کراچی : برطانیہ کی سیکیورٹی ٹیم نے کراچی ایئرپورٹ پر کیے جانے والے حفاظتی انتظامات پر اطمینان کا اظہار کیا ہے، ٹیم کو سی اے اے حکام نے بریفنگ دی۔
تفصیلات کے مطابق برطانوی جوائنٹ ایوی ایشن سیکیورٹی ٹیم نے کراچی ایئرپورٹ کا دورہ کیا، اس موقع پر برطانوی ٹیم نے نئی ایوی ایشن پالیسی اور ایئر پورٹس پر سیکیورٹی سے متعلق امور کا جائزہ لیا۔
سول ایوی ایشن اتھارٹی اور اے ایس ایف نے برطانوی ٹیم کو سیکیورٹی کنٹرول، بنیادی سیکیورٹی، مسافروں اور سامان کی اسکروٹنی کے متعلق بریفنگ دی۔
برطانوی ڈی ٹی ایف ٹیم کو ایئرپورٹس کے دورے کے دوران جہاز ، عملے اور ان کے سامان کی ہونے والی سرچنگ سے متعلق بریفنگ دی گئی۔
اس کے علاوہ سول ایوی ایشن اتھارٹی کی جانب سے برطانوی ٹیم کو طیاروں کی ایئروردنیس، ان کی چیکنگ، کارگو اور فلائٹ کیٹرنگ سروسز کا بھی دورہ کرایا گیا،۔
برطانوی ٹیم نے سول ایوی ایشن اور اے ایس ایف کی کارکردگی کو سراہا اور پاکستان سے برطانیہ آنے والی پروازوں اور ان کے مسافروں کی اسکریننگ کے مرحلے پر ٹیم نے اظہار اطمینان کیا۔
