سکھر: سندھ کے شہر سکھر میں حسینی روڈ پر مہندم ہونے والی تین منزلہ رہایشی عمارت کے ملبے سے مزید 2 لاشیں نکال لی گئیں، ملبے تلے جاں بحق ہونے والوں کی تعداد 8 ہو گئی ہے۔
تفصیلات کے مطابق حسینی روڈ سکھر پر زمین بوس عمارت کے ملبے سے آج مزید دو لاشیں نکال لی گئیں، جن میں سے ایک لاش کی شناخت صبا زوجہ محمد علی کے نام سے ہوئی ہے، ریسکیو ذرایع کا کہنا ہے کہ میتیں غسل اور کفن کے بعد لواحقین کے سپرد کر دی گئیں ہیں۔
سکھر میں رونما ہونے والے اس افسوس ناک واقعے میں جاں بحق افراد کی تعداد اب 8 ہو گئی ہے، پاک فوج اور متعلقہ ادارے امدادی کارروائیوں میں بدستور مصروف ہیں، آج جاں بحق 6 افراد کی اجتماعی نماز جنازہ بھی میونسپل اسٹیڈیم میں ادا کر دی گئی ہے، ان افراد کو آبائی قبرستان نواں گوٹھ میں سپرد خاک کیا جائے گا۔
ریسکیو ذرایع کا کہنا ہے کہ عمارت گرنے سے زخمی ہونے والے 18 افراد کی حالت خطرے سے باہر ہے۔
سکھر: منہدم رہایشی عمارت کے ملبے سے مزید 3 لاشیں نکال لی گئیں
خیال رہے کہ تین دن قبل سکھر کے گنجان آباد علاقے حسینی روڈ پر واقع تین منزلہ رہایشی عمارت اچانک گر گئی تھی، بلڈنگ میں ایک ہی خاندان کے کئی گھرانے رہایش پذیر تھے، عمارت کے گراؤنڈ فلور پر الماری کی 2 دوکانیں بھی تھیں جس میں موجود افراد بھی عمارت کے منہدم ہونے کی صورت میں ملبے تلے دب گئے تھے۔
شہریوں نے اپنی مدد آپ کے تحت فوری طور پر چار افراد کو زخمی حالت میں نکال کر سول اسپتال سکھر منتقل کیا تھا جب کہ ضلعی انتظامیہ کے پاس بھاری مشینری نہ ہونے کے باعث ریسکیو کے کام میں شدید مشکلات کا سامنا رہا، جس پر ڈی سی سکھر کو فوج طلب کرنی پڑی۔
