Tag: حکومت

اسلام آباد : وزیراعظم کے مشیر برائے ماحولیات ملک امین اسلم نے گلگت بلتستان میں گلاف حفاظتی پراجیکٹ فوری شروع کرنے کا اعلان کیا ہے۔

تفصیلات کے مطابق گرم موسمی حالات کے باعث گلگت بلتستان کے چند علاقوں میں گلاف کا خطرہ ہے،پگھلتے گلیشیئرز نے مقامی آبادی کے لیے خطرےکی گھنٹی بجا دی۔بگروٹ،یاسین،ہنزہ،نگر،شگر،گانچھے،گلگت کے علاقے متاثر ہونے کا خدشہ ہے۔

معاون خصوصی برائےماحولیات نےگلگت بلتستان کا ہنگامی دورہ کیا۔ملک امین اسلم نے پگھلتےگلیشیئرز کو مقامی آبادی کے لیے سنگین خطرہ قرار دے دیا۔

ملک امین اسلم نے گلگت بلتستان میں گلاف حفاظتی پراجیکٹ فوری شروع کرنے کا اعلان کرتے ہوئے کہا کہ یہ منصوبہ اقوام متحدہ کے تعاون سے شروع ہوگا،منصوبے پر 6 ارب روپے کی لاگت آئےگی۔

معاون خصوصی برائےماحولیات کا کہنا تھا کہ 3ارب روپے کی لاگت سے 50گلیشیئر مانیٹرنگ اسٹیشن قائم کریں گے،سیلابی پانی کی مانیٹرنگ کے لیے400خصوصی اسٹیشنز بھی قائم ہوں گے۔

انہوں نے بتایا کہ 1.5ارب روپے براہ راست مقامی کمیونٹی کو فراہم کیے جائیں گے،پراجیکٹ کے تحت 10 لاکھ کے قریب مقامی افراد کو براہ راست فائدہ ہوگا۔

ملک امین اسلم کا کہنا تھا کہ موسمیاتی تبدیلیوں سے گلیشیئرز کے پگھلاؤ کا عمل تیز ہو رہا ہے،2015 میں خطرناک گلیشیئرز لیکس کی تعداد صرف33 تھی،اس وقت خطرناک گلیشیئرز کی تعداد 133 ہوچکی ہے۔

معاون خصوصی برائےماحولیات نے کہا کہ گلیشئرز پگھلاؤ سے ممکنہ نقصان پر قابو پانے کے لیے ہنگامی اقدامات کر رہے ہیں، مقامی آبادی کو ممکنہ نقصانات سے محفوظ رکھنا حکومتی ترجیح ہے۔

اسلام آباد: مشیر پارلیمانی امور بابر اعوان نے کہا ہے کہ حکومت کی طرف سے ٹیکس فری بجٹ پیش کرنا خوش آئند ہے۔

تفصیلات کے مطابق اسپیکر قومی اسمبلی اسد قیصر سے مشیر پارلیمانی امور بابراعوان نے ملاقات کی جس میں‌ بجٹ اجلاس،قانون سازی اور ملکی امور پر تبادلہ خیال کیا۔ بابراعوان نے ایوان کو خوشگوار ماحول میں چلانے پر اسپیکر کو خراج تحسین پیش کیا۔

اسپیکر قومی اسمبلی نے کہا کہ اراکین پارلیمنٹ کا بجٹ اجلاس میں نظم ونسق قابل تعریف ہے،اراکین کی جانب سے اتنی بڑی تعداد میں بحث میں حصہ غیر معمولی ہے۔

اسد قیصر کا کہنا تھا کہ اراکین کوبجٹ بحث میں زیادہ سے زیادہ موقع فراہم کیا گیا،حکومتی اور اپوزیشن بینچوں کی جانب سے کھل کر اپنا نقطہ نظر پیش کیا،بجٹ پرعمومی بحث کے لیے 40 گھنٹے کا وقت مقرر کیا گیا تھا،بجٹ بحث 57 گھنٹے9 منٹ کرائی گئی۔

انہوں نے کہا کہ اپوزیشن نے 29 گھنٹے 14 منٹ اور حکومت نے 27 گھنٹے 55 منٹ بات کی،اپوزیشن کو مقررہ وقت سے 10 گھنٹے 49 منٹ زیادہ ملے،حکومت کو 6 گھنٹے 20 منٹ اضافی وقت ملا۔

اسپیکر قومی اسمبلی کا کہنا تھا کہ بجٹ اجلاس میں 208 ارکان نے حصہ لیا،حکومت کے107 اور اپوزیشن کے 101 ارکان اجلاس میں شریک ہوئے۔

اس موقع پر بابر اعوان کا کہنا تھا کہ حکومت کی طرف سے ٹیکس فری بجٹ پیش کرنا خوش آئند ہے، دنیا کی معیشت کو نقصان پہنچا مگر حکومت نے ٹیکس فری بجٹ دیا۔

مشیر پارلیمانی امور کا کہنا تھا کہ موجودہ حکومت پارلیمان کی بالادستی پر یقین رکھتی ہے،وزیراعظم پارلیمنٹ کے فلور پر ارکان کو اعتماد میں لینا بہتر فیصلہ تھا۔

اسلام آباد: وفاقی حکومت نے کرونا وائرس کے پیش نظر بند ہونے والی جامعات کو 15 جولائی کے بعد دوبارہ کھولنے پر غور شروع کر دیا۔

تفصیلات کے مطابق حکومت نے 15 جولائی کے بعد جامعات کھولنے کے فیصلے پر غور کرنے سے متعلق ہائیر ایجوکیشن کمیشن (ایچ ای سی) کو باضابطہ طور پر آگاہ کر دیا۔

ذرائع کا کہنا ہے کہ حکومت کی جانب سے جامعات مزید بند نہیں رکھی جائیں گی،ایچ ای سی جامعات سے مل کر اپنی پالیسی خود بنائے گی۔

ذرائع کے مطابق چیئرمین ایچ ای سی کی زیر صدارت جامعات کے وی سیز کا ویڈیو لنک پر اجلاس ہوا جس میں انہوں نے جامعات سے سفارشات طلب کیں۔ذرائع کا کہنا ہے کہ ایس او پیز کے ساتھ جامعات کھولی جائیں گی۔

یونیورسٹیوں میں امتحانات، ہائر ایجوکیشن کمیشن کا بڑا فیصلہ

یاد رہے کہ گزشتہ ماہ 13 مئی کو چیئرمین ایچ ای سی ڈاکٹر طارق بنوری کی زیر صدارت اجلاس میں یکم جون سے باقاعدہ آن لائن کلاسز شروع کرنے پر اتفاق کیا گیا تھا اور لاک ڈاؤن ختم نہ ہونے کی صورت میں آن لائن امتحانات لینے کا فیصلہ بھی کیا گیا تھا۔

لاہور: وزیرخوراک پنجاب عبدالعلیم خان نے کہا ہے کہ ملک میں چینی 70روپے فی کلو فروخت کے فیصلے پر مکمل عمل درآمدہوگا، پنجاب میں انتظامیہ کو واضح ہدایات جاری کردی گئی ہیں۔

تفصیلات کے مطابق اپنے ایک تازہ بیان میں عبدالعلیم خان کا کہنا تھا کہ وزیراعظم کی ذاتی دلچسپی سے چینی کی قیمت میں کمی کی جارہی ہے، کسی کو بنیادی اشیائے خورونوش میں بےجا اضافہ نہیں کرنے دیں گے، پٹرول کے بعدچینی کی قیمتوں میں واضح کمی خوش آئند ہے، چینی کے نام پر ناجائز منافع کمانے والوں سے سختی سے نمٹیں گے۔

انہوں نے کہا کہ اپوزیشن کو بھی چینی کی قیمتوں میں کمی کو سراہنا چاہیے، چینی کی طرح آٹے کی قیمتیں بھی مستحکم رکھنے کی کوشش کریں گے، جہاں کہیں خلاف ورزی ہوئی انتظامیہ سخت کارروائی کرے گی۔

‘شوگر ملز نے حکومت کو چینی 70 روپے فی کلو کی پیش کش کر دی’

دوسری جانب خیبرپختونخوا حکومت نے صوبے میں 6 شوگرملز کی انتظامیہ کو خط لکھ دیا۔

خط کے متن میں کہا گیا ہے کہ شوگرملز 70روپے کلو چینی فروخت کریں، شوگرملز ریٹیل شاپس اور یوٹیلٹی اسٹورز کو 70روپے کلو چینی فراہم کریں، کے پی حکومت نے ڈی آئی خان، پشاور اور مردان کی شوگرملز کو خط ارسال کیے۔

اسلام آباد ہائی کورٹ نے چینی انکوائری کمیشن کو کارروائی سے روک دیا

واضح رہے کہ شوگر ملز ایسوسی ایشن حکومت کو 60 ہزار ٹن چینی 70 روپے کلو پر فراہمی کی پیش کش کرچکی ہے، ذرایع کا کہنا تھا کہ اس سلسلے میں سیکریٹری کابینہ ڈویژن کے نام ایک خط لکھا گیا جس میں کہا گیا کہ حکومت عوام تک چینی پہنچانے کے لیے اقدامات کرے۔

یاد رہے کہ 11 جون کو اسلام آباد ہائی کورٹ نے چینی انکوائری کمیشن کو 10 دن کے لیے شوگر ملز کے خلاف کارروائی سے روک دیا تھا اور آئندہ سماعت تک ملک میں چینی 70 روپے کلو بیچنے کا حکم بھی دیا تھا۔

اسلام آباد: مشیر خزانہ عبد الحفیظ شیخ نے کہا ہے کہ کاشت کاروں کو براہ راست ریلیف کی فراہمی حکومت کی ترجیح ہے۔

تفصیلات کے مطابق مشیر خزانہ عبد الحفیظ شیخ سے فارمز ایسوسی ایشن کے نمائند وفد نے ملاقات کی۔وزیر خارجہ، وزیر اقتصادی امور، مشیر تجارت اور دیگر اعلیٰ حکام بھی ملاقات میں شریک تھے وزیر خارجہ شاہ محمود قریشی فارمرز ایسوسی ایشن کے چیئرمین کے طور پر مشیر خزانہ سے ملے۔

اس موقع پر مشیر خزانہ عبد الحفیظ شیخ نے زرعی شعبے کے لیے اعلان کردہ 50 ارب کی جلد تقسیم کا اعلان کرتے ہوئے کہا کہ کاشت کاروں کی بھرپور مدد کی جائے گی۔

انہوں نے کہا کہ کاشت کاروں کی بجٹ سے متعلق قابل عمل تجاویز کو شامل کریں گے،کاشت کاروں کو براہ راست ریلیف کی فراہمی حکومت کی ترجیح ہے۔

عبد الحفیظ شیخ کا کہنا تھا کہ بجلی ٹیرف، کھاد پر ڈیوٹی اور زرعی قرضوں پرمارک اپ کم کریں گے،50ارب کے زرعی پیکیج کی موزوں تقسیم پر تجاویز کا خیر مقدم کریں گے۔انہوں نے مزید کہا کہ کرونا وبا پر قابو پانے کے بعد زرعی شعبہ نمایاں ترقی کرسکتا ہے۔

اسلام آباد: وفاقی وزیر برائے سائنس اینڈ ٹیکنالوجی فواد چوہدری کا کہنا ہے کہ فرانسیسی کمپنی سے پاکستان کو ایک ملین ماسک کی تیاری کا پہلا آرڈر مل گیا۔

تفصیلات کے مطابق وزیراعظم عمران خان کی ’’میڈان پاکستان‘‘مہم میں بڑی پیشرفت سامنے آئی ہے۔حکومت نے میڈ ان پاکستان طبی سامان کی ایکسپورٹ پر کام تیز کر دیا۔

وفاقی کابینہ نے تیار کیے گئے ہینڈ سینیٹائزرز برآمد کرنے کی منظوری دی ہے، ہینڈ سینیٹائزرز یورپی ممالک کو ایکسپورٹ کیے جائیں گے۔فرانیسی کمپنی سے پاکستان کو ایک ملین ماسک کی تیاری کا پہلا آرڈر بھی مل گیا۔

وفاقی وزیر برائے سائنس اینڈ ٹیکنالوجی فواد چوہدری نے ماسک کا آرڈر ملنے کی تصدیق کرتے ہوئے کہا کہ فیصل آباد کی 2 ملوں کو ماسک کی تیاری کا آرڈر دیا گیا ہے۔

انہوں نے بتایا کہ مقامی طور پر تیار سینیٹائزر امریکا،یورپی ممالک تک ایکسپورٹ ہوسکیں گے،میڈ ان پاکستان مہم عالمی سطح پر کامیابی حاصل کرے گی۔

فواد چوہدری کا کہنا تھا کہ کسی بھی ملک کا مستقبل اب سائنس وٹیکنالوجی کے ساتھ وابستہ ہے،وزیراعظم اور آرمی چیف کی مشترکہ کوشش نہ ہوتی تو یہ کام نہ ہوتا۔

وفاقی وزیر نے کہا کہ وزیراعظم،آرمی چیف،چیئرمین جوائنٹ چیفس آف اسٹاف کمیٹی نے مدد کی،ریسرچ اینڈ ڈیولپمنٹ کے لیے سول ملٹری انٹر فیس بنایا جا رہاہے،امریکا،اسرائیل، چین کی طرز پر سول ملٹری ریسرچ میکنزم بنا رہے ہیں۔

انہوں نے مزید کہا کہ صرف ڈیڑھ ماہ میں پاکستان کو کئی ملین ڈالرز کا فائدہ ہوا،پاکستان میں ٹیکنالوجی اینڈ سائنس کو مزید تقویت ملے گی۔