اسلام آباد: صدر آل پاکستان انجمن تاجران اجمل بلوچ نے کہا ہے کہ حکومت چینی بحران کا فوری حل نکالے، بیشتر شوگر ملز کے پاس اسٹاک ختم ہوچکا ہے۔
تفصیلات کے مطابق صدر آل پاکستان انجمن تاجران اجمل بلوچ کا کہنا ہے کہ سینٹرل پنجاب کی 70 فیصد شوگر ملز کے پاس چینی کا اسٹاک ختم ہو چکا ہے، جنوبی پنجاب کی شوگر ملز نے 4 دن سے سپلائی بند کررکھی ہے۔
آل پاکستان انجمن تاجران کے صدر نے چینی کی کمیابی کی نشاندہی کرتے ہوئے مزید کہا کہ جس دکان پر چینی نہیں اسے سیل کردیا جاتا ہے جو ظلم ہے۔
اجمل بلوچ کا کہنا تھا کہ کریانہ ریٹیلرز کی گرفتاریوں سے چینی کا بحران ختم نہیں ہوگا، بحران ڈنڈے سے نہیں اسٹیک ہولڈرز کے ساتھ بات چیت سے ختم ہوگا۔
جوڑیا بازار میں تاجروں نے چینی کی فروخت بند کردی
گزشتہ دنوں وفاقی حکومت کی جانب سے چینی درآمد کا ایک اور ٹینڈر جاری کیا گیا تھا، ٹریڈنگ کارپوریشن آف پاکستان نے ایک لاکھ میٹرک ٹن چینی درآمد کرنے کا ٹینڈر جاری کیا ہے، چینی کا یہ نیا ٹینڈر 11 اگست کو کھولا جائے گا۔
ٹی سی پی ذرائع کا کہنا تھا کہ اس سے قبل بھی چینی درآمد کرنے کے لیے ٹینڈر جاری کیا گیا تھا، گزشتہ ٹینڈر میں 4 کمپنیوں نے بولیاں جمع کرائی تھیں۔
ذرائع کے مطابق ریٹ زیادہ ہونے کے باعث گزشتہ ٹینڈر منسوخ ہونے کا امکان ہے، گزشتہ ٹینڈر میں درآمدی چینی کی قیمت 227 روپے فی کلو بتائی گئی۔
https://urdu.arynews.tv/pakistan-convinces-imf-to-waive-taxes-on-imported-sugar/