تہران: ایران میں 12 ویں صدارتی انتخاب میں موجودہ صدر حسن روحانی کی فتح کا اعلان کردیا گیا۔ وہ 58.6 فیصد ووٹ لے کر دوبارہ صدر منتخب ہوگئے۔

ایران کے سرکاری ٹی وی کے مطابق حسن روحانی نے اپنے حریف ابراہیم رئیسی پر واضح برتری حاصل کی جنہیں 39.8 فیصد ووٹ ملے۔

حسن روحانی کی برتری ووٹوں کی گنتی کے چند گھنٹوں بعد ہی سامنے آگئی تھی جب انہوں نے قریباً ڈیڑھ لاکھ ووٹ حاصل کیے تھے۔ ان کے حامیوں اور حکومتی عہدیداران کو بھی ان کی فتح کا یقین ہوگیا تھا۔

دوسری جانب صدارتی امیدوار ابراہیم رئیسی بھی انتخابات کے نتائج تسلیم کرنے کا عندیہ دے چکے تھے۔

ووٹنگ ٹرن آؤٹ 70 فیصد

ایران میں 12 ویں صدر کے انتخاب کے لیے مجموعی طور پر ووٹنگ ٹرن آؤٹ بہتر رہا اور خواتین اور بزرگوں سمیت نوجوان افراد نے بھی اپنا حق رائے دہی استعمال کیا۔

ایرانی وزارت داخلہ کے مطابق ایران میں 4 کروڑ لوگوں نے اپنا حق رائے دہی استعمال کیا جن میں خواتین بھی شامل ہیں۔

صدارتی انتخاب کے لیے پہلا ووٹ سپریم لیڈر آیت اللہ خامنہ ای کی جانب سے کاسٹ کیا گیا جس کے بعد پولنگ کا باقاعدہ آغاز ہوگیا۔

پولنگ کا آغاز مقامی وقت کے مطابق صبح 8 بجے ہوا جو بلاتعطل شام 6 بجے تک جاری رہا۔ بعد ازاں پولنگ کے وقت میں 4 گھنٹے کا اضافہ کردیا گیا۔

صدارتی انتخابات کے لیے ملک بھر میں 63 ہزار پولنگ اسٹیشنز بنائے گئے۔

اس موقع پر سخت سیکیورٹی انتظامات کیے گئے اور ملک بھر میں 3 لاکھ سے زائد سیکورٹی اہلکار تعینات کیے گئے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔