اسلام آباد: حکومت نے سابق صدر پرویز مشرف کا معاملہ نمٹانےکا فیصلہ کرلیا ہے۔
حکومت پرویز مشرف کا معاملہ نمٹانے کے لیے تیار ہوگئی ہے، جس پر عمل درآمد کیلئے پارٹی میں مشاورت کے بعد حکمت عملی طے کرلی گئی ہے۔
ذرائع کا کہنا ہے کہ حکمران جماعت کی جانب سے قیادت پر دباؤ تھا کہ پرویز مشرف کا معاملہ نمٹا دیا جائے ، پرویز مشرف کے بیرون ملک جانے کے معاملے پر حکومت نے متعلقہ اسٹیک ہولڈرز کو اعتماد میں لینے کی کوششیں تیز کر دی ہیں۔
لاہور: سانحہ ماڈل ٹاؤن میں شہیدچودہ افراداورنوےکےقریب زخمیوں کامقدمہ تھانہ فیصل ٹاؤن میں درج کرلیاگیا، مقدمہ لاہور ہائیکورٹ کے حکم پرمنہاج القرآن سیکریٹریٹ کےڈائریکٹرڈاکٹرجوادحامدکی مدعیت درج کیاگیا۔
سانحہِ ماڈل ٹاؤن کےچودہ شہدا کی ایف آئی آر وفاقی حکومت کے احکامات کی روشنی میں تھانہ فیصل ٹاؤن میں درج کر لی گئی،رپورٹ کے مطابق ایڈیشنل سیشن جج نے وزیراعظم ،وزیر اعلی پنجاب، وفاقی وزرا اوردیگر پولیس حکام سمیت اکیس افراد کےخلاف مقدمہ درج کرنے کا حکم دیا،جسے چار وزراء نے لاہور ہائیکورٹ میں چیلنج کیا،لاہور ہائیکورٹ نے اپنے فیصلے میں ایڈشنل سیشن جج کےحکم کوبرقرار رکھا۔
وزیرِاعظم کی زیرصدارت اجلاس کے بعد فیصلہ ہوا کہ متاثرہ فریق کی شکایات کے مطابق مقدمہ درج کیاجائے،جس پر حکومت پنجاب نے پولیس کو ہدایت جاری کیں اور پولیس نے تھانہ فیصل ٹاؤن میں مقدمہ ایف آئی آر نمبر 696/14 درج کرلیا۔ مقدمہ میں شامل دفعات دفعہ 302قتل، 324اقدام قتل، 337زخمی کرنا، انسداد دہشتگردی ایکٹ7ATA،148اور149 پانچ سے زیادہ افرادکا حملے میں ملوث ہونا، 427توڑپھوڑکرنا، جبکہ اعانت کی دفعہ 109وزیراعلی شہبازشریف اور دیگر اہم شخصیات پر لگائی گئی۔ عدالتی حکم کے تحت گرفتاری جرم ثابت ہونے کےبعد کی جائےگی۔
ایف آئی آر میں نامزد ملزمان میں وزیراعلیٰ پنجاب شہباز شریف، حمزہ شہباز ، عابد شیر علی، خواجہ آصف، پرویز رشید، چوہدری نثار ، رانا ثنا اللہ ، ایس پی سیکیورٹی سلمان اور دیگر شامل ہیں
اسلام آباد: خواجہ سعد رفیق کا کہنا ہے کہ سانحہ ماڈل ٹاؤن کا مقدمہ وزیراعظم سمیت تمام نامزد اکیس افراد کے خلاف درج ہوگا،تحریک اںصاف کے مطالبات مان بھی لئے ہیں لیکن عمران خان وزیراعظم کے استعفے پر بضد ہیں۔
موجودہ سیاسی بحران کے حل کیلئے وزیراعظم نواز شریف کی زیر صدارت ن لیگ کا اہم اجلاس ہوا، اجلاس میں موجودہ صورتحال پر تبادلہ خیال کیا گیا، اجلاس کے بعد خواجہ سعد رفیق اور خواجہ آصف نے مشترکہ پریس کانفرنس کرتے ہوئے بریفنگ دی۔
خواجہ سعد رفیق کا کہنا تھا کہ تحریک انصاف کے تمام مطالبات مان لئے ہیں لیکن عمران خان وزیراعظم کے استعفے پر بضد ہیں، عمران خان نے وعدہ کیا تھا کہ وہ ریڈ زون میں نہیں آئیں گے پر انہوں نے وعدہ توڑ دیا، عمران خان سے آزادی مارچ ملتوی کرنے کی کئی بار درخواست کی۔
انہوں نے کہا کہ پارلیمنٹ بھی اس امر پرمتفق ہےکہ وزیراعظم کو مستعفی نہیں ہونا چاہیے۔ عمران خان ضد نہ کریں اور پارلیمنٹ کو یرغمال نہ بنائیں۔
حکومت نے سانحہ ماڈل ٹاؤن کی ایف آئی آر کے اندراج کا اعلان کردیا، پارلیمنٹ کے باہر میڈیا سے گفتگو میں وزیر خواجہ سعد رفیق نے کہا کہ مقدمہ تمام نامزد افراد کے خلاف درج ہوگا، انھوں نے کہا کہ اپیل کے حق سے بھی دستبردار ہوتے ہیں ایسے افسران سے تحقیقات کرائیں گے جن پرکسی کوشک نہ ہو۔
مبصرین کا کہنا ہے کہ ایف آئی آر اگر پہلے ہی کاٹ دی جاتی تو ملک اس سیاسی بحران سے نہ گزرتا۔
اسلام آباد: انقلابی آزادی مارچ کی تنی ہوئی سیاسی رسی کو ڈھیلا کرنے کے لئے رہنماؤں کے رابطے اور مشاورت میں تیزی آگئی ہے، ثالثی کی کوششوں کے لیے سیاسی جماعتیں سرگرم ہوچکی ہیں۔
انقلاب آزادی مارچ سےنمٹنےکیلئےحکومت نےدو مذاکراتی کمیٹیاں بنانے کا فیصلہ کرلیا ہے، چوہدری نثار کا کہنا ہے کہ طاہرالقادری اور عمران خان کے آئینی مطالبات مانے جا سکتے ہیں، مذاکراتی کیمٹی میں سیاسی جماعتوں کے دو اراکین شامل ہوں گے، پیپلزپارٹی سمیت دیگر سیاسی جماعتیں حالات کی سنگینی کو بھانپتے ہوئےثالثی کیلئے میدان میں سرگرم ہیں۔
ان حالات میں جماعت اسلامی کے امیرسراج الحق کی اہمیت سب سے زیادہ ہوگئی ہے، قومی اسمبلی میں قائد حزب اختلاف خورشید شاہ سراج الحق سے اہم ملاقات میں معاملات کو بات چیت کے ذریعے سلجھانے پرتجاویز دیں گے۔
حکومتی اور اتحادی اپوزیشن جماعتوں کا اجلاس آج طلب کرلیا گیا ہے، خورشید شاہ ، محمودخان اچکزئی ،آفتاب احمد شیرپاؤ اور غلام احمد بلور کے درمیان سیاسی تناؤ کو ختم کرنے کے لیے رابطےجاری ہیں۔
وزیر اعظم کے معاون خصوصی عرفان صدیقی طاہرالقادری سے ملاقات کےلئے کوششں کررہے ہیں، گورنر پنجاب اور الطاف حسین بھی طاہرالقادری کو راضی کرنے کےلئے بیک ڈور کوششیں کررہے ہیں
لاہور: گورنر پنجاب چودھری محمد سرور نے کہا ہے کہ حکومت وزیراعظم کے استعفی کے علاوہ تمام اپوزیشن کے مطالبات پر بات چیت کے لئے تیار ہے۔
قائد حزب اختلاف میاں محمود الرشید کی طرف سے ملک میں جاری سیاسی بحران پر تبادلہ خیال کرتے ہوئے گورنر پنجاب نے واضح کیا کہ احتجاج اپوزیشن کا حق ہے لیکن اس سے ملکی سلامتی کو نقصان نہیں ہونا چاہیے، جمہوری قوتیں مذاکرات کے ذریعے بحران کا حل تلاش کریں، انہوں نے کہا کہ حکومت سیاسی قوتوں کے ذریعے مسائل کا حل چاہتی ہے۔
دوسری طرف گورنر پنجاب نے پاکستان عوامی تحریک کی قیادت سے بھی رابطہ کیا ہے تاکہ مسئلے کا حل تلاش کیا جاسکے، جس پر عوامی تحریک کی قیادت نے واضح کیا ہے کہ نظام کی تبدیلی سے کم پر حکومت سے بات چیت نہیں ہوسکتی۔
حکومت نے عمران خان کو پیغام پہنچا دیا کہ حکومت عمران خان کے آئینی مطالبات ماننے کو تیار ہیں، سیاسی درجہ حرارت میں کمی لانے کیلئے پنجاب کے گورنرچوہدری سرورآگے آگے رہیں اور رابطے شروع کردیئے۔
ملک میں بڑھتے سیاسی درجہ حرارت نے مقتدر حلقوں کے سیسوں کوپگھلانا شروع کردیا ہے، حکومت نے لچک دکھاتے ہوئےعمران خان کو پیغام بھیج دیا کہ وہ اُن کے آئینی مطالبات ماننے کو تیار ہیں۔
ذرائع کے مطابق حکومت الیکشن کمیشن کی تشکیل نوسمیت انتخابی اصلاحات کے مطا لبات تسلیم کرنے پر رضا مند ہے، سیاسی تناؤ کے حل میں وزیراعظم کی عمران خان سےملاقات بھی متوقع ہے۔
دوسری جانب حکومت نے رابطوں کیلئے گورنر پنجاب کے اثرورسوخ استعمال کرنا شروع کردیئے ہیں، گورنر پنجاب چودھری محمد سرور نے پی ٹی آئی اور حکومت میں ثالثی کردار امیرجماعت سراج الحق سے رابطہ کیا اور موجودہ سیاسی صورتحال پر تبادلہ خیال کیا۔
ملاقات کیلئے شہباز شریف کو اعتماد میں لےلیا، جماعت اسلامی کے رہنما لیاقت بلوچ کا کہنا تھا کہ مسائل حل کرنےکی کوشش کررہے ہیں، گورنر پنجاب چوہدری سرور نے گھمبیر سیاسی صورتحال کے حل کے لئے سینٹر رحمان ملک سے ٹیلی فونک گفتگوبھی کی۔
کراچی: یوسف رضا گیلانی نے کہا ہے کہ حکومت کو لانگ مارچ پر قدغن لگانے سے گریز کرنا چاہییں، قدغن سے تصادم اور تصادم سے جمہوریت کو خطرہ ہے۔
سابق وزیراعظم یوسف رضا گیلانی نے کراچی پریس کلب میں پیپلز پارٹی کی جانب سے منعقدہ یوم اقلیت کی تقریب سے خطاب کرتے ہوئے کہا کہ ملک میں مارشل لاء لگتے نظر نہیں آرہا، دونوں فریقین کو کو لچک دکھانی ہوگی، انہوں نے کہا کہ پیپلزپارٹی جمہوریت کو ڈی ریل کرنے کے عمل میں شریک نہیں ہوگی۔ عددی اعتبار سے نواز شریف مضبوط وزیراعظم ہیں۔
یوسف رضا گیلانی نے کہا کہ حکومت ٹھنڈی طبعیت کے ساتھ لانگ مارچ کا سامنا کرے، انہوں نے کہا کہ حکومت کو ڈرنے کے بجائے پارلیمنٹ سے رجوع کرنا چاہیے ، حکومت پارلیمنٹ کو مضبوط نہیں کرنا چاہتی ،اگر پارلیمنٹ مضبوط نہیں ہوگی تو جمہوریت پر وارہوسکتا ہے ۔
لاہور: وزیر اعلی پنجاب شہباز شریف نے کہا ہے مڈ ٹرم الیکشن کا سوال ہی پیدا نہیں ہوتا ۔
لاہور میں میڈیا سے گفتگو میں کہنا تھا ملک میں تبدیلی صرف انتخابات کے ذریعے ہی آسکتی ہے ، مڈ ٹرم الیکشن کا سوال ہی پیدا نہیں ہوتا، ان کا کہنا تھا پاکستا ن کےعوا م ہرلانگ مارچ کو نا کام بنا دیں گے،پاکستان کسی لانگ مارچ کے نتیجہ میں نہیں بنا،چودہ اگست تجدیدعہد کادن ہے، ان کا کہنا تھا لانگ مارچ کا مقصد معیشت کو ترقی کے سفرسےروکناہے۔
لاہور: حکومت پنجاب نے پاکستان عوامی تحریک کے خلاف کریک ڈاؤں کا اعلان کر دیا، وزیر قانون پنجاب رانا مشہود کہتے ہیں آج رات سے گرفتاریاں شروع کر دی جائیں گی، علامہ طاہر القادری کا مقدر جیل کی سلاخیں ہیں، طاہر القادری کے خلاف بغاوت کا مقدمہ درج ہوگا۔
لاہور میں ہنگامی پریس کانفرنس کرتے ہوئے رانا مشہود نے کہا کہ طاہر القادری پاکستان کا آئین اور قانون لپیٹنا چاہتے ہیں، ان کی سیاست لاشوں کی سیاست ہے، ان کا ایجنڈا تشدد ہے کیونکہ وہ اپنے کارکنان کو دنگا فساد اور قتل کرنے پر اکسا رہے ہیں اور اپنی تقریر میں کہہ رہے ہیں ڈنڈوں میں کیلیں لگالو تاہم کوئی غلط فہمی میں نہ رہے، ہم نے آخری حد تک صبر و تحمل کا مظاہرہ کیا لیکن قانون ہاتھ میں لینے والوں کو کسی صورت نہیں چھوڑا جائے گا۔
رانا مشہود کا کہنا تھا کہ طاہر القادری نے انقلاب مارچ کی آڑ میں عوام کی توجہ آپریشن ضرب عضب اور یوم آزادی سے ہٹانے کی کوشش کی، پاکستان عوامی تحریک نے 10 اگست کو پنجاب کے7 شہروں پر حملوں کا منصوبہ بنایا تھا اور آج ان کے کارکنوں نے حد پار کرتے ہوئے پولیس پر تشدد کیا جس میں 7 اہلکار زخمی ہوئے جبکہ انہوں نے ایک تھانہ بھی جلایا مگر پولیس امن کے لئے خاموش رہی تاہم اس غیر قانونی حرکت پر طاہر القادری کے خلاف بغاوت اور دہشت گردی کا مقدمہ ہوگا اور پولیس پر حملہ کرنے والوں کی گرفتاری کا عمل آج رات سے ہی شروع کردیا جائے گا۔
دبئی : پاکستان اور آئی ایم ایف کے درمیان مذاکرات کا آغاز آج سےدبئی میں ہورہاہے۔وزارت خزانہ کے ذرائع کے مطابق حکومت اور آئی ایم ایف کے درمیان مذاکرات آج سے دبئی میں ہورہے ہیں ۔مذاکرات میں گزشتہ مالی سال کی چوتھی سہہ ماہی کا معاشی جائزہ لیا جائے گا۔
ذرائع کے مطابق آئی ایم ایف کی جانب سے بجلی کی سبسڈی اور اضافے کا اطلاق نہ ہونے پر اعتراضات اٹھائےجانے کا امکان ہے۔حکومت نے رواں مالی سال کے بجٹ میں بجلی اورگیس کی قیمتوں اضافے کا اعلان کیا تھا۔