اسلام آباد : پیپلزپارٹی رہنما ندیم افضل چن نے شریف فیملی کو خبردار کیا کہ ہمیں قیادت نہ روکے تو سارا کچا چٹھا کھول کر رکھ دیں۔
تفصیلات کے مطابق شریف فیملی کی جانب سے حسن نواز کے دیوالیہ پن کو بھٹو دور سے جوڑنے پر پی پی رہنما پھٹ پڑے۔
رہنما پیپلزپارٹی ندیم افضل چن نے سماجی رابطے کی ویب سائٹ ایکس پر پیغام میں کہا کہ شریف خاندان کا دیوالیہ ہونے پر بھٹو دور کو زیر بحث لانا درست نہیں، دیوالیہ آپ آج ہورہے ہیں اوروہ بھی برطانیہ میں،بھٹو دور کہاں سےبیچ میں آ گیا؟
ندیم افضل چن کا کہنا تھا کہ جوکرتوت یہاں پر ہیں وہی وہاں پر بھی، کچھ تو شرم حیا کریں، ہمیں قیادت نہ روکے تو سارا کچا چٹھا کھول کر رکھ دیں۔
مزید پڑھیں : حسن نواز کی کمپنی کو دیوالیہ قرار دینے پر شریف خاندان کا ردعمل آگیا
یاد رہے حسن نواز کو برطانیہ میں دیوالیہ قرار دینے پر شریف فیملی کا ردعمل سامنے آیا، ترجمان نے کہا تھا کہ کمپنیوں کے دیوالیہ ہونے کے عرصے کے دوران ٹیکس نہیں دیا جاتا، برطانوی عدالت نے حسن نواز کے موقف کو درست قراردیا۔
ترجمان کا کہنا تھا کہ سیاسی بنیاد پر سزا دینےکےلیے شریف خاندان کے کاروبار کو چار بار دیوالیہ کرایاجاچکا ہے، شریف خاندان کے لیے یکے بعد دیگرے آنے والے ایسے اتار چڑھاؤ کوئی نئی بات نہیں۔
ترجمان نے مزید کہا تھا کہ پہلی بار انیس سو باہتر میں ذوالفقار علی بھٹو نے صنعتوں کو نیشنلائز کیا تو شریف خاندان کا کاروبار بھی شامل تھا پرویز مشرف کےدور میں شریف خاندان کے گھروں پر قبضہ اور فیکٹریاں سیل کر دیں گئیں پھر ثاقب نثاراینڈ کمپنی نے بھی اپنے دور میں یہی ظلم دہرایا اور شریف فیملی کی انڈسٹری کو تباہ کردیا۔
