اسلام آباد : سینیٹ کے نو منتخب اراکین آج حلف اٹھائیں گے ، جس کے بعد نئے چیئرمین اور ڈپٹی چیئرمین کا انتخاب ہوگا۔
تفصیلات کے مطابق سینیٹ کا اجلاس آج صبح 9بجے ہوگا، جس کا 10نکاتی ایجنڈا جاری کردیا گیا ہے، جس میں کہا ہے کہ سیکریٹری سینیٹ اجلاس کیلئے پریذائیڈنگ افسر کا اعلان کریں گے۔
ایجنڈے میں کہا گیا کہ نومنتخب ارکان سینیٹ آرٹیکل 65 کے تحت حلف اٹھائیں گے، حلف لینے کے بعد ارکان سینیٹ رول آف ممبرزپر دستخط کریں گے۔
اراکین کے حلف اٹھانے کے بعد پریذائیڈنگ آفیسر چیئرمین اور ڈپٹی چیئرمین سینیٹ کے انتخاب کا شیڈول جاری کریں گے، دونوں آئینی عہدوں کے انتخاب میں حصہ لینے والے امیدوار سیکرٹری سینیٹ سے کاغذات وصول کرنے کے بعد دوبارہ جمع کرائیں گے۔
کاغذات منظور ہونے کے بعد سینیٹ سیکرٹریٹ انتخاب میں حصہ لینے والے امیدواروں کی فہرست جاری کرے گا، جس کے بعد چیئرمین اور ڈپٹی چیئرمین سینیٹ کیلئے سیکرٹ ووٹنگ ہوگی، ایوان میں سادہ اکثریت سے دونوں عہدوں کا چناؤ کیا جائے گا/
اگر ضرورت پڑی تو خفیہ بیلٹ کے ذریعے چیئرمین سینیٹ کا چناؤ ہوگا، جس کے بعد چیئرمین سینیٹ کے انتخاب کے نتائج کااعلان کیا جائےگا، نتائج کےاعلان کے بعد نومنتخب چیئرمین سینیٹ حلف اٹھائیں گے۔
چیئرمین کے بعد ڈپٹی چیئرمین سینیٹ کا انتخاب عمل میں لایاجائےگا اور ضرورت پڑنےپرڈپٹی چیئرمین سینیٹ کاخفیہ رائےشماری سےالیکشن ہوگا، نتائج کے بعد نومنتخب ڈپٹی چیئرمین سینیٹ سے حلف لیا جائےگا، چیئرمین سینیٹ کا الیکشن ساڑھے 12 بجے ہو گا۔
خیال رہے الیکشن کمیشن کی جانب سے خیبرپختوانخو میں سینیٹ کی 11 نشستوں پر انتخاب ملتوی ہونے کے بعد 96 ممبران کے ایوان بالا میں 85 سینیٹرز چیئرمین اور ڈپٹی چیئرمین سینیٹ کے انتخاب کیلئے اپنا حق رائے دہی استعمال کریں گے۔
پیپلز پارٹی 24 سینیٹرز کیساتھ سینیٹ کی سب سے بڑی پارٹی ہے جبکہ مسلم لیگ (ن) اور تحریک انصاف کے 19، 19 ارکان ہیں، جے یو آئی 5، بی اے پی 4، ایم کیو ایم اور اے این پی 3، 3، ق لیگ، نیشنل پارٹی، بی این پی ایک، ایک جبکہ آزاد ارکان کے پاس سینیٹ کی 5 نشستیں ہیں۔
گزشتہ روز پیپلزپارٹی کے چیئرمین سینیٹ کے امیدوار یوسف رضا گیلانی نے افطار ڈنر کا اہتمام کیا، جس میں بلاول بھٹو زرداری، اتحادی جماعتوں اور پیپلز پارٹی کے سینیٹرز نے شرکت کی۔
افطار ڈنر میں سیاسی جماعتوں کے رہنما بھی شریک ہوئے، سابق نگران وزیر اعظم انوار الحق کاکڑ بھی یوسف رضا گیلانی کی دعوت میں موجود تھے، سابق وزیر اعظم نے افطار ڈنر میں شریک تمام سینیٹرز کا شکریہ بھی ادا کیا، اس دوران شیری رحمان نے چیئرمین سینیٹ کے حوالے سے نمبر گیم سے آگاہ کیا۔
