Tag: حسن روحانی

تہران: کرونا وائرس کی وبا کے خلاف تعاون کے سلسلے میں ایرانی صدر حسن روحانی نے روسی صدر ولادی میر پیوٹن کو فون کر کے عالمی تعاون کی اہمیت پر گفتگو کی۔

تفصیلات کے مطابق ایرانی صدر حسن روحانی نے ٹویٹ کے ذریعے بتایا کہ انھوں نے اپنے روسی ہم منصب کو ٹیلی فون کیا تھا، اس گفتگو میں دونوں رہنماؤں نے کرونا کے خلاف عالمی تعاون کی اہمیت پر زور دیا۔

رہنماؤں نے اس امر پر اتفاق کیا کہ امریکا کے غیر قانونی رویوں پر یورپی یونین کو رد عمل دینا ہوگا، ایرانی صدر کا کہنا تھا کہ ایران کے لیے آئی ایم ایف قرض کو امریکا کے ویٹو کرنے کا اقدام غیر قانونی ہے۔

آئی ایم ایف نے 25 کرونا متاثرہ ممالک کے لیے قرضوں میں ریلیف کا اعلان کر دیا

ایرانی صدر کا کہنا تھا کہ روسی صدر کے ساتھ ٹیلی فونک گفتگو میں تہران اور ماسکو نے معاہدوں پر عمل درآمد پر بھی اتفاق کیا۔

واضح رہے کہ ایران میں کو وِڈ نائنٹین کے باعث اب تک 5,297 افراد جاں بحق ہو چکے ہیں جب کہ وائرس نے 84 ہزار سے زائد افراد کو متاثر کیا، جن میں سے اب 61 ہزار مریض صحت یاب ہو چکے ہیں۔ تاہم ابتدا میں ایران میں کرونا وائرس نہایت قاتل ثابت ہوا تھا، اور کئی حکومتی اہم شخصیات بھی اس کی زد میں آ کر زندگی سے ہاتھ دھو چکی ہیں۔

کرونا وبا سے نمٹنے کے لیے حکومتوں کی مدد کے لیے بین الاقوامی مالیاتی ادارے (آئی ایم ایف) نے متاثرہ ممالک کے لیے قرضوں میں ریلیف کا اعلان کر دیا تھا، یہ ریلیف 25 ممالک کے لیے تھا، ان میں افغانستان، برکینافاسو، سینٹرل افریقن ریپبلک، چاڈ، کوموروس، کانگو، گیمبیا، لائبیریا، مڈغاسکر، موزمبیق، جزائر سلیمان، تاجکستان، یمن، نیپال اور ہیٹی بھی شامل ہیں۔

تہران: ایران کے صدر حسن روحانی نے امریکا کی جانب سے عائد پابندیوں پر کہا ہے کہ امریکا نے ایران سے معافی مانگنے کا تاریخی موقع گنوا دیا ہے۔

غیر ملکی میڈیا کے مطابق ایرانی صدر حسن روحانی نے کہا کہ امریکی پابندیاں کرونا وائرس کے خلاف ایرانی کوششوں کو نقصان نہیں پہنچا سکیں، امریکا نے ایران پر عائد پابندیاں اٹھانے اور معافی مانگنے کا تاریخی موقع گنوا دیا۔

حسن روحانی نے کہا کہ پابندیوں کے باوجود تہران کی وائرس کے خلاف مہم متاثر نہیں ہوئی ہے۔ انھوں نے کابینہ ویڈیو میٹنگ میں کہا کہ کرونا کی وبا امریکیوں کے لیے ایک اہم موقع تھا کہ وہ معافی مانگتے، اور ایران پر سے غیر منصفانہ پابندیاں ہٹائی جاتیں، انھیں چاہیے تھا کہ ایرانیوں کو باور کراتے کہ وہ ان کے خلاف نہیں ہیں۔

کرونا سے نبرد آزما ایران پر امریکا نے مزید پابندیاں لگادیں

خیال رہے کہ کرونا وائرس سے اموات کی تعداد کے لحاظ ایران دنیا میں چھٹے نمبر پر آ چکا ہے، جہاں وائرس سے 3,036 افراد جاں بحق ہو چکے ہیں، جب کہ 47,593 افراد وائرس سے متاثر ہوئے۔ گزشتہ چوبیس گھنٹوں میں 136 افراد جانوں سے ہاتھ دھو بیٹھے ہیں۔ دوسری طرف تشویش ناک امر یہ ہے کہ 3,800 ایسے مریض ہیں جن کی حالت نازک قرار دی جا رہی ہے۔

ادھر امریکا کرونا وائرس کے مجموعی کیسز کے لحاظ سے دنیا کا نمبر ایک ملک بن چکا ہے، جب کہ اموات کے لحاظ سے تیسرا ملک بن چکا ہے۔ امریکا میں کرونا وائرس سے اب تک 4,059 افراد ہلاک، جب کہ 188,639 افراد متاثر ہوئے ہیں۔ 4,576 ایسے مریض ہیں جن کی حالت تشویش ناک ہے۔