واشنگٹن: امریکا کے صدر ڈونلڈ ٹرمپ کی حلف برداری کی تقریب میں دنیا کے امیر ترین افراد نے شرکت کی۔
فوربز کے مطابق ٹرمپ کی حلف برداری کی تقریب میں دنیا کے سر فہرست دولت مند افراد نے شرکت کی، جن کی کل دولت 1.2 کھرب ڈالر بنتی ہے۔
اس ’چھوٹے‘ سے واقعے سے یہ اشارہ ملتا ہے کہ ٹرمپ کے دوسرے دور حکومت میں سرمایہ داروں کے عزائم کے راستے میں حائل ہر قسم کی رکاوٹیں دور ہو جائیں گی، اور دنیا پر سرمایہ داری نظام کا بادل اور گہرا ہو جائے گا۔
کیپیٹل روٹنڈا میں ہونے والی تقریبِ حلف برداری میں دنیا کے سب سے امیر شخص اور ٹیسلا کے سی ای او ایلون مسک نے شرکت کی، جس کی کل دولت 43 ارب 39 کروڑ ڈالر ہے۔
ایمیزون کے بانی جیف بیزوس نے بھی تقریب میں شرکت کی جن کی کل دولت 23 ارب 94 کروڑ ڈالر ہے۔ تقریب میں میٹا کے مالک مارک زکربرگ بھی شریک ہوئے جن کی کل دولت 21 ارب 18 کروڑ ڈالر ہے۔ تقریب میں پیسہ عطیہ کرنے والے ایپل کے سی ای او ٹِم کُک بھی شریک ہوئے جن کی کل دولت 2 ارب دو کروڑ ڈالر ہے۔
امریکی صدر ڈونلڈ ٹرمپ کا مصنوعی ذہانت پروجیکٹ کا اعلان
اوپن اے آئی کے سی ای او سیم آلٹمین بھی شریک تھے جن کی کل دولت 1 ارب ایک کروڑ ڈالر ہے۔ فوکس نیوز کے سابق چیئرمین روپرٹ مرڈوک اور مِیری ایم اڈیلسن نے بھی شرکت کی جن کے پاس بالترتیب 2 ارب 22 کروڑ اور 3 ارب 19 کروڑ ڈالر ہیں۔
تقریب میں فرانسیسی برینڈ لوئی وٹان کے مالک اور فرانس کے سب سے امیر شخص بیرنالڈ آرنالٹ نے شرکت کی، جن کی کل دولت 17 ارب 96 کروڑ ڈالر ہے۔ اور انڈیا کے سب سے امیر شخص مکیش امبانی نے بھی تقریب میں شرکت کی جن کی کُل دولت 9 ارب 81 کروڑ ڈالر ہے۔
