کوئٹہ: سید ظہور احمد آغا نے بلوچستان کے نئے گورنر کے عہدے کاحلف اٹھا لیا، چیف جسٹس بلوچستان ہائی کورٹ جمال مندوخیل نے ان سے حلف لیا۔
تقریب حلف برداری میں وزیر اعلیٰ بلوچستان جام کمال نے شرکت کی، ڈپٹی اسپیکر قاسم سوری سمیت دیگر شخصیات بھی تقریب میں شریک ہوئیں، جام کمال نے گورنر بلوچستان منتخب ہونے پر ظہور آغا کو مبارک باد دی۔
نو منتخب گورنر بلوچستان ظہور آغا نے حلف برداری کے بعد گفتگو کرتے ہوئے کہا گورنر کے عہدے کے لیے انتخاب پر صدر اور وزیر اعظم کا مشکور ہوں، میں مرکز اور صوبے کے درمیان پل کا کردار ادا کروں گا۔
گورنر بلوچستان کا کہنا تھا کہ روایتی سیاست کو ختم کر کے بلوچستان کی ترقی کو ترجیح دوں گا، حکومت کے ساتھ مل کر صوبے سے پس ماندگی اور مسائل کو دور کرنا ہے۔
سید ظہور احمد آغا بلوچستان کے نئے گورنر مقرر
وزیر اعلیٰ جام کمال نے کہا ظہور آغا کو گورنر بلوچستان منتخب ہونے پر مبارک باد دیتا ہوں، ظہور آغا پی ٹی آئی کے ایک متحرک رکن ہیں، ماضی میں وفاق اور صوبے میں روابط کا فقدان رہا، اب ہم نے وفاق کے ساتھ مل کر مشترکہ پالیسیاں ترتیب دی ہیں، بہتر پالیسیوں کی بدولت بلوچستان ترقی کی راہ پرگامزن ہو رہا ہے۔
جام کمال کا کہنا تھا کہ بلوچستان میں ترقی کے آغاز کا کریڈٹ وزیر اعظم عمران خان کو جاتا ہے، انھوں نے ترقی کے لیے ہمیں اعتماد میں لیا، بلوچستان کی ترقی کے لیے ہر شخص کو انفرادی طور پر کام کرنا ہوگا۔
