لاہور : نو منتخب وزیراعلیٰ حمزہ شہباز نے حلف نہ لینے کیخلاف تیسری بارلاہور ہائی کورٹ سے رجوع کر لیا، جس میں استدعا کی ہے کہ عدالت حمزہ شہباز سے حلف لینے کیلئے نمائندہ مقرر کرے۔
تفصیلات کے مطابق نو منتخب وزیراعلیٰ حمزہ شہباز نے حلف نہ لینے کیخلاف تیسری بارلاہور ہائیکورٹ میں آئینی درخواست دائرکر دی، درخواست میں وفاقی وپنجاب حکومت فریق بنایا گیا ہے۔
درخواست میں کہا گیا ہے کہ لاہور ہائی کورٹ حلف سے متعلق احکامات جاری کر چکی ہے، عدالتی احکامات پر عملدرآمد نہیں کیا جا رہا ، گورنرپنجاب ایک بار پھر عدالتی حکم ماننے سے انکار کر رہا ہے۔
درخواست گزار نے استدعا کی کہ عدالت حمزہ شہباز سے حلف لینے کیلئے نمائندہ مقرر کرنے کے ساتھ ساتھ حلف لینے کیلئے وقت اور جگہ کا بھی تعین کرے اور حلف نہ لینےوالوں کےاقدامات خلاف آئین قرار دیئے جائیں۔
یاد رہے لاہور ہائی کورٹ نے فیصلہ سناتے ہوئے گورنر پنجاب کو حکم دیا تھا کہ نئے وزیراعلیٰ حمزہ شہباز سے خود یا اپنے کسی نمائندے کے ذریعے حلف لیں۔
فیصلے میں کہا گیا تھا کہ آئین فوری طور پر وفاقی یا صوبائی حکومت بنانے کی تجویز دیتا ہے موجودہ صورتحال کے مطابق صدر یا گورنر فوری حلف لینے کے آئینی طور پر پابند ہیں۔
