Tag: حوالہ ہنڈی

پشاور : وفاقی تحقیقاتی ادارے ( ایف آئی اے) نے صرافہ مارکیٹ سے حوالہ ہنڈی میں ملوث 2 ملزمان کو گرفتار کرلیا اور 9 سونے کی اینٹیں برآمد کرلیں۔

تفصیلات کے مطابق وفاقی تحقیقاتی ادارے ( ایف آئی اے) نے کارروائی کرتے ہوئے حوالہ ہنڈی میں ملوث 2 ملزمان کو گرفتار کرکے سونے کی اینٹیں برآمد کرلیں۔

ایف آئی اے حکام نے بتایا کہ ملزمان کو صرافہ مارکیٹ سے گرفتار کیا گیا اور ملزمان سے 9 سونے کی اینٹیں ،65 لاکھ 20 ہزار پاکستانی روپے برآمد ہوئے۔

ایف آئی اے نے کہا کہ برآمد ہونے والے سونے کی مجموعی مالیت 2 کروڑ روپےسے زائد ہے جبکہ ملزمان سے ہنڈی حوالہ، غیر ملکی کرنسی سے متعلق ریکارڈ بھی برآمد بھی ہوا۔

ترجمان ایف آئی اے کے مطابق ملزمان کے خلاف مقدمہ درج کر لیا گیا اور دیگر ملزمان کی گرفتاری کے لئے چھاپے مارے جا رہے ہیں۔

کراچی : ایف آئی اے کے عملے نے حوالہ ہنڈی میں ملوث عناصر کیخلاف کریک ڈاؤن کرتے ہوئے دو مختلف کارروائیوں میں 6 ملزمان کو گرفتار کرلیا۔

ایف آئی اے کے کارپوریٹ کرائم سرکل نے شہر قائد میں کارروائی کرتے ہوئے حوالہ ہنڈی میں ملوث 6 ملزمان کو گرفتار کرکے ان کے قبضے سے مجموعی طور پر 13 ہزار ڈالر،2گاڑیاں، موبائل فونز ،بےنامی اکاؤنٹس کے چیک برآمد کرلیے۔

تفصیلات کے مطابق ڈائریکٹر ایف آئی اے کراچی زون عبدالسلام شیخ کی ہدایت پر حوالہ ہنڈی میں ملوث عناصر کے خلاف کریک ڈاؤن جاری ہے۔

اس حوالے سے ایف آئی اے حکام کا کہنا ہے کہ گرفتار ملزمان حوالہ ہنڈی اور کرنسی کی غیر قانونی ایکسچینج میں ملوث تھے، پہلی کارروائی میں اسٹارگیٹ کے قریب منظم گروہ کے 5 ملزمان کوگرفتار کیا گیا۔

گرفتار ملزمان میں خرم، اسامہ، فرقان احمد، محمد افضل اور محمد علی شامل ہیں، ملزمان سے 8ہزارامریکی ڈالر اور کار برآمد کر لی گئی، ملزمان کے موبائل فون سے حوالہ ہنڈی سے متعلق پیغامات بھی ملے ہیں۔

ایف آئی اے حکام کے مطابق دوسری کارروائی میں مشرق سینٹر کے قریب منظم گروہ کا مرکزی ملزم گرفتار کیا گیا، ملزم عامر مجید سے 5ہزار امریکی ڈالر اور لگژری کار برآمد کی گئی ہے۔

ملزم عامر مجید سے بےنامی غیرملکی کرنسی اکاؤنٹ کے دستخط شدہ چیکس بھی برآمد ہوئے، مذکورہ اکاؤنٹ ملزم عامر مجید کے زیر استعمال تھا۔

ایف آئی اے حکام کا کہنا ہے کہ گرفتار ملزمان کے خلاف 2 مقدمات درج کر لیے گئے جبکہ ملزم عامر مجید کے دیگر ساتھیوں کی گرفتاری کیلئے چھاپے مارے جا رہے ہیں۔

لاہور : ایف آئی اے کارپوریٹ کرائم سرکل لاہور نے حوالہ ہنڈی کے کام میں ملوث تین ملزمان کو گرفتار کر کے  کروڑوں روپے کی ملکی و غیر ملکی کرنسی قبضے میں لے لی۔

تفصیلات کے مطابق ایف آئی اے نے لاہور کی سرکلر روڈ پر کارروائی کرتے ہوئے حوالہ ہنڈی کے کام میں ملوث تین ملزمان کو گرفتار کرکے 6 کروڑ 81 لاکھ روپے پاکستانی کرنسی سمیت امریکی، کینڈین، آسٹریلین، ترکش لیرا، سعودی ریال ، یورو ، درہم اور پاؤنڈ پر مشتمل تقریبا ڈیڑھ کروڑ مالیت کی غیر ملکی کرنسی ضبط کرلی۔

گرفتار تین ملزمان سرکلر روڈ پر عرصہ تین سال سے منسوخ شدہ لائسنس کی آڑ میں کام کر رہے تھے۔

اس حوالے سے پریس کانفرنس کرتے ہوئے ڈائریکٹر ایف آئی اے لاہور زون سرفراز ورک کا کہنا تھا کہ ابتک حوالہ ہنڈی کے 41 مقدمات میں 84 افراد کو گرفتار کر کے 560 ملین کی ریکوری کی گئی ہے۔

سرفراز ورک نے بتایا کہ گرفتار ملزمان میں دو ملازمین اور ایک مرکزی ملزم کا بھائی شامل ہے جنہوں نے اعتراف کیا کہ عرصہ تین سال سے حوالہ ہنڈی کا غیر قانونی کام کر رہے تھے۔

ڈائریکٹر ایف آئی کا کہنا تھا کہ بیرون ملک بیٹھ کر کرنسی کے غیر قانونی کاروبار میں ملوث ملزمان کو ریڈ وارنٹ کے زریعے وطن واپس لایا جائے گا اور چینی مافیا کے خلاف پولیس کی مدد سے کارروائی کی جائے گی۔

کراچی : کمرشل بینکنگ سرکل اسلام آباد نے حوالہ ہنڈی میں ملوث ملزم کو گرفتار کرکے 2 ہزار511 امریکی ڈالر، 10 ہزار 545 سعودی ریال اور 11 ہزار 750 یو اے ای درہم برآمد کر لئے۔

تفصیلات کے مطابق وفاقی تحقیقاتی ادارے (ایف آئی اے ) کی ملک بھر میں کارروائیاں جاری ہے، کمرشل بینکنگ سرکل اسلام آبادنےحوالہ ہنڈی میں ملوث ملزم گرفتارکرلیا۔

ایف آئی اے ترجمان نے بتایا کہ ملزم کے قبضے سے 2511 امریکی ڈالر، 10545 سعودی ریال اور 11750 یو اے ای درہم برآمد کر لئے گئے۔

ایف آئی اے کا کہنا ہے کہ کمرشل بینکنگ سرکل لاہور نے شہری کے اکاونٹ سے لاکھوں روپے خوردبرد کرنے والے ملزم کو گرفتار کر لیا۔

اس کے علاوہ اینٹی کرپشن سرکل کوئٹہ نے بجلی چوری میں ملوث 2 ملزمان کو گرفتار کر لیا جبکہ انسداد سمگلنگ سیل گوادر اور چمن نے غیر قانونی طریقے سے بارڈر پار کرنے والے 16 ملزمان کو گرفتار کیا، گرفتار ملزمان میں 2 کا تعلق ایران اور 8 کا تعلق افغانستان سے ہے۔

کارروائیوں کے دوران مطلوب 3 اشتہاریوں کو بھی گرفتار کیا گیا، ملزمان کو گرفتار کر کے تحقیقات کا آغاز کر دیا گیا ہے۔