ARYNews.tv | Urdu – Har Lamha Bakhabar

Tag: حماد اظہر

  • حماد اظہر اور ندیم افضل چن کے والد رہا ہو گئے

    حماد اظہر اور ندیم افضل چن کے والد رہا ہو گئے

    اسلام آباد: پاکستان تحریک انصاف کے رہنما اور سابق وفاقی وزیر حماد اظہر اور پاکستان پیپلز پارٹی کے رہنما ندیم افضل چن کے والد رہا ہو کر گھر پہنچ گئے۔

    تفصیلات کے مطابق حماد اظہر نے ٹوئٹ میں اطلاع دی کہ ان کے والد میاں محمد اظہر گھر واپس پہنچ گئے ہیں، انھوں نے لکھا ’’والد کو سی آئی اے پولیس اسٹیشن لے جایا گیا تھا اور وہاں ان کے فون کا جائزہ لیا گیا۔‘‘

    چند گھنٹے قبل انھوں نے ایک بیان میں بتایا تھا کہ ان کے والد کو پولیس نامعلوم مقام پر لے گئی ہے، حماد اظہر نے کہا میرے والد میاں محمد اظہر کی عمر 82 سال ہے اور وہ شدید بیمار ہیں، پولیس انھیں اٹھا کر لے گئی ہے۔

    دوسری طرف پیپلز پارٹی کے رہنما ندیم افضل چن نے ٹوئٹ میں بتایا کہ ان کے والد کو بھی رہا کر دیا گیا ہے، انھوں نے لکھا ’’تمام دوستوں کا شکر گزار ہوں جنھوں نے مشکل لمحات میں ساتھ دیا، پروردگار پاکستان میں عدل کا بول بالا کرے۔

    انھوں نے بھی چند گھنٹے قبل ایک ٹوئٹ میں بتایا تھا کہ ان کے والد کو ان کے گھر سے گرفتار کر لیا گیا ہے، پی پی رہنما نے بتایا تھا کہ میں نجف میں ہوں اور میرے 75 سالہ والد کو گرفتار کر لیا گیا ہے۔

  • آئین قانون اور جمہوریت کو روندا جا رہا ہے، قوم کی نظریں عدلیہ پر ہے، حماد اظہر

    آئین قانون اور جمہوریت کو روندا جا رہا ہے، قوم کی نظریں عدلیہ پر ہے، حماد اظہر

    تحریک انصاف کے رہنما و سابق وفاقی وزیر حماد اظہر نے کہا ہے کہ آئین قانون اور جمہوریت کو روندا جا رہا ہے، قوم کی نظریں عدلیہ پر ہے۔

    سماجی رابطے کی ویب سائٹ ٹوئٹر پر جاری پیغام میں پاکستان تحریک انصاف کے رہنما و سابق وفاقی وزیر حماد اظہر نے کہا کہ ملک میں آئین، قانون اور جمہوریت کو روندا جا رہا ہے، اب پوری قوم کی نظریں عدلیہ پر ہیں۔

    انہوں نے کہا کہ حسان نیازی کو بھی جعلی کیس میں سزادی جا رہی ہے تاکہ وہ خاموش ہو جائے، ہمیں امید ہے عدلیہ اپنا کردار ادا کرے گی اور آئین ،عوام کا ساتھ دے گی۔

    دوسری جانب پاکستان تحریک انصاف کے رہنما زلفی بخاری نے ٹوئٹر پر جاری پیغام میں لکھا کہ 23 مارچ آئین قرار داد پاکستان کی منظوری کا دن ہے، پاکستان کی بقا اس آئین سے ہے جو عوام کے نمائندوں نے پارلیمان میں منظور کیا۔

    پی ٹی آئی رہنما زلفی بخاری نے کہا کہ امپورٹڈ حکومت، الیکشن کمیشن نے آئین پامال کرکے عوامی رائے پر شب خون مارا، ان حالات میں یوم پاکستان نہ منانا درست فیصلہ ہے، آئین تو معطل ہے۔

  • زمان پارک میں آپریشن کا مقصد جعلی طور پر اسلحہ برآمد کرنا ہے، حماد اظہر

    زمان پارک میں آپریشن کا مقصد جعلی طور پر اسلحہ برآمد کرنا ہے، حماد اظہر

    تحریک انصاف کے رہنما و سابق وفاقی وزیر حماد اظہر نے کہا ہے کہ زمان پارک میں آپریشن کا مقصد جعلی طور پر اسلحہ برآمد کرنا ہے۔

    تفصیلات کے مطابق پاکستان تحریک انصاف کے چیئرمیں عمران خان کی رہائشگاہ زمان پارک میں پنجاب پولیس دروازہ توڑ کر اندر داخل ہوگئی ہے ساتھ ہی کئی کارکنان کو گرفتار کرنے کا سلسلہ بھی جاری ہے۔

    اس حوالے سے تحریک انصاف کے رہنما و سابق وفاقی وزیر حماد اظہر نے ٹوئٹ مین کہا کہ زمان پارک میں آپریشن کا مقصد جعلی طور پر اسلحہ برآمد کرنا ہے، 60 سال گزر گئے لیکن اسکرپٹ تبدیل نہ ہو سکا۔

    دوسری جانب رہنما فواد چوہدری نے کہا کہ لاہور میں عمران خان کے گھر پر بزدلانہ حملہ ہوا ہے، چار دیواری کو پامال کر کے پولیس گھر میں گھس گئی، انہیں کسی عدالت اور کسی قانون کی پرواہ نہیں ہے۔

  • ’حکومت بجلی بچانے کے لیے رات میں پاور اسٹیشن بند کررہی تھی‘

    اسلام آباد: پاکستان تحریک انصاف کے رہنما حماد اظہر کا کہنا ہے کہ حکومت بجلی بچانے کے لیے رات میں پاور اسٹیشن بند کررہی تھی۔

    پروگرام ’آف دی ریکارڈ‘ میں گفتگو کرتے ہوئے پی ٹی آئی رہنما حماد اظہر نے کہا کہ حکومت کا خیال تھا کہ رات میں طلب کم ہوتی ہے پاور اسٹیشن بند رکھیں ان کے پاور اسٹیشن بند کرنے کے اقدام میں بیک اپ پلاننگ نہیں تھی۔

    انہوں نے کہا کہ آج صبح اچانک طلب بڑھی پاور اسٹیشن بند تھے بڑا بریک ڈاؤن ہوگیا جب گرڈ اسٹیشن بند ہونے کے بعد دوبارہ چلائے گئے تو لوڈ کی وجہ سے بریک ڈاؤن ہوا۔

    حماد اظہر کا کہنا تھا کہ حکومت کی جانب سے کوئی پلان بیک اپ پر نہیں رکھا گیا تھا جس کی وجہ سے بجلی کا پورا نظام بیٹھ گیا۔

    انہوں نے کہا کہ 10 ہزار میگا واٹ بجلی بحال ہوئی تھی جو واپس چلی گئی جبکہ انہوں نے تیل بچانے کا فیصلہ سیاسی طور پر کیا تھا کہ رات میں گرڈ اسٹیشن بند کریں۔

  • غیرمقبول حکومت الیکشن سے فرار چاہتی ہے، حماد اظہر

    غیرمقبول حکومت الیکشن سے فرار چاہتی ہے، حماد اظہر

    لاہور : تحریک انصاف کے مرکزی رہنما حماد اظہر نے کہا ہے کہ ملک میں اس وقت انسانی حقوق نام کی کوئی چیز نہیں، غیرمقبول حکومت الیکشن سے فرار چاہتی ہے۔

    یہ بات انہوں نے لاہور کے لبرٹی چوک پر ہونے والے ایک بڑے عوامی اجتماع سے خطاب کرتے ہوئے کہی، انہوں نے کہا کہ عمران خان کی کال پر آج عوام اپنے معاشی اور سیاسی حقوق کے لیے گھروں سے باہر نکلے ہیں۔

    حماد اظہر کا کہنا تھا کہ نااہل اورخوفناک چہروں کو ہمارے ملک پر مسلط کیا گیا ہے،ملک میں اس وقت انسانی حقوق نام کی کوئی چیز نہیں ہے، ہمارے سینیٹر پر تشدد کیا گیا، میڈیا کی آواز بند کی گئی۔

    پی ٹی آئی رہنما نے کہا کہ جب عوام باہر نکلتے نہیں تو ان کا فیصلہ ماننا پڑے گا،عمران خان کے اعلان سے ایک نئی جدوجہد کا آغاز ہونے جارہا ہے۔

    انہوں نے کہا کہ ملک میں آٹا، چینی اور بجلی سب کچھ مہنگا ہوگیا ہے، ہماری معیشت ان چور ڈاکوؤں کی وجہ سے دیوالیہ کےقریب ہے، یہ لوگ صرف اپنے کیسز ختم کرانے آئے تھے، ان دو خاندانوں کے سرمائے کو بچانے کے لیے این آر او ٹو دیا گیا۔

    حماد اظہر نے کہا کہ ان دو خاندانوں کے سرمائے کو بچاتے بچاتے ملکی معیشت تباہ ہوگئی، راناثناء اللہ اور ان کے ٹولے کی الیکشن کا نام سن کر کانپیں ٹانگ جاتی ہیں۔

     

  • پاکستان کا ڈیفالٹ رسک سو فیصد سے بھی اوپر چلا گیا، حماد اظہر

    پاکستان کا ڈیفالٹ رسک سو فیصد سے بھی اوپر چلا گیا، حماد اظہر

    اسلام آباد : تحریک انصاف کے رہنما حماد اظہر نے کہا ہے کہ روپےکی قدر گررہی ہے اور معیشت تباہ ہوتی جارہی ہے، آج پاکستان کا ڈیفالٹ رسک100فیصد سے بھی اوپر چلا گیا ہے۔

    یہ بات انہوں نے اے آر وائی نیوز سے گفتگو کرتے ہوئے کہی انہوں نے کہا کہ اسحاق ڈار کرنسی کو مستحکم کرنے کیلئے یہ پوری معیشت کو داؤپر لگا دیتے ہیں۔

    ان کا کہنا تھا کہ فنانسنگ گیپ تو ابھی بھی موجود ہے جس کی وجہ سے نقصان ہورہا ہے، اس وقت10ارب ڈالر سے زائد کا فنانسنگ گیپ ہے، سلیکٹیو ڈیفالٹ تو ہم کرچکے ہیں کیونکہ ایل سیز نہیں کھل رہیں۔

    انہوں نے کہا کہ مفتاح اسماعیل، اسحاق ڈار دونوں پر مارکیٹس اعتماد کھوچکی ہیں، اسحاق ڈارکی اپنی معاشی منطق ہوتی ہے جسے معاشی ماہرین غلط سمجھتے ہیں،2013سے2018میں بھی انہوں نے روپےکو مصنوعی قدر پر رکھا۔

    اسحاق ڈار اب کہتے تھے کہ روپے کو190روپے پر لے جائیں گے لیکن ایسا نہیں ہوا، انہوں نے کیپٹل کنٹرول متعارف کرا کر امپورٹس کو جام کردیا۔

    ایل این جی سے متعلق ن لیگ حکومت نے3طویل المدت معاہدے کیے، قطر کےعلاوہ جتنے معاہدے انہوں نے کیے وہ ٹریڈرز بھاگ گئے، انہوں نے جب مارکیٹ نیچے تھی ہمیں مہنگی ایل این جی فروخت کرتے رہے۔

    توانائی سیکٹر کے ساتھ ن لیگ نے جو کچھ کیا ہے اس پر ایک کتاب لکھی جاسکتی ہے، روس کے ساتھ ہم نے اپریل میں تیل کے کارگو کا معاہدہ کرلیا تھا، 8ماہ یہ کہانیاں سناتے رہے کہ روس کا تیل یہاں ریفائن نہیں ہوسکتا۔

    مفتاح کہتے تھے کہ روس سے تیل لینے پر اقوام متحدہ کی پابندیاں لگ جائیں گی، مفتاح اسماعیل نے عالمی مارکیٹ سے2ماہ کیلئے مہنگا تیل ضرورت سے زیادہ لے لیا جس سے بجلی مہنگی بننا شروع ہوئی، اب ڈالر ختم ہوگئے ہیں تو میرے ہی لیٹر کو روس لے کر گئے ہیں۔

  • ‘خواتین بجلی کے بل ادا کرنے کیلئے زیور بیچ رہی ہیں’

    ‘خواتین بجلی کے بل ادا کرنے کیلئے زیور بیچ رہی ہیں’

    اسلام آباد : تحریک انصاف کے رہنما حماد اظہر کا کہنا ہے کہ مہنگائی کا طوفان آچکا ہے،خواتین بجلی کےبل ادا کرنے کیلئے زیور بیچ رہی ہیں۔

    تفصیلات کے مطابق تحریک انصاف کے رہنما حماد اظہر نے سماجی رابطے کی ویب سائٹ ٹوئٹر پر اپنے بیان میں کہا کہ روپیہ کہیں پر رک نہیں رہا، آج کا ڈالر کا انٹربینک ریٹ238روپے ہے۔

    حماد اظہر کا کہنا تھا کہ مہنگائی کاطوفان آچکاہےاور کاروبارتباہ ہوچکےہیں،صنعتیں بندہورہی ہیں، خواتین بجلی کےبل اداکرنےکیلئے زیوربیچ رہی ہیں، ملک نے ایسا بدترین منظر پہلے کبھی نہ دیکھا۔

    رہنما پی ٹی آئی نے ایک اور ٹوئٹ میں کہا کہ معیشت تباہ ہورہی ہے اور ملک سیلاب کی زد میں ہے، کاغذ کا ایک ٹکڑا بھی نہیں ہے، جس پر معیشت کو بچانے کا روڈ میپ ہو۔

    ان کا کہنا تھا کہ سیلاب سےمتاثرہ لوگوں کی بحالی کامرکزی منصوبہ ابھی تک کہیں نہیں ہے اور ہمارےوزیراعظم ملکہ کی آخری رسومات کے لیے لندن چلے گئے۔

  • لاہور میں ایک حلقے کے لیے 75 کروڑ روپے کا فنڈ منظور

    لاہور میں ایک حلقے کے لیے 75 کروڑ روپے کا فنڈ منظور

    لاہور: صوبہ پنجاب کے دارالحکومت لاہور میں ایک حلقے کے لیے 75 کروڑ روپے کا فنڈ منظور کرلیا گیا جس سے پہلے سے جاری ترقیاتی منصوبوں کو مکمل کیا جائے گا جبکہ نئے منصوبے بھی شروع کیے جائیں گے۔

    تفصیلات کے مطابق سابق وفاقی وزیر حماد اظہر کی درخواست پر وزیر اعلیٰ پنجاب پرویز الٰہی نے ان کے حلقہ این اے 126 کے لیے خصوصی پیکج کا اعلان کردیا۔

    حلقے میں 75 کروڑ روپے کی لاگت سے مفاد عامہ کی مختلف اسکیمز مکمل کرنے کی ہدایات جاری کردی گئیں۔

    فنڈز سے گلشن راوی کے مختلف بلاکس میں سیوریج لائنز کی تبدیلی کی جائے گی، گلشن راوی کے مختلف علاقوں میں صاف پانی کی لائن تبدیل کی جائے گی۔

    مین گلشن راوی سے نوناریاں چوک تک بھی صاف پانی کی لائنز تبدیل کی جائیں گی جبکہ ڈھلنوال سب ڈویژن میں سیوریج لائنز کی تبدیلی کی جائے گی۔

    سمن آباد اور سبزہ زار سب ڈویژن کے مختلف علاقوں میں سیوریج لائنز کی تبدیلی کی جائے گی۔

    فنڈز سے حلقے کی مختلف یونین کونسلز میں جاری ترقیاتی منصوبوں کو مکمل کیا جائے گا جبکہ نئے منصوبے بھی شروع کیے جائیں گے۔

  • مسلط حکومت نے اپنی نالائقی سے پیٹرول مزید مہنگا کر دیا: حماد اظہر

    مسلط حکومت نے اپنی نالائقی سے پیٹرول مزید مہنگا کر دیا: حماد اظہر

    اسلام آباد: پاکستان تحریک انصاف کے رہنما حماد اظہر کا کہنا ہے کہ مفتاح اسماعیل عوام کو دھوکا دینا بند کرو، مسلط حکومت نے مہنگے تیل کو بھی اپنی نالائقی سے مزید مہنگا کر دیا۔

    تفصیلات کے مطابق سابق وفاقی وزیر اور پاکستان تحریک انصاف کے رہنما حماد اظہر نے سماجی رابطے کی ویب سائٹ ٹویٹر پر اپنے ٹویٹ میں وزیر خزانہ کو مخاطب کرتے ہوئے کہا کہ مفتاح اسماعیل عوام کو دھوکا دینا بند کرو۔

    حماد اظہر کا کہنا تھا کہ پچھلے مہینوں میں ضرورت سے زیادہ پیٹرولیم مصنوعات درآمد کیں، ان کنسائنمنٹس کو نیشنل بینک نے 240 روپے سے اوپر پر آف لوڈ کیا۔

    انہوں نے کہا کہ مسلط حکومت نے پیٹرولیم مصنوعات کی امپورٹ میں بھی غفلت دکھائی، پچھلے 2 ماہ میں مہنگے دام اور بلند مارجن پر ضرورت سے کہیں زیادہ تیل امپورٹ کیا گیا۔ پھر تیل کی قیمت بینکوں نے مہنگے ڈالر ریٹ پر روپے میں موصول کی۔

    حماد اظہر نے کہا کہ ذرائع کے مطابق اس وقت کے کچھ کارگو میں مارکیٹ ریٹ سے بھی 8 روپے اضافی وصول کیے گئے۔

    انہوں نے مزید کہا کہ تحریک انصاف کی حکومت روس سے سستا تیل لانے والی تھی، لیکن مسلط حکومت نے سستا تیل تو دور کی بات، مہنگے تیل کو بھی اپنی نالائقی سے مزید مہنگا کر دیا۔

  • پی ٹی آئی کا جلسہ : ‘حکومت کو آج آخری وارننگ ملے گی’

    پی ٹی آئی کا جلسہ : ‘حکومت کو آج آخری وارننگ ملے گی’

    اسلام آباد : تحریک انصاف کے رہنما حماد اظہر کا کہنا ہے کہ حکومت کو آج آخری وارننگ ملے گی، اب فیصلہ انہوں نےکرنا ہے خود سے جانا ہے یا پنجاب کی طرح منہ کالا کرا کے جانا۔

    تفصیلات کے مطابق تحریک انصاف کے رہنما حماد اظہر نے پریس کانفرنس کرتے ہوئے کہا کہ پی ڈی ایم پنجاب میں بری طرح ناکام ہوئی ، پنجاب کی طرح وفاق میں بھی پی ڈی ایم کی چند دن کی حکومت ہے۔

    اے آروائی نیوز براہِ راست دیکھیں live.arynews.tv پر

    حماد اظہر کا کہنا تھا کہ عمران خان اپنی تقریر میں سازش کو بے نقاب کریں گے ، یہ سمجھتے تھے عمران خان کو اقتدار سے نکال کر ناکام بنایاجاسکتا ہے لیکن عمران خان کی مقبولیت میں مزید اضافہ ہوا ہے۔

    رہنما پی ٹی آئی نے کہا کہ آج رات پی ڈی ایم کو آخری وارننگ ملے گی اور عوام اپنا فیصلہ سنا دیں گے۔

    معاشی صورتحال کے حوالے سے ان کا کہنا تھا کہ آج سے کچھ ماہ پہلے پاکستان کی معیشت ترقی کررہی تھی ، کورونا کے دوران بھی معیشت ترقی کررہی تھی لیکن یہ خود یہ ملک کو دیوالیہ ہونے کے قریب لے گئے ، بعد میں کہتے ہیں ہم تو ملک کو دیوالیہ ہونے سے بچا رہے ہیں۔

    بجلی کی قیمتوں میں اضافے پر حماد اظہر نے کہا کہ نیپرا نےاگست کے لیے 10 روپے فی یونٹ بجلی مہنگی کردی، بجلی کی قیمت دگنی ہوجائےگی تو ملکی کی معیشت کیسے چلے گی ، بجلی مہنگی کرنے کے باوجود لوڈ شیڈنگ پر قابو نہیں پایا جاسکا۔

    رہنما پی ٹی آئی کا کہنا تھا کہ ڈالر مہنگا ہونے کے اثرات معیشت پر ابھی آنے ہیں ، تم نےملک کودیوالیہ سے کیا بچانا ہے بیڑہ غرق کردیا ، دل بڑا کریں عوام پر اعتمادکریں ، بند کمروں کی سیاست ختم کریں، عمران خان اہم اعلان کریں گے اور سازش بے نقاب کریں گے۔

    اے آر وائی کا این او سی منسوخ کرنے کے حوالے سے انھوں نے کہا کہ پاکستان میں سیاہ حکومت میں شہری حقوق کوغصب کیا جارہا ہے، ایک چینل کو بند کیا ہے، ان کابس چلے تو ہر چینل کو اپنے من پسند چینل اورپی ٹی وی کے مطابق چلائیں، اے آر وائی کی بندش میڈیا کی آزادی کے خلاف ہے۔

    حماد اظہر کا کہنا تھا کہ یہ آئین اور قانون کی بالادستی کی بات ہے، آئندہ کسی بیرونی قوت کی جرات نہیں ہوگی کہ مداخلت کرے، یہ 80کی دہائی نہیں کہ چینل بندکردو جیلوں میں ڈال دو، عوام سڑکوں پرنکلتےہیں تو سیاسی زلزلہ آتا ہے۔

    تحریک انصاف کے رہنما نے کہا کہ آج سازش بےنقاب کریں گے کہ کس طرح باتوں کو توڑ مروڑ کر اور مرچ مصالحہ لگا کر بیانیہ بنایا جاتا ہے۔

    ان کا مزید کہنا تھا کہ یہ لوگ سمجھتے ہیں یہ 80 کی دہائی ہے ان کی پرورش بھی اسی دور میں ہوئی، آج کا پاکستان بدل چکا ہے،ہم عوام کے ساتھ ہیں، ہمارا صرف ایک مطالبہ ہے فوری صاف شفاف انتخابات ۔

    حماد اظہر نے کہا کہ 75 سال بعد لگ رہا پاکستان حقیقی معنوں میں آزاد ہونے جا رہا ہے، یہ دو خاندان اپنی اجارہ داری قائم رکھنا چاہتے ہیں ، ایک طبقہ ہے جو چاہتا ہے عوام کی رائے سے حکومت کا انتخاب نہ ہو۔

    ان کا کہنا تھا کہ وفاقی حکومت اپنی آخری ہچکیوں پر ہے، فیصلہ کر لیں کہ خود سے جانا ہے یا پنجاب کی طرح منہ کالا کرا کے، عوام فیصلہ کریں گے تو تحریک انصاف دو تہائی اکثریت سے جیت جائے گی۔