Tag: حرکت قلب

ریاض: سعودی عرب میں عمرے کے دوران ایک زائر کی حرکت قلب بند ہوگئی جو اگلے 27 منٹ تک بند رہی، تاہم سعودی ڈاکٹرز نے ان کی جان بچا لی۔

اردو نیوز کے مطابق سعودی عرب میں ایک اسپتال کے طبی عملے نے دل کے عارضے میں مبتلا ہو جانے والے مصری عمرہ زائر کی زندگی بچالی۔

مصری عمرہ زائر کو دل کی حرکت 2 بار بند ہو جانے کے باوجود بچا لیا گیا، 32 سالہ زائر کے دل کی حرکت مجموعی طور پر 27 منٹ تک بند رہی۔ زائر سانس لینے میں شدید مشکل کے بعد بے ہوش ہوگیا تھا۔

مکہ مکرمہ ہیلتھ کمپلیکس کا کہنا ہے کہ مصری زائر کو امدادی ٹیم کے ذریعے پہلے حرم ایمرجنسی ہیلتھ سینٹر لایا گیا، اسی دوران اس کے دل کی حرکت بند ہو گئی۔ امدادی ٹیم نے 12 منٹ تک خصوصی امداد دے کر حرکت بحال کی۔

بعد ازاں مریض کو حرم ایمرجنسی سینٹر لے جایا گیا جہاں پہنچنے پر دوبارہ زائر کے دل کی حرکت بند ہوگئی، امدادی ٹیم نے 15 منٹ تک کارروائی کر کے الیکٹرک شاک کے ذریعے حرکت قلب بحال کی۔

معالجین کا کہنا ہے کہ مصری زائر کے مختلف ایکسرے کیے گئے اور مطلوبہ ٹیسٹ کروائے گئے جن سے پتہ چلا کہ ان کے دل کے عضلات میں مسئلہ ہے اور پھیپھڑوں میں شدید سوزش ہے۔

مریض کو مصنوعی تنفس فراہم کر کے انتہائی نگہداشت کے وارڈ میں داخل کیا گیا اور صحت میں بہتری آنے تک انہیں ایمرجنسی وارڈ میں رکھا گیا۔

معالجین کا کہنا ہے کہ تنفس میں ٹھہراؤ آجانے پر مصنوعی تنفس کی مشین ہٹا لی گئی تھی اور مکمل اطمینان ہونے پر زائر کو اسپتال سے فارغ کر دیا گیا۔