اسلام : آباد : چیئرمین پی ٹی آئی عمران خان کی حکومت کو مذاکرات کی پیشکش پر حکمران جماعت نے اتحادیوں کو اعتماد میں لینے کا فیصلہ کرلیا۔
تفصیلات کے مطابق چیئرمین پی ٹی آئی عمران خان کی حکومت کو مذاکرات کی پیشکش پر حکومتی اتحادیوں کے رابطے اور مشاورت شروع ہوگئی۔
حکمران جماعت نے اتحادیوں کو اعتماد میں لینے کا فیصلہ کرلیا ، اس سلسلے میں وزیراعظم آج یا ایک دو روز میں اتحادیوں کے ساتھ ملاقات کریں گے۔
حکومتی ذرائع کا کہنا ہے کہ اتحادیوں سے مشاورت کے بعد حتمی فیصلہ کیا جائے گا اور جو بھی مشترکہ فیصلہ ہوگا اس کے مطابق آگے بڑھیں گے۔
گذشتہ روز چیئرمین پی ٹی آئی عمران خان نے حکومت کو مشروط بات چیت کی پیشکش کرتے ہوئے کہا تھا کہ ہم ان کو موقع دے سکتے ہیں کہ ہمارے ساتھ بیٹھیں اوربات کریں یہ ہمارے ساتھ بیٹھ کر عام انتخابات کی تاریخ دیں یا پھر ہم اسمبلی تحلیل کردیں۔
عمران خان کا کہنا تھا کہ ہم نے تو بہت کوشش کی مگر یہ عام انتخابات کا نام نہیں لیتے،ان کو ڈر لگا ہے کہ عام انتخابات ہوئےتو انھوں نے ہار جانا ہے۔
