ARYNews.tv | Urdu – Har Lamha Bakhabar

Tag: حریت رہنما

  • ٹرمپ کی مسئلہ کشمیر حل کرنے کی پیشکش پر حریت رہنما کا اہم بیان

    ٹرمپ کی مسئلہ کشمیر حل کرنے کی پیشکش پر حریت رہنما کا اہم بیان

    اسلام آباد: حریت رہنما عبدالحمید لون نے کہا کہ امریکی صدر ٹرمپ کے مسئلہ کشمیر حل کرانے کے بیان کا خیر مقدم کرتے ہیں۔

    تفصیلات کے مطابق حریت رہنما عبدالحمید لون نے اپنے ایک بیان میں کہا کہ امریکی صدر مسئلہ کشمیر حل کرانے میں اپنا اثرور سوخ استعمال کریں۔

    انہوں نے کہا کہ مسئلہ کشمیر پاکستان اور بھارت کے درمیان ایٹمی فلیش پوائنٹ ہے، برصغیر میں امن کی بحالی اور ترقی کیلئے تنازع کشمیر کا حل ناگزیر ہے۔

    جنگ بندی کے بعد ڈونلڈ ٹرمپ نے پاکستان اور بھارت کو بڑی خوش خبری سنا دی

    واضح رہے کہ پاکستان اور بھارت کے درمیان جنگ بندی کے بعد امریکی صدر نے سوشل میڈیا پر جاری پیغام میں کہا تھا کہ پاکستان اوربھارت کے ساتھ مل کرکام کروں گا اور دیکھوں گا کیا ‘ہزاروں سال بعد’ مسئلہ کشمیر کا کوئی حل نکل سکتا ہے۔

    خیال رہے کہ بھارت کی جارحیت پر پاکستان نے منہ توڑ جواب دیا اور آپریشن بُنْيَان مَّرْصُوْص ( آہنی دیوار) کے دوران بھارت میں 10 سے زائد اہداف کو نشانہ بنایا۔

    دونوں ممالک کے درمیان کشیدگی کے پیش نظر امریکا کی جانب سے جنگ بندی کیلئے دونوں ممالک کو ایک میز پر لایا گیا۔

    اس حوالے سے اپنے سوشل میڈیا اکاؤنٹ پر امریکی صدر ڈونلڈ ٹرمپ نے  بیان جاری کرتے ہوئے کہا تھا کہ امریکا کی ثالثی میں بھارت اور پاکستان فوری جنگ بندی پر متفق ہوگئے ہیں۔

  • بزرگ کشمیری حریت رہنما پروفیسر نذیر شال انتقال کر گئے

    بزرگ کشمیری حریت رہنما پروفیسر نذیر شال انتقال کر گئے

    لندن: بزرگ کشمیری حریت رہنما پروفیسر نذیر شال لندن میں انتقال کر گئے۔

    تفصیلات کے مطابق بزرگ کشمیری حریت رہنما پروفیسر نذیر شال لندن میں انتقال کر گئے، پاکستان ہائی کمیشن لندن نے ان کے انتقال پر گہرے غم و رنج کا اظہار کیا ہے۔

    نذیر شال کی عمر 77 برس تھی، مرحوم کئی دہائیوں سے لندن میں مقیم تھے، مقبوضہ کشمیر سے تعلق رکھنے والے پروفیسر نذیر شال نے اپنی تمام زندگی کشمیر کی آزادی کی جدوجہد میں گزاری۔

    وہ کشمیر سینٹر لندن کے ایگزیکٹو ڈائریکٹر تھے، پاکستان ہائی کمیشن لندن نے پروفیسر نذیر احمد شال کی وفات پر گہرے غم و رنج کا اظہارکیا، ٹویٹ میں مزید کہا گیا کہ پروفیسر نذیر احمد شال کشمیریوں کے حق خود ارادیت کی جدو جہد کے حقیقی رہنما تھے، اور پاکستان ہائی کمیشن ان کے خاندان کے ساتھ سوگ میں برابر کا شریک ہے۔

  • وزیراعظم کا اقوام متحدہ میں خطاب، حریت رہنما نے بڑا مطالبہ کردیا

    وزیراعظم کا اقوام متحدہ میں خطاب، حریت رہنما نے بڑا مطالبہ کردیا

    سری نگر: حریت رہنما عبدالحمیدلون مطالبہ کیا ہے کہ وزیراعظم یواین میں خطاب کے دوران مسئلہ کشمیر کو اجاگر کریں۔

    تفصیلات کے مطابق حریت رہنما عبدالحمیدلون کی جانب سے بیان میں کہا گیا ہے کہ وزیراعظم یواین میں خطاب کے دوران مسئلہ کشمیرکواجاگرکریں اور مقبوضہ کشمیرکی صورتحال پراقوام عالم سےمداخلت کی اپیل کریں۔

    حریت رہنما کا کہنا تھا کہ کشمیر میں مسلم تشخص کو ہندوتوا میں بدلنے کی سازش خطرناک ہوچکی ہے، علمائے دین اور مبلغین کی گرفتاری سے بھارتی سازش بےنقاب ہوچکی۔

    عبدالحمیدلون نے کہا کہ مقبوضہ کشمیرکےاسکولوں میں ہندوتواایجنڈےپرکام تیزی سےشروع ہوگیا اور مسلم اکثریت کو”گھرواپسی” کا ہندوتوا ایجنڈا بھی سامنے آچکا۔

    ان کا کہنا تھا کہ مقبوضہ کشمیر میں مسلمانوں کو زبردستی ہندؤ بنانے کا گھناؤنا کھیل جاری ہے، سری نگر کی سب سے بڑی مسجد 3 سال سےعبادت کیلئے بند پڑی ہے۔

    حریت رہنما نے بتایا کہ درگاہ حضرت بل کوہندؤشرائن بورڈکےسپردِکرنےکی سازش ہورہی ہے، وادی میں قابض افواج کی زیرنگرانی 50 ہزار مندر بھی تعمیرکیے جارہے ہیں۔

    عبدالحمیدلون کا مزید کہنا تھا کہ مقبوضہ کشمیرمیں مسلمانوں کاتشخص اورشناخت مکمل طورپرختم کی جارہی ہے۔

    انھوں نے مطالبہ کیا کہ حکومت پاکستان مقبوضہ کشمیرکی حساسیت پرٹھوس اقدامات کرے اور او آئی سی کا اجلاس بلانے کا مطالبہ کرتے ہیں۔

  • وزیر اعظم اور صدر مملکت کا بھارتی غیر قانونی حراست میں کشمیری رہنما کے انتقال پر گہرے صدمے کا اظہار

    وزیر اعظم اور صدر مملکت کا بھارتی غیر قانونی حراست میں کشمیری رہنما کے انتقال پر گہرے صدمے کا اظہار

    اسلام آباد: وزیر اعظم عمران خان اور صدر مملکت عارف علوی نے بھارتی غیر قانونی حراست میں کشمیری رہنما اشرف صحرائی کے انتقال پر گہرے صدمے کا اظہار کیا ہے۔

    تفصیلات کے مطابق گزشتہ روز مقبوضہ کشمیر کی آزادی کے داعی اور حریت رہنما محمد اشرف صحرائی بھارتی قید میں 77 برس کی عمر انتقال کر گئے ہیں، وہ جموں کورٹ بلوال جیل میں اسیر تھے اور انھیں علاج معالجے کی سہولت بھی دستیاب نہیں تھی۔

    وزیر اعظم عمران خان نے ٹوئٹ میں بھارتی غیر قانونی حراست میں کشمیری رہنما کے انتقال پر دکھ کا اظہار کرتے ہوئے لکھا مقبوضہ کشمیر میں بھارتی تسلط عالمی برادری کے ضمیر پر دھبہ ہے، ہم کشمیریوں کے حق خود ارادیت کی حمایت جاری رکھیں گے، یو این قراردادوں کے مطابق کشمیریوں کو حق خود ارادیت ملنا چاہیے۔

    حریت رہنما محمد اشرف صحرائی کا بھارتی جیل میں انتقال

    صدر مملکت ڈاکٹر عارف علوی نے حریت رہنما محمد اشرف صحرائی کی وفات پر گہرے دکھ اور صدمے کا اظہار کرتے ہوئے اپنے بیان میں کہا کہ مرحوم نے کشمیر کے حق خود ارادیت کی جدوجہد میں گراں قدر خدمات سر انجام دیں، بھارت حریت قیادت کو قید میں رکھ کر آزادی کے جذبے کو دبا نہیں سکتا۔

    حریت رہنما کی بھارتی جیل میں شہادت پر پاکستان کا ردعمل آگیا

    انھوں نے کہا بھارت کی ریاستی دہشت گردی کے خلاف اشرف صحرائی کی جدوجہد کو یاد رکھا جائے گا، صدر مملکت نے جدوجہد آزادئ کشمیر کے لیے مرحوم کی خدمات کو زبردست خراجِ تحسین پیش کیا، اور مطالبہ کیا کہ بھارت قید حریت قیادت اور بےگناہ کشمیریوں کو فی الفور رہا کرے۔

    صدر مملکت نے اقوام متحدہ اور بین الاقوامی قیادت سے مطالبہ کیا کہ کشمیر میں انسانی حقوق کی سنگین خلاف ورزیوں کا نوٹس لیا جائے، بین الاقوامی برادری کشمیر سے متعلق اپنے وعدوں اور ذمہ داریوں کو پورا کرے، دریں اثنا، صدر مملکت نے مرحوم کی درجات کی بلندی اور اہل خانہ کے لیے صبرِ جمیل کی دعا بھی کی۔

  • 27 اکتوبر تحریک حق خود ارادیت کی تاریخ کا سیاہ ترین دن ہے: مشال ملک

    27 اکتوبر تحریک حق خود ارادیت کی تاریخ کا سیاہ ترین دن ہے: مشال ملک

    اسلام آباد: کشمیری حریت رہنما یاسین ملک کی اہلیہ مشال ملک کا کہنا ہے کہ بھارتی فورسز کشمیریوں کو قتل، قید اور ان کی املاک تباہ کر رہی ہے۔ 27 اکتوبر تحریک حق خود ارادیت کی تاریخ کا سیاہ ترین دن ہے۔

    تفصیلات کے مطابق کشمیری حریت رہنما یاسین ملک کی اہلیہ مشال ملک کا کہنا ہے کہ 27 اکتوبر تحریک حق خود ارادیت کی تاریخ کا سیاہ ترین دن ہے، بھارتی فوج نے 70 سال سے کشمیر میں لاشوں کا انبار لگا رکھا ہے۔

    مشال ملک کا کہنا تھا کہ بھارتی فورسز کشمیریوں کو قتل اور قید اور ان کی املاک تباہ کر رہی ہے، کشمیریوں پر ظلم و ستم کا سلسلہ کب تک چلے گا؟ بہت جلد بھارت اور دنیا کشمیریوں سے ہار جائے گی۔

    انہوں نے کہا کہ بہت جلد کشمیریوں کی قربانیاں رنگ لائیں گی اور مقبوضہ کشمیر آزاد ہوگا۔

    خیال رہے کہ پاکستان سمیت دنیا بھر میں مقبوضہ کشمیر پر غاصبانہ بھارتی قبضے کے خلاف پاکستانی و کشمیری آج یوم سیاہ منا رہے ہیں جس کا مقصد عالمی برادری کی توجہ مقبوضہ کشمیر کی طرف مبذول کروانا ہے۔

    اس موقع پر وزیر اعظم عمران خان نے اپنے پیغام میں کہا ہے کہ ہم یہ دن بھارتی غیر قانونی قبضے کی مذمت کے لیے منا رہے ہیں، آج کے دن ہم کشمیری عوام کی مکمل حمایت کا اعادہ کرتے ہیں۔

    انہوں نے کہا کہ یوم یکجہتی کشمیر انسانی تاریخ کے تاریک باب کو اجاگرکرتا ہے، 73 سال پہلے بھارتی فورسز نے جموں و کشمیر پر زبردستی قبضہ کیا، جموں و کشمیر پر بھارت کا غیر قانونی قبضہ بین الاقوامی تنازعہ ہے۔

  • آج کی جدوجہد اور مزاحمت کل آزادی لائے گی: علی گیلانی

    آج کی جدوجہد اور مزاحمت کل آزادی لائے گی: علی گیلانی

    سری نگر: کل جماعتی حریت کانفرنس کے سربراہ سید علی گیلانی نے کہا ہے کہ آج کی جدوجہد اور مزاحمت کل جموں و کشمیر میں آزادی لائے گی۔

    تفصیلات کے مطابق بزرگ حریت رہنما علی گیلانی نے کہا ہے کہ مقبوضہ کشمیر میں بھارت کی حیثیت قابض اور جارح کی ہے، اقوام متحدہ کی قراردادیں اس بات کا ثبوت ہیں، آج کی جدوجہد اور مزاحمت کل آزادی لائے گی۔

    سید علی گیلانی کا کہنا تھا کہ بھارتی فوج کشمیر کی سیکڑوں ایکڑ زمین پر قبضہ کر چکی ہے، بھارتی فورسز کے مظالم کے خلاف کشمیریوں کی جدوجہد جاری رہے گی۔

    یہ بھی پڑھیں:  مقبوضہ کشمیر میں غاصبانہ فوجی محاصرہ

    خیال رہے کہ آج مقبوضہ کشمیر میں لاک ڈاؤن اور پابندیوں کا 141 واں دن ہے، کشمیر میڈیا سروس کے مطابق مسلسل محاصرے سے کشمیری بنیادی ضروریات کی اشیا سے محروم ہیں، مقبوضہ وادی میں موبائل اور انٹرنیٹ سروس بھی بدستور بند ہے جب کہ کاروباری مراکز، تعلیمی ادارے بند اور ٹرانسپورٹ معطل ہے۔

    کشمیر میڈیا سروس کے مطابق چند دن قبل حریت رہنماؤں میر واعظ عمر فاروق اور سید علی گیلانی کو 21 سال پرانے جعلی مقدمے میں طلب کیا گیا، میر واعظ اور علی گیلانی کو مسلسل نظر بند رکھا جا رہا ہے جب کہ یاسین ملک قید ہیں۔

    بھارتی فورسز کی جانب سے مختلف علاقوں میں نام نہاد سرچ آپریشن اور محاصرے کے دوران کشمیریوں کے قتل عام کا سلسلہ بھی جاری ہے۔

  • بھارتیوں کا یاسین ملک کو قتل کرنے کا منصوبہ ہے: مشال ملک

    بھارتیوں کا یاسین ملک کو قتل کرنے کا منصوبہ ہے: مشال ملک

    اسلام آباد: حریت رہنما یاسین ملک کی اہلیہ مشال ملک کا کہنا ہے کہ یاسین ملک کو ڈیتھ سیل میں رکھا گیا ہے، بھارتیوں کا یاسین ملک کو قتل کرنے کا منصوبہ ہے۔

    تفصیلات کے مطابق حریت رہنما یاسین ملک کی اہلیہ مشال ملک کا کہنا ہے کہ بھارتی وزیر اعظم نریندر مودی کشمیر میں خون کا پیاسا بنا ہوا ہے، اس وقت جو کشمیر میں ہو رہا ہے تاریخ ہمیشہ یاد رکھے گی۔

    مشال ملک کا کہنا تھا کہ مقبوضہ کشمیر میں مسلسل چوتھے مہینے سے کرفیو ہے، بھارتی فورسز کشمیر میں ہر طرح کا ہتھیار استعمال کر رہی ہے۔

    انہوں نے مزید کہا کہ یاسین ملک کو بھی ڈیتھ سیل میں رکھا گیا ہے، بھارتیوں کا یاسین ملک کو قتل کرنے کا منصوبہ ہے۔

    اس سے قبل ایک موقع پر مشال ملک نے کہا تھا کہ بھارت کو بروقت لگام نہ ڈالی گئی تو اس کا اگلا قدم آزاد کشمیر کی جانب ہوگا۔

    انہوں نے کہا تھا کہ مقبوضہ کشمیر میں 4 ماہ سے جاری کرفیو میں ظلم و بربریت کی نئی داستانیں رقم کی گئی ہیں، کشمیری تاریخ کے بدترین دور سے گذر رہے ہیں۔

    مشال ملک کا کہنا تھا کہ حریت قائدین سمیت 15 ہزار سے زائد کشمیریوں کو گرفتار کر کے بھارت کی مختلف جیلوں میں رکھا گیا ہے، مقبوضہ وادی میں اشیائے خورد و نوش اور ادویات کی شدید قلت سے زندگی مفلوج ہو کر رہ گئی ہے۔

  • کشمیریوں پر مظالم کے تمام حربے آزمانے کے باوجود بھارت ناکام ہے، مشعال ملک

    کشمیریوں پر مظالم کے تمام حربے آزمانے کے باوجود بھارت ناکام ہے، مشعال ملک

    اسلام آباد: حریت رہنما یاسین ملک کی اہلیہ مشعال ملک نے کہا ہے کہ کشمیریوں پر مظالم کے تمام حربے آزمانے کے باوجود بھارت ناکام ہے۔

    تفصیلات کے مطابق حریت رہنما یاسین ملک کی اہلیہ مشعال ملک نے کشمیر یکجہتی ریلی کے شرکا سے خطاب کرتے ہوئے کہا کہ مقبوضہ کشمیر کی صورت حال ابتر ہوتی جارہی ہے، کرفیو کے باعث کشمیر میں لوگ بھوکے مررہے ہیں۔

    مشعال ملک نے کہا کہ مقبوضہ کشمیر کے بازار بند، لوگ گھروں میں محصور ہیں، کشمیر میں ہر گھر کے باہر بھارتی فوجی تعینات ہے، بھارت نے کرفیو سے کشمیریوں کا عزم توڑنے کی کوشش کی ہے۔

    انہوں نے کہا کہ یاسین ملک، سید علی گیلانی جیسے لیڈر رکھنے والی کشمیری قوم خوش قسمت ہے، قید وبند کاٹنے کے باوجود حریت قائدین کے حوصلے پست نہیں ہوئے، پاکستانی قوم کو موجودہ حالات میں کشمیریوں کا حوصلہ بڑھانا ہوگا۔

    مزید پڑھیں: مقبوضہ کشمیر میں کرفیو کا 53 واں روز

    مشعال ملک نے کہا کہ کشمیر کی آزادی کے لیے کشمیریوں کے شانہ بشانہ کھڑا ہونا پڑے گا، کشمیری دنیا کی بہادر ترین قوم ہے، دنیا کی کوئی طاقت آج تک کشمیریوں کو ڈرا نہیں سکی ہے۔

    انہوں نے کہا کہ کشمیری بھارت سے آزادی چاہتے ہیں، دنیا کو کشمیریوں کا فیصلہ تسلیم کرنا پڑے گا، بھارت یاسین ملک کو کشمیریوں سے جوڑنے کی سزا دے رہا ہے۔

    مشعال ملک نے کہا کہ بھارت آئندہ ماہ کشمیری قیادت کے خلاف ٹرائل کرنے جارہا ہے، اقوام متحدہ و عالمی برادری کو کشمیر کی صورت حال کا نوٹس لینا چاہئے۔

  • "تہاڑ جیل میں یاسین ملک کو قید تنہائی میں رکھا گیا ہے، صحت تیزی سے گر رہی ہے”

    "تہاڑ جیل میں یاسین ملک کو قید تنہائی میں رکھا گیا ہے، صحت تیزی سے گر رہی ہے”

    سری نگر: یاسین ملک کے ترجمان رفیق ڈار نے کہا ہے کہ تہاڑ جیل میں قید حریت رہنما کی صحت تیزی سے گر رہی ہے.

    ان خیالات کا اظہار انھوں‌ نے حریت رہنما کی صحت سے متعلق اپنے بیان میں کیا. ان کا کہنا تھا کہ یاسین ملک دل اور گردوں کے عارضے میں مبتلا ہیں.

    قید تنہائی میں یاسین ملک کو متعدد امراض لاحق ہو گئے ہیں، انھیں جیل میں بنیادی سہولتوں سے محروم رکھا جا رہا ہے.

    رفیق ڈار کے مطابق جیل انتظامیہ یاسین ملک کوطبی سہولتوں فراہم نہیں کر رہی، پس و پیش سے کام لیا جا رہا ہے. یاسین ملک کی زندگی کوشدید خطرات لاحق ہیں، بھارتی حکومت جان بوجھ کر یاسین ملک کو اسپتال منتقل نہیں کر رہی.

    مزید پڑھیں: یاسین ملک کو ڈیتھ سیل میں رکھا ہوا ہے، زندگی کو سخت خطرات لاحق ہیں، مشعال ملک

    خیال رہے کہ حریت رہنما یاسین ملک کی بیٹی رضیہ سلطانہ نے گزشتہ روز اپنی والدہ مشعال ملک کے ساتھ پریس کانفرنس کرتے ہوئے عالمی برادری سےسوال کیا تھا کہ کشمیری تیس دن سےکرفیو میں ہیں، انھیں مدد کی ضرورت ہے، کیا آپ کشمیریوں کی اس مشکل وقت میں مدد کریں گے یا نہیں۔

    حریت رہنما کی بیٹی نے عالمی برادری اورانسانی حقوق تنظیموں کے لئے پیغام میں کہا ہے کہ کشمیر میں اشیائے خورونوش کی قلت ہے، مقبوضہ کشمیرکوجیل میں بدل دیا گیا، بچےاسکول نہیں جارہے، کشمیریوں کی اس مشکل وقت میں مدد کی جائے.

  • دلی میں قید یاسین ملک کی بگڑتی صحت پر تشویش ہے: میر واعظ کا ٹویٹ

    دلی میں قید یاسین ملک کی بگڑتی صحت پر تشویش ہے: میر واعظ کا ٹویٹ

    سری نگر: حریت رہنما میر واعظ عمر فاروق نے کہا ہے کہ بھارت نے یاسین ملک کو غیر قانونی حراست میں رکھا ہوا ہے، ان کی روز بہ روز بگڑتی صحت پر انھیں تشویش ہے۔

    تفصیلات کے مطابق میر واعظ عمر فاروق نے ٹویٹ کرتے ہوئے کہا دلی میں قید یاسین ملک کی بگڑتی صحت پر تشویش ہے، یاسین ملک کو دلی کے تہاڑ جیل میں محبوس رکھا گیا ہے۔

    حریت پسند کشمیری رہنما نے ایک بار پھر مطالبہ کیا کہ بھارت یاسین ملک کو فوراً مناسب طبی سہولتیں فراہم کرے۔

    ان کا کہنا تھا کہ بھارت نے حریت رہنماؤں اور نوجوانوں کو انتقاماً حراست میں رکھا ہوا ہے، بھارت یاسین ملک کو غیر قانونی حراست سے رہا کرے۔

    یہ بھی پڑھیں:  مقبوضہ کشمیرمیں بھارتی فوج کی فائرنگ، کشمیری نوجوان شہید

    واضح رہے کہ مقبوضہ وادی میں بھارتی فورسز کی جانب سے مظالم کا سلسلہ جاری ہے، آج بارہ مولہ میں قابض فورسز نے فائرنگ کر کے ایک کشمیری نہتے نوجوان کو زندگی سے محروم جب کہ ایک زخمی کو گرفتار کر لیا۔

    کشمیری میڈیا کے مطابق بھارتی فورسز نے علاقے میں دہشت گردی کے بعد غیر اعلانیہ کرفیو بھی نافذ کیا، اور حسب معمول انٹرنیٹ اور موبائل فون سروس بھی بند کی گئی۔

    انڈین فوجیوں نے علاقے میں گھر گھر تلاشی بھی لی، اور اس بہانے خواتین اور بچوں کو گھروں سے نکال دیا۔

    یاد رہے کہ مقبوضہ کشمیر میں بھارتی فوجیوں نے ریاستی دہشت گردی کی جاری کارروائیوں کے دوران گزشتہ ماہ جون میں 28 کشمیریوں کو شہید کیا تھا۔