اسلام آباد : حریت رہنما یاسین ملک کی اہلیہ مشعال ملک نے کہا ہے کہ سرینگر میں جی 20 اجلاس کے حوالے سے عوام سے اپیل کی ہے۔
حریت رہنما یاسین ملک کی اہلیہ مشعال ملک نے کہا ہے کہ آج جی 20 کا سمٹ ہو رہا ہے، دنیا کو یہ پیغام دیں کشمیری قوم جی 20 ممالک کا بائیکاٹ کرتی ہے۔
مشعال ملک نے کہا کہ 22 مئی کو دوپہر ڈھائی بجے زیرو پوائنٹ اسلام آباد سے نیشنل پریس کلب کی طرف بڑھیں، راولپنڈی اسلام آباد کے عوام سڑکوں پر نکلیں۔
مشعال ملک نے کہا کہ کشمیری عوام کبھی بھی اپنے وطن کو مودی سرکار کے حوالے نہیں کرے گی۔
سری نگر میں جی 20 اجلاس آج سے شروع ہوگا، کنٹرول لائن کے دونوں جانب مکمل ہڑتال
واضح رہے کہ مقبوضہ کشمیر کے شہر سری نگر میں جی 20 اجلاس آج سے شروع ہوگا، اجلاس میں چین نے شرکت سے صاف انکار کر دیا ہے، جب کہ ترکیہ اور سعودی عرب کی جانب سے بھی اجلاس میں شرکت نہ کرنے کا امکان ہے کیوں کہ ان کی جانب سے شرکت کی تصدیق نہیں کی گئی ہے، مصر نے بطور مہمان اجلاس میں آنے کی رجسٹریشن نہیں کرائی۔
دوسری جانب جی ٹوئنٹی اجلاس کے خلاف دنیا کے بڑے بڑے شہروں میں احتجاجی مظاہرے اور ریلیوں کا انعقاد کیا جائے گا، احتجاج کرنے والے رہنماؤں کا کہنا ہے کہ قابض بھارتی فوج نے مقبوضہ وادی کو فوجی چھاؤنی میں تبدیل کر دیا ہے، مقبوضہ وادی میں گرفتاریاں، خواتین اور بچوں کو ہراساں کرنا معمول بن چکا ہے۔
