اسلام آباد: وفاقی حکومت نے آئی ایم ایف مشن کی آمد سے قبل رواں ماہ کے وسط تک بجٹ اہداف پر کام مکمل کرنے کا فیصلہ کر لیا۔
تفصیلات کے مطابق عالمی مالیاتی فنڈ (آئی ایم ایف) مشن کی آمد پندرہ مئی کو ہوگی، حکومت نے آئی ایم ایف مشن کی آمد سے قبل کابینہ کو رواں ماہ کے وسط تک بجٹ اہداف پر کام مکمل کرنے کا فیصلہ کیا ہے۔
ذرائع کا کہنا ہے کہ حکومت نے آئی ایم ایف مشن آنے سے قبل تیاریاں تیز کر دی، نیا قرض پروگرام سائن کرنے کیلئے وزارت خزانہ نے متعلقہ وزارتوں کو تیزی سے اہداف مکمل کرنے کی ہدایت کر دی، تمام اہم اہداف کا ڈھانچہ تیار کر کے آئی ایم ایف کو بھیجا جائے گا۔
ذرائع کے مطابق آئی ایم ایف مشن کی آمد سے قبل بجٹ اسٹریٹیجی پیپر بھی کابینہ سے منظور کرا لیا جائے گا۔
آئی ایم ایف مشن کی آمد سے قبل قرض کی ادائیگی، حکومتی اخراجات، پنشن اور تنخواہوں کے اخراجات کا ابتدائی تخمینہ تیار کیا جائے گا، دفاعی اخراجات اور ایف بی آر کے ٹیکس وصولیوں کا ہدف بھی طے کیا جائے گا۔
ذرائع نے مزید بتایا ہے کہ وزیراعظم آفس کی جانب سے بھی معاشی ٹیم کو بجٹ ورکنگ مکمل کرنے کا ٹارگٹ سونپ دیا گیا ہے، آئی ایم ایف مشن اہم اہداف کیلئے تجاویز سے وزارت خزانہ حکام کو آگاہ کرے گا۔
