب اور نسوانی ادب اس طرح بانٹ دیا ہے، جیسے ٹرین میں مردانہ ڈبے اور زنانہ ڈبے ہوتے ہیں۔

    باتوں باتوں میں انہوں نے بتایا کہ جب وہ عمرہ کرنے گئی تھیں، تو انہوں نے خانۂ کعبہ کے کئی چکر لگائے، لیکن ’حجرِ اسود‘ تک رسائی نہ ہو سکی کہ اسے چوم سکیں، انہیں اپنی آرزو پوری ہوتی نظر نہیں آرہی تھی کہ یک لخت انہیں ایک کالی لمبی چوڑی عورت نے پورا اٹھا کر حجرِ اسود کے قریب کر دیا کہ وہ اسے چوم سکیں اور اس طرح ان کی یہ دیرینہ خواہش پوری ہوگئی۔

    ڈاکٹر نور افشاں کے مطابق قرۃُ العین حیدر کی تحریریں بکھری رہتی تھیں۔ کبھی وہ بیٹھے بیٹھے ریپر پر، کسی بچّے کی کاپی پر، لفافے کے پیچھے کہیں بھی، کسی وقت بھی لکھنا شروع کر دیتی تھیں اور تیزی سے لکھتی تھیں۔ پھر انہیں یک جا کر کے ایک ترتیب اور تسلسل سے ’فیئر‘ کر لیتی تھیں۔ ان کے انتقال پر ان کے چچا زاد بھائی اور الہ آباد ہائی کورٹ کے جسٹس زوار حسین کی نواسی نے قرۃُ العین کی ساری چیزیں سمیٹ کر ’جامعہ ملیہ‘ میں ان کے نام سے میوزیم میں رکھوا دیں۔

    (مصنّف حاذق الخیری، ماخذ خود نوشت ’جاگتے لمحے‘)

  • حج کے دوران کتنی اموات ہوئیں؟ سعودی وزیرصحت کا اہم بیان

    حج کے دوران کتنی اموات ہوئیں؟ سعودی وزیرصحت کا اہم بیان

    ریاض:سعودی وزیرصحت فہدالجلاجل کا کہنا ہے کہ اس سال حج کے دوران شدید گرمی کے باعث ایک ہزار 301 اموات ہوئیں۔

    سعودی خبر رساں ادارے کی رپورٹ کے مطابق سعودی وزیر صحت نے بتایا کہ ان اموات میں 83 فیصد وہ افراد تھے جو بغیر پرمٹ کے حج کررہے تھے۔

    انہوں نے کہا کہ بغیر پرمٹ افراد نے صحت سے متعلق ہدایات پرعمل نہیں کیا، جن میں سے 95 مریض اسپتالوں میں زیرعلاج ہیں۔

    دوسری جانب سعودی عرب میں شدید گرمی کی وجہ سے مسجد الحرام اور مسجد نبوی صلی اللہ علیہ وآلہ وسلم میں جمعے کے خطاب اور نماز سے متعلق اہم فیصلہ کیا گیا ہے۔

    سربراہ برائے مسجد الحرام اور مسجد نبوی شیخ ڈاکٹر عبدالرحمان السدیس نے جمعہ کی نماز کے خطاب کا دورانیہ کم کرنے کی ہدایات جاری کر دیں۔

    نئے احکامات کے مطابق مسجد الحرام اور مسجد نبوی میں جمعہ کا خطاب اور نماز پندرہ منٹ کے اندر ادا کرنے کی ہدایات کی گئی ہے۔

    خانہ کعبہ کی چابی کے محافظ شیخ صالح الشیبی انتقال کر گئے

    مقامی سعودی میڈیا کے مطابق یہ فیصلہ سخت گرم موسمی حالات کے پیش نظر کیا گیا ہے، یہ تبدیلی سخت گرمیوں تک جاری رہے گی، جس کے بعد سابقہ روٹین پر عمل درآمد کیا جائے گا۔

  • حج کا رکنِ اعظم وقوفِ عرفہ آج ادا کیا جائے گا

    حج کا رکنِ اعظم وقوفِ عرفہ آج ادا کیا جائے گا

    مکہ مکرمہ: مناسک حج کی ادائیگی کا سلسلہ جارہے، لاکھوں فرزندان اسلام آج رکنِ اعظم وقوف عرفہ ادا کریں گے۔

    اے آر وائی نیوز کے مطابق عازمین حج گزشتہ روز منیٰ پہنچے، رات کو وہیں قیام کیا، عازمین آج حج وقوف عرفہ کیلئے میدان عرفات روانہ ہونگے۔

    مسجد نمرہ میں امام کعبہ خطبہ حج دیں گے، اس کے بعد عازمین حج مزدلفہ میں مغرب،عشا کی نمازیں ایک ساتھ اداکرینگے۔

    حجاج کرام مزدلفہ سے رمی کے لئے کنکریاں اکٹھی کریں گے، 10ذی الحجہ کو نماز فجر کی ادائیگی کے بعد عازمین جمرات روانہ ہوجائیں گے۔

    جمرات پر شیطان کو کنکریاں مارنے کے بعد حجاج قربانی کرینگے، اس کے بعد احراموں کو کھول دیا جائے گا۔

    دوسری جانب سعودی وزارت حج وعمرہ نے عازمین کو ہدایت کی ہے کہ وہ حج کے قیمتی لمحات کو فوٹو گرافی میں ضائع نہ کریں۔

    حج کے آغاز کے موقع پر سعودی وزارت حج وعمرہ نے عازمین حج سے کہا ہے کہ وہ حج کے قیمتی لمحات کو تصاویر، ویڈیوز بنانے اور فضول باتوں میں ضائع نہ کریں اور ان نادر لمحات میں اللہ کی رضا کے حصول کے لیے کوشاں رہیں اور دعاو?ں کا خصوصی اہتمام کریں۔

    وزارت حج و عمرہ نے اپنے ایکس (ٹوئٹر) اکاؤنٹ پر کہا ہے کہ مسجد الحرام میں زیادہ وقت عبادت میں گزاریں۔ اللہ سے رحم و کرم کی دعائیں نیز نماز و تسبیح کا اہتمام کریں کیونکہ یہ وقت سب سے اہم ہے۔

    مکہ مکرمہ سے غار حرا جانا انتہائی آسان ہو گیا!

    وزارت نے عازمین حج سے کہا کہ ان لمحات کی قدر کریں خانہ کعبہ میں اپنا قیمتی وقت دعائیں کرنے میں گزاریں۔ فوٹو اور ویڈیو گرافی میں مصروف ہوکر ان لمحات کو ضائع نہ کریں۔

  • 130 سالہ معمر خاتون حج کیلئے سعودی عرب پہنچ گئیں

    130 سالہ معمر خاتون حج کیلئے سعودی عرب پہنچ گئیں

    الجزائر سے تعلق رکھنے والی 130 سالہ معمر خاتون حج کیلئے سعودی عرب پہنچ گئیں، سعودی حکام نے ایئرپورٹ پر استقبال کیا۔

    کہتے ہیں حج پر وہی جاتا ہے جس کا بلاوا آتا ہے، ایسا ہی کچھ دیکھنے میں اس وقت آیا جب حج کی سعادت حاصل کرنے کے لیے الجزائر کی 130 سالہ خاتون نے سعودی سرزمین پر قدم رکھا جہاں سعودی حکام نے ان کا استقبال کیا۔

    جدہ ائیرپورٹ پر سعودی حکام 130 سالہ خاتون کی آمد پر بنفس نفیس موجود تھے، اس موقع پر سرہدہ سیتی نامی خاتون نے سعودی قیادت اور سعودی عوام کے لیے نیک خواہشات کا اظہار بھی کیا۔

    سرہدہ سیتی نے اللہ تعالیٰ کا شکر ادا کیا کہ اس نے حج کی سعادت کے لیے انھیں منتخب کیا اور اپنے گھر آنے کی توفیق دی۔

    خیال رہے کہ سعودی عرب میں دنیا بھر سے عازمین حج کی آمد کا سلسلہ جاری ہے، حکومت کی جانب سے عازمین حج کی سہولت کے پیش نظر بہترین انتظامات کئے گئے ہیں۔

    سعودی خبر رساں ادارے سبق نیوز کے مطابق سعودی وزارت اسلامی امور نے خادم حرمین شریفین کے پروگرام کے تحت حج کے لیے آنے والے 9ممالک کے مزید 145 شاہی مہمانوں کو خوش آمدید کہا ہے۔

    رپورٹس کے مطابق اب تک 75 ملکوں کے ایک ہزار 75 شاہی مہمان مکہ مکرمہ پہنچ چکے ہیں۔ شاہ سلمان بن عبدالعزیز کی خصوصی دعوت پر دنیا بھر کے 88 ممالک کے 3 ہزار 322 عازمین فریضہ حج ادا کریں گے۔

    خصوصی دعوت پر پہنچنے والوں میں دو ہزار عازمین فلسطین میں شہید ہونے اور زخمی ہونے والوں کے لواحقین میں سے ہوں گے جبکہ 22 عازمین سعودی عرب میں علیحدہ ہونے والے سیامی بچوں کے والدین ہوں گے۔

  • سعودی عرب: حج کیلئے ایک ہزار سے زائد شاہی مہمانوں کی مملکت آمد

    سعودی عرب: حج کیلئے ایک ہزار سے زائد شاہی مہمانوں کی مملکت آمد

    سعودی عرب میں دنیا بھر سے عازمین حج کی آمد کا سلسلہ جاری ہے، حکومت کی جانب سے عازمین حج کی سہولت کے پیش نظر بہترین انتظامات کئے گئے ہیں۔

    سعودی خبر رساں ادارے سبق نیوز کے مطابق سعودی وزارت اسلامی امور نے خادم حرمین شریفین کے پروگرام کے تحت حج کے لیے آنے والے 9ممالک کے مزید 145 شاہی مہمانوں کو خوش آمدید کہا ہے۔

    رپورٹس کے مطابق اب تک 75 ملکوں کے ایک ہزار 75 شاہی مہمان مکہ مکرمہ پہنچ چکے ہیں۔

    شاہ سلمان بن عبدالعزیز کی خصوصی دعوت پر دنیا بھر کے 88 ممالک کے 3 ہزار 322 عازمین فریضہ حج ادا کریں گے۔

    خصوصی دعوت پر پہنچنے والوں میں دو ہزار عازمین فلسطین میں شہید ہونے اور زخمی ہونے والوں کے لواحقین میں سے ہوں گے جبکہ 22 عازمین سعودی عرب میں علیحدہ ہونے والے سیامی بچوں کے والدین ہوں گے۔

    سعودی وزیر اسلامی امور کے مطابق وزارت نے پروگرام کے جنرل سیکرٹریٹ کے ذریعے شاہی فرمان کے نفاذ کے تمام طریقہ کار کو سفارت خانوں اور بیرون ملک وزارت کے مذہبی اتاشیوں کے ساتھ ہم آہنگی کے ساتھ مکمل کر لیا ہے۔

    واضح رہے کہ اس سال خطبہ حج اردو سمیت 20 بین الاقوامی زبانوں میں نشر کیا جائے گا اور یہ خطبہ دنیا کے ایک ارب سے زائد لوگ سن اور دیکھ سکیں گے۔

    خطبہ حج اسمارٹ موبائل فون، حرمین شریفین کی ویب سائٹ اور منارۃ الحرمین پلیٹ فارم کے ذریعے بھی پیش ہوگا۔

    اس حوالے سے مسجد الحرام اور مسجد نبوی ﷺ کے امور کے لیے جنرل پریذیڈنسی عرفات کے خطبے کے لیے اب تک کا سب سے بڑا ترجمہ پروجیکٹ شروع کرنے کی تیاری کر رہی ہے۔

    حرمین شریفین میں دینی امور کے سربراہ شیخ ڈاکٹر عبدالرحمن السدیس نے تصدیق کی کہ خطبہ حج کے ترجمے کی تیاریاں مکمل ہیں۔ یہ 20 بین الاقوامی زبانوں میں بیک وقت ڈیجیٹل چینلز، پلیٹ فارمز اور سوشل میڈیا کے ذریعے نشر ہوگا۔

    سعودی عرب: حج ضوابط کی خلاف ورزی پر مزید 18 افراد کو سزا

    ایس پی اے کے مطابق یہ اہم منصوبہ مملکت کے مذہبی روادری، اعتدال اور امن کے پیغام کو اجاگر کرنے،اسلام کی حقیقی تصویر اور اس کی اعلی اقدار کو ظاہر کرنے کی کوشش کرتا ہے۔

  • عازمین دوران حج سیاسی نعروں سے پرہیز کریں، حکام نے خبردار کردیا

    عازمین دوران حج سیاسی نعروں سے پرہیز کریں، حکام نے خبردار کردیا

    ریاض: سعودی عرب میں دنیا بھر سے عازمین حج کی آمد کا سلسلہ جاری ہے جبکہ سعودی حکومت کی جانب سے عازمین حج کے لئے بہترین انتظامات کئے گئے ہیں۔

    خلیجی خبر رساں ادارے کی رپورٹ کے مطابق سعودی وزیر حج وعمرہ توفیق الربیعہ نے عازمین کو خبردار کرتے ہوئے کہا ہے کہ دوران حج سیاسی نعرے لگانے کی اجازت نہیں ہے۔

    ریاض میں سعودی وزیر حج توفیق الربیعہ کا میڈیا سے بات کرتے ہوئے کہنا تھا کہ حج عبادت کے لیے ہے نہ کہ سیاسی نعروں کے لیے، لہٰذا حج کے دوران کسی کو سیاسی نعرے لگانے کی اجازت نہیں دی جاسکتی۔

    سعودی وزیر حج کے مطابق حج عبادت کی ایک شکل ہے، سعودی حکومت کی ہر ممکن یہی کوشش ہوتی ہے کہ حج عاجزی، سکون اور روحانیت کا اعلیٰ ترین مظہر ہو۔

    سعودی وزیر نے کہا کہ ہم امن کو یقینی بنانے کے خواہاں ہیں تاکہ ہر کوئی آسانی کے ساتھ اپنے مناسک ادا کر سکے۔

    دوسری جانب عرفات کے علاقے میں گرمی کی شدت کم کرنے کے لیے مسجد نمرہ کے ارد گرد سڑکوں پر سفید رنگ کردیا گیا۔

    سعودی عرب کی جنرل روڈز اتھارٹی کا کہنا ہے سڑکوں پر مخصوص قسم کا سفید رنگ لگانے سے سطح کی حرارت میں بیس ڈگری سیلسیس تک کمی ہوجاتی ہے۔

    اتھارٹی کے ترجمان عبد العزیزالعتیبی کا کہنا ہے سڑکوں پرلگایا جانے والامخصوص روغن مقامی طور پر تیار ہوا ہے اور اس میں دھوپ کی حرارت کم جذب ہوتی ہے۔

    سعودی عرب: حجاج کرام کیلئے 5000 ٹیکسیوں کی فراہمی

    گزشتہ برس منی میں جمرات جانے والے راستے پر یہی روغن لگایا گیا تھا تو وہاں بارہ سے پندرہ ڈگری گرمی کم ہوگئی تھی، اس سال مسجد نمرہ کے 25 ہزار مربع میٹر پر روغن لگایا گیا ہے۔

  • سعودی عرب: 9 لاکھ 35 ہزار عازمین حج مکہ مکرمہ پہنچ گئے

    سعودی عرب: 9 لاکھ 35 ہزار عازمین حج مکہ مکرمہ پہنچ گئے

    سعودی عرب میں دنیا بھر سے عازمین حج کی آمد کا سلسلہ جاری ہے، حکومت کی جانب سے عازمین کے لئے بہترین انتظامات کئے گئے ہیں۔

    سعودی خبر رساں ادارے ایس پی اے کی رپورٹ کے مطابق سعودی عرب کے جنرل ڈائریکٹوریٹ آف پاسپورٹس نے اعلان کیا ہے کہ حج سیزن 2024 کے لیے اتوار دو جون تک فضائی، بحری اور زمینی راستے سے 9 لاکھ 35 ہزار966 عازمین کی مملکت میں آمد ہوچکی ہے۔

    محکمہ پاسپورٹ کا کہنا ہے کہ وہ عازمین کے داخلے کو آسان بنانے کے لیے اپنی تمام صلاحیتیں بروئے کار لا رہا ہے، 8 لاکھ 96 ہزار287 عازمین فضائی راستے، 37 ہزار 280 زمینی اور دو ہزار 399 بحری راستے سے مملکت میں داخل ہوچکے ہیں۔

    قبل ازیں ’جوازات‘ کے ترجمان میجر ناصر العتیبی کا کہنا تھا کہ مختلف ممالک سے آنے والے عازمین کی خدمت کیلیے 138 زبانوں میں فوری ترجمہ کرنے کی ڈیوائسز فراہم کردی گئی ہیں۔

    دوسری جانب سعودی وزارتِ امور نے عازمینِ کو متنبہ کیا ہے کہ اگر نُسک کارڈ کھویا تو دس ہزار ریال جرمانہ ہوگا۔

    وزارت مذہبی امور نے حجاج کے لیے خصوصی پیغام میں عازمین کو خبردار کیا ہے کہ عازمین کو نُسک کارڈ کی گمشدگی کی صورت میں دس ہزار سعودی ریال جرمانہ ادا کرنا پڑے گا۔

    وزارت کی جانب سے یہ بھی واضح کیا گیا کہ حج کی سعادت حاصل کرنے والے حجاج نسک کارڈ کی حفاظت یقینی بنائیں کیونکہ اس کے گم ہونے کی وجہ سے فریضہ حج میں مشکلات پیش آسکتی ہیں۔

    یاد رہے گزشتہ ماہ سعودی وزارت حج و عمرہ نے ’نُسک حجاج کارڈ‘ کا اجرا کیا تھا، نُسک حجاج کارڈ کا مقصد حج سیزن کے لیے آپریشنل طریقہ کار کی صلاحیت بڑھانا ہے تاکہ حج کو بہت زیادہ آسان بنایا جا سکے اورغیر قانونی طریقے سے حج کرنے کے واقعات کو کم کیا جا سکے۔

  • اٹلی سے عازمین حج کا پہلا قافلہ مکہ مکرمہ پہنچ گیا

    اٹلی سے عازمین حج کا پہلا قافلہ مکہ مکرمہ پہنچ گیا

    سعودی عرب میں دنیا بھر سے عازمین حج کی آمد کا سلسلہ ہے، ایسے میں اٹلی سے 130 افراد پر مشتمل عازمین حج کا پہلا قافلہ مکہ مکرمہ پہنچ گیا ہے۔

    سعودی خبر رساں ادارے کے مطابق اٹلی کے عازمین حج کو ایئرپورٹ پہنچنے پر قہوہ، کھجور اور پھول پیش کرکے خوش آمدید کہا گیا، جدہ ایئرپورٹ پہنچنے پر اٹلی کے عازمین حج کو بہترین سہولتیں فراہم کی گئیں۔

    اٹلی حجاج کے معلم ادارے کے سربراہ ڈاکٹر احمد سندی کا اس موقع پر کہنا تھا کہ ’سعودی حکومت کی ہدایت اور وزیر حج و عمرہ کی نگرانی میں معلمین کا ادارہ عازمین کو ہر طرح کی خدمات فراہم کر رہا ہے‘۔

    اُنہوں نے کہا کہ کسی بھی قسم کی شکایت کے ازالے کے لیے مستعد کمیٹی قائم کردی گئی ہے، ہم عازمین کے سفر کو یادگار اور خوشگوار بنانے کے لیے ہر ممکن کوشش کر رہے ہیں۔

    دوسری جانب سعودی عرب میں ادارہ امن عامہ نے کہا ہے کہ ’تمام اقسام کے وزٹ ویزے پر آنے والوں کے لیے مکہ میں رہنا غیرقانونی ہے۔ اب تک 20 ہزار سے زائد افراد کے خلاف کارروائی کی ہوچکی ہے۔

    سعودی خبررساں ایجنسی ’ایس پی اے‘ کے مطابق وزارت داخلہ کے جاری اعلامیے میں کہا گیا ہے کہ 15 ذوالقعدہ بمطابق 23 مئی 2024 سے 15 ذی الحجہ بمطابق 21 جون تک وزٹ ویزے پر آنے والوں کو مکہ میں رہنے کی اجازت نہیں۔

    جن افراد کے پاس وزٹ ویزا ہے انہیں چاہئے کہ وہ کسی دوسرے شہر منتقل ہوجائیں بصورت دیگر ان کے خلاف قانونی کارروائی کی جائیگی، خلاف ورزی کرنے والوں پر حج ضوابط کا اطلاق کیا جائے گا۔

    اب تک کتنے پاکستانی عازمین حج سعودی عرب پہنچ چکے؟

    واضح رہے کہ وزارت حج کی جانب سے جاری ضوابط کے تحت پرمٹ کے بغیر کسی کو مکہ میں جانے کی اجازت نہیں ہے۔

  • اب تک کتنے پاکستانی عازمین حج سعودی عرب پہنچ چکے؟

    اب تک کتنے پاکستانی عازمین حج سعودی عرب پہنچ چکے؟

    سعودی عرب میں پاکستانی عازمینِ حج کی آمد کا سلسلہ جاری ہے، مملکت میں حجاج کرام کو سہولیات فراہم کرنے کے لئے بہترین انتظامات کئے گئے ہیں۔

    سعودی خبر رساں ادارے کی رپورٹ کے مطابق پاکستان حج مشن اس سال 70 ہزار 105 سرکاری اور 80 ہزار سے زائد پرائیویٹ حجاج کرام کی میزبانی کرے گا۔

    ترجمان وزارت مذہبی امور کا اس حوالے سے کہنا ہے کہ اب تک 170 پروازوں سے 41 ہزار 477 سرکاری عازمین سعودی عرب پہنچ چکے ہیں۔ جبکہ مزید 28 ہزار 628 سرکاری عازمینِ حج اگلے دس دنوں میں مکہ مکرمہ پہنچ جائیں گے۔

    نجی حج اسکیم کے ذریعے ساڑھے 10 ہزار سے زائد عازمین سعودی عرب میں داخل ہوچکے ہیں، جبکہ یکم جون تک براہ راست مدینہ منورہ آنے والے تمام عازمینِ کرام مکہ مکرمہ پہنچ جائیں گے۔

    وزارت کے ترجمان کا اس حوالے سے کہنا ہے کہ موبائل ایپ پاک حج، دو ٹال فری ہیلپ لائنز اورچار واٹس ایپ نمبرز کے ذریعے عازمین حج کی شکایات کا ازالہ کیا جا رہا ہے۔

    عازمین حج کے لئے حرمین میں دو مرکزی اسپتال اور درجن بھر ڈسپنسریوں کے ذریعے 282 ڈاکٹر اور طبی عملہ امور انجام دے رہا ہے۔

    مکہ و مدینہ میں گذشتہ 20 دن میں 115 عازمین کو تلاش کر کے ان کی منزل تک پہنچایا گیا جبکہ عازمینِ حج کی سفری و رہائشی سہولتوں اور خوراک کی فراہمی کیلیے 390 معاونین امور انجام دے رہے ہیں۔

    پاکستان حج مشن کے مرکزی اسپتالوں میں جدید ایمبولینس، لیبارٹری، ایکسرے، الٹراساونڈ، ای سی جی اور دیگر سہولتیں موجود ہیں۔

    سعودی وزارت حج وعمرہ کا حجاج کرام کو اہم مشورہ؟

    خوراک کی 454، رہائش کی 1123 جبکہ ٹرانسپورٹ کی 264 شکایات کا ازالہ کیا گیا جبکہ 683 بیگز، پرس اور 160 ویل چیئرز تلاش کر کے مالکان کے حوالے کی گئی ہیں۔