حکیم اجمل خان کا شمار 20 ویں صدی کے نہایت قابل اور مشہور مسلمان راہ نماؤں میں ہوتا ہے۔ وہ ایک ماہر طبیب اور ایسے نیک سرشت انسان بھی تھے جس نے اپنے پیشے کے ساتھ ساتھ تعلیم اور سماجی بہبود کے شعبوں میں خدمات انجام دے کر لوگوں کے دلوں میں جگہ بنائی۔
حکیم محمد اجمل کو متحدہ ہندوستان کے مشہور اور قابلِ ذکر اطبا میں جو امتیاز حاصل ہوا، اس میں ان کی انسان دوستی کا بھی بڑا دخل ہے اور انہی اوصاف کی بناء پر وہ برصغیر ہی نہیں عرب دنیا اور یورپ میں بھی پہچانے گئے۔
حکیم اجمل خان کی تعلیم و تربیت اس وقت کے فاضل اساتذہ کے زیرِ سایہ ہوئی۔ بعد میں ان کی توجّہ علمِ طبّ کی طرف ہوگئی۔ حکیم اجمل خان کھنڈہ شریفی میں 1868 میں پیدا ہوئے تھے۔ حکیم اجمل خان کے والد کا نام محمود خان تھا جو اپنے بزرگوں کی طرح حکمت کے پیشے سے وابستہ تھے۔ اجمل خان قرآنِ پاک حفظ کیا اور عربی، فارسی، اردو اور انگریزی زبانیں سیکھیں۔ اس زمانے میں طبّی تعلیم عربی مصادرِ طبّ کے ذریعے دی جاتی تھی۔ حکیم صاحب نے اس پیشے میں اپنے علم اور تجربہ کی بدولت بڑا نام پایا۔ وہ رام پور گئے تو وہاں علّامہ محمد طیّب عرب مکی سے خصوصی استفادہ کا موقع ملا۔ علّامہ طیّب کا وطن مکّہ معظمہ تھا، جہاں سے وہ نوجوانی ہی میں رام پور آگئے تھے۔ وہ عربی ادب اور معقولات کے امام تھے۔ تاریخ، انسابِ عرب اور عربی شاعری میں وسیع معلومات رکھتے تھے۔ ایسے ذی علم کی صحبت میں حکیم اجمل نے عربی زبان پر عبور حاصل کیا۔ اجمل خان اس قابل ہوگئے کہ عربی میں تصنیف و تالیف کر کے امتیازی شناخت بنا لی۔ قیامِ رام پور کے دوران حکیم صاحب کو اپنے ذوقِ مطالعہ کی آبیاری کا موقع یوں ملا کہ ریاست کا قدیم اور بے مثال کتب خانہ ان کے سپرد کردیا گیا۔ حکیم صاحب نے اس علمی ذخیرے اور خاص طور پر عربی کتب سے بھرپور استفادہ کیا۔ ان کا ایک اہم علمی کارنامہ یہ ہے کہ اس زمانے میں کتب خانے کی عربی کتابوں کی فہرست تیّار کروا کے اس کی طباعت کروائی تھی۔ اسی زمانے میں حکیم اجمل خان نے طبّی موضوعات پر تصنیف و تالیف کا بھی سلسلہ شروع کیا اور یہ کتب آج بھی طلبہ کی راہ نمائی کرتی ہیں۔ حکیم صاحب کی واحد کتاب رسالۂ طاعون کے علاوہ ان کی تمام تصانیف عربی زبان میں ہیں۔ ان میں القول المرغوب فی الماءُ المشروب، الساعاتیۃ، البیانُ الحسن بشرحِ المعجون المسمّیٰ باکسیرُالبدن، الوجیزۃ، مقدمۃُ اللّغاتُ الطبیۃ و دیگر شامل ہیں۔
حکیم اجمل کی ان تصانیف میں خاص طور پر آخرُالذّکر بہت اہمیت رکھتی ہے کیوں کہ وہ کئی پہلوؤں سے افادی ہے جس میں اس کے موضوع طبّ کا احاطہ کرتے ہوئے ہوئے مصنّف نے لغت نویسی کے اصول و مبادی بیان کیے ہیں۔ حکیم اجمل نے اس کتاب میں دونوں موضوعات کو جس خوب صورتی سے جمع کر دیا ہے اور جس دقّت نظری سے اس میں مباحث چھیڑے ہیں اس کی مثال کم ہی ملتی ہے۔
حکیم اجمل خان اسلامیانِ ہند کے ایک بڑے خیر خواہ اور اپنے وقت کے قابلِ قدر سیاسی راہ نما بھی تھے جن کی ہندوستان کی سیاست میں رائے کو بڑی اہمیت دی جاتی تھی۔ حکیم اجمل خان کی کوششوں سے ہندوستان میں طبّی کانفرنس کا انعقاد اور طبّی کالج کا قیام بھی عمل میں آیا۔
حکیم اجمل نے عالمِ عرب کی سیّاحت بھی کی اور مختلف شہروں میں ہندوستانی حاذق طبیب کی حیثیت سے ان کا جانا ہوا۔ انھوں نے پہلا سفر مارچ 1905ء میں عراق کا کیا، جہاں تقریباً تین ماہ گزارا اور بصرہ، نجف، کربلا اور دیگر متبرک و تاریخی مقامات کی زیارت کی۔ جب کہ 1911ء میں یورپ کی سیر بھی کی جس میں لندن، کیمبرج، آکسفورڈ کے علاوہ فرانس اور جرمنی کے متعدد شہروں میں قیام کیا۔ اپنے اس دورے میں حکیم اجمل خان نے وہاں کے تعلیمی اداروں، اسپتالوں، میوزیم اور لائبریریوں کا معائنہ کیا اور نادر کتابیں اور مخطوطات دیکھے۔ اس سفر کے دوران وہ ترکی اور مصر بھی گئے اور وہاں کی علمی شخصیات سے ملاقات کی اور اہم مخطوطات کے مطالعہ میں وقت گزارا۔
انھوں نے تیسرا سفر بھی یورپ کا کیا اور یہ بات ہے 1925ء کی۔ وہ تقریباً ڈیڑھ ماہ سوئٹزر لینڈ میں رہے۔ واپسی میں وہ مصر، شام، فلسطین اور لبنان گئے جہاں کی اہم علمی و ادبی شخصیات اور قابل اطبا و اساتذہ سے ملاقات کرتے ہوئے ان کے علمی کارناموں اور کتابوں کی معلومات اکٹھی کرکے وطن لوٹے۔
29 دسمبر 1927ء کو طبِّ یونانی کے اس ماہر اور مشہور طبیب کی زندگی کا سفر تمام ہوگیا۔ وہ دہلی میں اپنے خاندانی قبرستان میں آسودۂ خاک ہوئے۔
حکیم اجمل خان کو مسیحُ الملک کے نام سے بھی یاد کیا جاتا ہے۔
