ریاض: سعودی عرب میں مکہ مکرمہ اور مدینہ منورہ کے درمیان چلائی جانے والی حرمین ایکسپریس ٹرین کی استعداد میں اضافہ کیا جارہا ہے۔
اردو نیوز کے مطابق سعودی ریلوے کمپنی سار نے حرمین ایکسپریس ٹرینوں کی یومیہ تعداد بڑھا کر 126 کردی ہے جن میں 1.5 ملین سے زیادہ نشستیں مہیا ہوں گی۔
مکہ مکرمہ اور مدینہ منورہ کے لیے روزانہ 126 ٹرینیں چلائی جائیں گی، اس سے عازمین حج کو بڑی سہولت ہوگی۔
سعودی ریلوے کمپنی سار کے ڈپٹی ایگزیکٹو چیئرمین انجینیئر ریان الحربی نے کہا کہ اس سال حج سیزن کے دوران حرمین ایکسپریس ٹرین کی تمام آپریشنل اسکیمیں مکمل ہیں۔
حرمین ایکسپریس ٹرینوں کو بس سروس سے منسلک کیا گیا ہے، مکہ مکرمہ میں حرمین ایکسپریس ٹرین اسٹیشن سے عازمین کو مسجد الحرام براہ راست پہنچانے کا انتظام ہے۔
یاد رہے کہ رمضان کے دوران حرمین ایکسپریس سے 8 لاکھ سے زیادہ افراد نے سفر کیا، اوقات کی پابندی کا گراف 95 فیصد سے زیادہ رہا ہے۔
خیال رہے کہ حرمین ایکسپریس ٹرین دنیا کی دس تیز رفتار ٹرینوں میں سے ایک ہے۔
