Tag: حقیقی آزادی مارچ

فیصل آباد : پاکستان تحریک انصاف کے رہنما فرخ حبیب نے کہا ہے کہ عمران خان فیصلہ کریں گے کہ دھرنا دینا ہے یا جلسہ ہوگا۔

تفصیلات کے مطابق حقیقی آزادی مارچ کیلئے فرخ حبیب کی قیادت میں  قافلہ راولپنڈی روانہ ہوگیا ہے، جہاں انکا کہنا تھا کہ پاکستان میں اس وقت تمام بنیادی آئینی حقوق معطل ہیں۔

فرخ حبیب نے کہا کہ قوم انصاف کے لئے چیف جسٹس  کی طرف دیکھ رہی ہے، بات ان کے ساتھ ہو گی جنہوں نے فیصلے کرنے ہیں، عوام چوروں کو اقتدار میں بٹھانے والوں سےسوال پوچھتے رہیں گے۔

واضح رہے کہ حقیقی آزادی مارچ کا سونامی چل پڑا ہے، ملک بھر سے قافلوں کے راولپنڈی پہنچنے کا سلسلہ جاری ہے، خیمہ بستی بھی آباد کر دی گئی ہے۔

لاہور : سابق وزیراعظم عمران خان کی قیادت میں شاہدرہ سے پاکستان تحریک انصاف کے لانگ مارچ کے دوسرے مرحلے کا آغاز ہوگیا۔

تفصیلات کے مطابق حقیقی آزادی مارچ کے دوسرے روز چیئرمین تحریک انصاف شاہدرہ پہنچ کر کنٹینرپرسوار ہوگئے۔

پی ٹی آئی رہنما شاہ محمودقریشی، فیصل جاوید، عمر ایوب، یاسمین راشد ، اعظم سواتی اور حماداظہر بھی کنٹینرپر موجود ہیں۔

عمران خان کی قیادت میں مارچ کے شرکاء آج شاہدرہ سے نکل کر کامونکی تک جائیں گے۔

اس موقع پر شرکاء کا جوش دیدنی ہے اور کھلاڑیوں کے ڈھول کی تھاپ پر بھنگڑے بھی جاری ہے۔

چیئرمین پی ٹی آئی عمران خان مریدکےمیں خطاب کریں گے ، پی ٹی آئی کارکنوں نے عمران خان کے استقبال کی تیاریاں مکمل کرلیں ہیں۔

جی ٹی روڈ پر بڑا اسٹیج سجا لیا گیا ، ننکانہ صاحب شیخوپورہ فیصل آباد کے قافلے مریدکے پہنچیں گے۔

گذشتہ روز چیئرمین پی ٹی آئی عمران خان کی قیادت میں حقیقی آزادی مارچ کا شاندار آغاز ہوا اور عوام کا ٹھاٹھیں مارتا سمندر نکل آیا۔

مارچ کے شرکاء پرجوش نعرے لگاتے ہوئے لبرٹی چوک سے اچھرا پہنچے، وہاں سےچھرہ،مزنگ اور ایم اے او کالج چوک سے گزر کر آزادی چوک پہنچ کر پہلا پڑاؤ ڈالا، جس میں خواتین اور بچوں کی بھی بڑی تعداد مارچ میں شامل رہی۔

خیال رہے چیئرمین پی ٹی آئی عمران خان نے حقیقی آزادی ملنے تک سفر جاری رکھنے کا اعلان کرتے ہوئے کہا ہے کہ بندکمروں میں فیصلے ہوتے ہیں،حقیقی آزادی کی تحریک کا پہلامرحلہ صاف اور شفاف الیکشن کا انعقاد ہے۔

اسلام آباد : پاکستان تحریک انصاف نے حقیقی آزادی مارچ کے لیے 40 فٹ لمبا کنٹینر تیار کرلیا، جس میں عمران خان سوار ہوں گے۔

پاکستان تحریک انصاف کے حقیقی آزادی مارچ میں عمران خان کی شرکت لیے پی ٹی آئی نے چالیس فٹ لمبا کنٹینر تیار کرلیا۔

کنٹینر میں عمران خان کے ایگزیکٹو روم سمیت قائدین اور سکیورٹی کے لیے بھی خصوصی انتظامات کیے گئے ہیں۔

خیال رہے تحریک انصاف لانگ مارچ کا آغاز 28 اکتوبر بروز جمعہ لبرٹی چوک سے ہو گا ، 11بجے شروع ہونے والا مارچ پہلے دن شاہدرہ تک جائے گا۔

چیئرمین تحریک انصاف کا پہلے روز آخری خطاب آزادی چوک میں ہوگا ،لانگ مارچ کلمہ چوک سے براستہ فیروز پور روڈ جائے گا۔

دوسرے روز تحریک انصاف کا لانگ مارچ شاہدہ چوک سے شروع ہو گا ، تحریک انصاف کی قیادت نے رہنماؤں کو اشتہاری مہم اور کیمپس لگانے کی ہدایت کردی ہے۔

واضح رہے کہ عمران خان نے گزشتہ روز لاہور میں نیوز کانفرنس میں جمعے سے لانگ مارچ شروع کرنے کا اعلان کیا تھا۔

ان کا کہنا تھا کہ لانگ مارچ کا آغاز لبرٹی چوک لاہور سے ہوگا، صبح 11 بجے ہم جمع ہونگے اور لانگ مارچ کی قیادت میں خود کروں گا۔