کراچی: پاکستان پیپلز پارٹی نے وفاقی حکومت کو ٹف ٹائم دینے کا فیصلہ کرتے ہوئے چیئرمین بلاول بھٹو کی قیادت میں آیندہ ماہ ٹرین مارچ کا اعلان کر دیا۔
تفصیلات کے مطابق پیپلز پارٹی نے وفاقی حکومت کے خلاف بلاول بھٹو کی قیادت میں ٹرین مارچ کا اعلان کر دیا ہے، یہ مارچ آیندہ ماہ اپریل میں ہوگا، مارچ کی قیادت پی پی چیئرمین خود کریں گے۔
ٹرین مارچ کراچی براستہ حیدر آباد، نواب شاہ، محراب پور، خیرپور سکھر جائے گا، بلاول بھٹو ٹرین مارچ کی قیادت کرتے ہوئے چار اپریل کی صبح لاڑکانہ پہنچیں گے۔
چیئرمین پیپلز پارٹی بلاول بھٹو زرداری مختلف اسٹیشنز پر کارکنان سے خطاب بھی کریں گے، انھوں نے کراچی تا لاڑکانہ ٹرین چارٹرڈ کرنے کی درخواست کر دی ہے۔
خیال رہے کہ وزیر ریلوے شیخ رشید نے بلاول بھٹو کو وارننگ دیتے ہوئے کہا ہے کہ دو بار لوگوں کے بیچ بچاؤ کی وجہ سے انھیں چھوڑ دیا، تیسری مرتبہ کے بعد گنجائش نہیں۔
یہ بھی پڑھیں: دو بار بلاول بھٹو کی بات نظر انداز کی، تیسری بار معافی نہیں، 20 نئی ٹرینیں چلائیں گے: شیخ رشید
شیخ رشید کا کہنا تھا کہ پی پی سندھ میں اور ن لیگ اپنے کیسز صرف لاہور میں چلوانا چاہتی ہے، مقصد دونوں کا ایک ہے، ضمانت دے دو۔
انھوں نے کہا کہ یہ لیڈر نہیں گیدڑ ہیں جیل نہیں کاٹ سکتے، شہباز شریف کو خود این آر او مانگتے دیکھا اور سنا ہے۔
