Tag: حیدر آباد

پی ٹی آئی رہنما ہنگورو کا ساتھیوں کے ساتھ حیدر آباد میں تھانے پر دھاوا

حیدرآباد: پاکستان تحریکِ انصاف کے رہنما علی ہنگورو نے ساتھیوں کے ساتھ حیدر آباد میں تھانے پر دھاوا بول دیا، پولیس کو ٹھیک کرنے کی دھمکیاں دے دیں۔

تفصیلات کے مطابق پی ٹی آئی رہنماؤں کی سرکاری اہل کاروں کو دھونس دھمکیوں کا سلسلہ جاری ہے، حیدر آباد میں ہنگورو نے اپنے ساتھیوں سمیت تھانے کے عملے کو دھمکایا۔

[bs-quote quote=”پارٹی قیادت نے علی ہنگورو کو شو کاز نوٹس جاری کر دیا” style=”style-7″ align=”left” color=”#dd3333″][/bs-quote]

تحریکِ انصاف کے رہنما نے کار حادثے میں ملوث ملزم کو چھڑانے کی کوشش کرتے ہوئے پولیس کو دھمکیاں دیں، تھانے میں ہنگامہ مچانے پر پارٹی قیادت نے بھی ایکشن لے لیا۔

علی ہنگورو نے حیدر آباد میں تھانے کے اندر سگریٹ نوشی بھی کی، پولیس اہل کاروں نے انھیں روکا تو ان کے ساتھ بد تمیزی کرتے ہوئے کہا ’سگریٹ پی رہا ہوں چرس نہیں۔‘

تھانے میں علی ہنگورو کی ہنگامہ آرائی پر پی ٹی آئی قیادت نے فوری ایکشن لے لیا، رہنما کو شو کاز نوٹس بھی جاری کر دیا گیا۔

یہ بھی پڑھیں: شہری پر تشدد ، تحریک انصاف نے ڈاکٹرعمران علی شاہ کی پارٹی رکنیت معطل کردی

واضح رہے کہ حیدر آباد میں کار حادثے کا مذکورہ واقعہ دو دن قبل رات کے وقت پیش آیا تھا، ایک شخص نے تیز رفتاری سے کار ڈرائیو کرتے ہوئے بجلی کے پول سے ٹکرا دی تھی۔

مکی شاہ اسٹیشن کے تھانے کے اہل کاروں نے حادثے میں ملوث شخص کو گرفتار کر لیا تھا جس پر پی ٹی آئی حیدر آباد کے رہنما علی ہنگورو نے تھانے جا کر بد تمیزی کی جس کی ویڈیو وائرل ہو گئی۔

اکتوبر 4, 2018
تشدد کیس، انکوائری کمیٹی کا سامنا کرنے کے بجائے ڈی ایس پی حیدرآباد پہنچ گئے

کراچی : فیروز آباد تھانے میں نوجوانوں کو تشدد کا نشانہ بنانے والے معطل ڈی ایس پی یعقوب جٹ انکوائری کمیٹی کا سامنا کرنے کے بجائے حیدر آباد چلے گئے ہیں، پولیس اپنے پیٹی بھائی کو بچانے کے لیے سرگرم ہو گئی ہے.

تفصیلات کے مطابق سابق ڈی ایس پی یعقوب جٹ آئی جی سندھ کی جانب سے تشکیل دی گئی تحقیقاتی کمیٹی کا سامنا کرنے کے بجائے حیدر آباد چلے گئے ہیں جس سے تحقیقات میں مشکل پیش آسکتی ہیں اور مقدمہ طول پکڑ سکتا ہے.

ڈی ایس پی یعقوب جٹ نے میڈیا سے گفتگو کرتے ہوئے بتایا کہ میں اس وقت حیدر آباد میں ہوں تاہم اگر انکوائری کے لیے بلایا جائے گا تو واپس کراچی آجاؤں گا اور انکوائری کمیٹی کے سامنے پیش ہونے میں را تردد نہیں کروں گا.

خیال رہے کہ فیروز آباد تھانے میں دو نوجوانوں کو برہنہ کرکے تشدد کرنے پر آئی جی سندھ نے نوٹس لیتے ہوئے ڈی آئی جی ساؤتھ کو انکوائری افسر مقرر کردیا ہے جس کے لیے باقاعدہ تحریری حکم نامہ بھی جاری کردیا گیا ہے.

اے آر وائی نیوز نے آئی جی سندھ کے آرڈر کی کاپی حاصل کرلی ہے جس میں ڈی آئی جی کو 7 روز میں انکوائری مکمل کر کے رپورٹ دینے کی ہدایت کی گئی ہے تاہم اس سے قبل ہی یعقوب جٹ حیدرآباد روانہ ہوگئے ہیں.

یاد رہے کہ 21 دسمبر کی شب ڈی ایس پی یعقوب جٹ نے پولیس لائن کے رہائشی دو نوجوانوں کو گھروں سے اُٹھا کر تھانے کی چھت پر برہنہ کر کے تشدد کا نشانہ بنایا تھا جس کے بعد اہل خانہ کے احتجاج اور میڈیا کے دباؤ کے باعث پہلے تو ڈی ایس پی کسی بھی تشدد سے انکار کرتے رہے تاہم ویڈیو نے بھانڈا پھوڑ دیا تھا.

دسمبر 23, 2017
ن لیگ اورعمران خان کو سندھ سے کوئی دلچسپی نہیں، مولابخش چانڈیو

حیدر آباد: پیپلز پارٹی کے سینئر رہنما مولابخش چانڈیو نے کہا ہے کہ نواز لیگ اورعمران خان کو سندھ سے کوئی دلچسپی نہیں ہے، پنجاب کے وزراء تعصب کو ہوا دیتے ہیں۔

ان خیالات کا اظہار انہوں نے لطیف آباد میں میڈیا سے گفتگو کرتے ہوئے کیا، مولابخش چانڈیو نے کہا کہ چیئرمین پی ٹی آئی عمران خان کو سندھ کے حوالے سے ٹوپی پہنائی جارہی ہے۔

ن لیگ اورعمران خان کو سندھ سے دلچسپی نہیں، تو جو نہیں ہے تو کچھ بھی نہیں ہے کی پالیسی اچھی نہیں ہے، ان کا مزید کہنا تھا کہ عمران خان کے خیبرپختونخوا میں ترقی کے تمام دعوے جھوٹے ہیں۔

انہوں نے کہا کہ ہم پر الزامات لگانے والےتھک گئے ہیں لیکن ہم نہیں تھکے، ہم گالیاں نہیں دیتے پاکستان کی سالمیت کی بات کرتے ہیں۔

ایک سوال کے جواب میں ان کا کہنا تھا کہ جس عدالت نے یہ کہا کہ دھرنے والوں کو ہٹاؤ، اسی عدالت نے یہ بھی کہا کہ حکومت ناکام ہوگئی ہے۔ ہمارے زمانے میں بھی دھرنے ہوئے ہم نےبات چیت سے مسئلہ کو حل کیا، بحران پوری قوم کو ساتھ لے کرحل کرنے ہوتے ہیں۔

مزید پڑھیں: عمران خان کبھی وزیراعظم نہیں بن سکتے، مولابخش چانڈیو

ان کا مزید کہنا تھا کہ ملک میں جمہوریت کو لاحق خطرات ابھی ختم نہیں ہوئے، پیپلزپارٹی ہردور میں جمہوریت کی بقاء کیلئے سرگرم رہی ہے۔

نومبر 20, 2017
وزیر اعظم کا حیدر آباد میں انٹرنیشنل ایئر پورٹ بنانے کا اعلان

حیدر آباد: وزیر اعظم میاں نواز شریف نے ن لیگ کے ورکرز کنونشن سے خطاب کرتے ہوئے کہا کہ پاکستان تبدیل ہورہا ہے۔ انہوں نے حیدر آباد کے لیے انٹرنیشنل ایئر پورٹ اور میٹرو بس کے منصوبے کا اعلان کیا۔

تفصیلات کے مطابق وزیر اعظم نواز شریف آج ایک روزے دورے پر حیدر آباد پہنچے جہاں مسلم لیگ کے کارکنان نے وزیر اعظم کا استقبال کیا۔

وزیر اعظم کی آمد کے موقع پر ورکرز کنونشن بھی منعقد کیا گیا۔ کنونشن سے خطاب کرتے ہوئے وزیر اعظم کا کہنا تھا کہ حیدر آباد سے موٹر وے سکھر اور پھر ملتان جائے گی۔ موٹر وے سے کراچی سے پشاور ایک دن میں پہنچیں گے۔

انہوں نے کہا کہ پاکستان بدل رہا ہے، ترقی کر رہا ہے۔ اس سے پہلے کوئی غیر ملکی سرمایہ کار کراچی یا پاکستان آنے کو تیار نہیں تھا۔2013 سنہ تک برا حال تھا۔ ہر طرف بے چینی تھی۔

وزیر اعظم کا کہنا تھا کہ حیدر آباد میں سڑکیں ٹوٹی ہوئی ہیں اور پینے کا پانی نہیں۔ کراچی کا تذکرہ کرتے ہوئے انہوں نے کہا کہ کراچی جاتا ہوں تو ہر جگہ کچرے کے ڈھیرے اور دھول ہی دھول ہے۔

حیدر آباد کے لیے ترقیاتی منصوبے

وزیر اعظم نے اپنے خطاب میں حیدر آباد کے لیے متعدد ترقیاتی منصوبوں کا اعلان کیا۔ انہوں نے حیدر آباد کے لیے انٹرنیشنل ایئر پورٹ، میٹرو بس کے منصوبے اور یونیورسٹی بنانے کا اعلان کیا۔ انہوں نے کہا کہ وہ یونیورسٹی کے لیے 100 کروڑ روپے فراہم کریں گے۔

انہوں نے حیدر آباد میں ہیلتھ کارڈ کے اجرا کا بھی اعلان کیا اور کہا کہ بہت جلد مریم نواز آ کر کارڈ کا اجرا کریں گی۔

علاوہ ازیں وزیر اعظم نے حیدر آباد کے لیے 50 کروڑ روپے کی گرانٹ کا بھی اعلان کیا۔

ن لیگ کے کارکنان کا احتجاج

اس سے قبل وزیر اعظم حیدر آباد پہنچے جس کے بعد وہ مگسی ہاؤس گئے۔ انہوں نے مگسی ہاؤس میں پاکستان مسلم لیگ ن سندھ کے اہم رہنماؤں سے ملاقات کی اور پارٹی امور پر تبادلہ خیال کیا۔

اس موقع پر سندھ سے تعلق رکھنے والے ن لیگ کے ناراض کارکنوں نے حیدر آباد پریس کلب کے سامنے احتجاج کیا۔ کفن پوش ناراض کارکنان نے پارٹی کا علامتی جنازہ نکالا اور نعرے لگائے۔

ناراض کارکنان کا شکوہ تھا کہ مقامی قیادت ان کو نظر انداز کر رہی ہے اور ان کے مسائل حل نہیں کیے جاتے، ان کی نہیں سنی جاتی۔

کارکنان کا کہنا تھا کہ وہ وزیر اعظم کے سامنے بھی احتجاجی مظاہرہ کریں گے۔ انہوں نے وزیر اعظم سے مطالبہ کیا کہ سندھ کی موجودہ صوبائی تنظیم کو تحلیل کر کے نئی تنظیم سازی کی جائے۔

وزیر اعظم کی آمد کے موقع پر حیدر آباد میں سیکیورٹی کے سخت ترین انتظامات کیے گئے ہیں۔

وزیراعظم کو 10 تولہ سونے کا تاج نہیں پہنایا جاسکا

دریں اثنا وزیراعظم نواز شریف کو 10 تولہ سونے کا تاج نہیں پہنایا جاسکا، تاجروں نے ان کے لیے یہ خصوصی تاج تیار کیا تھا۔

اطلاعات ہیں کہ سیکیورٹی وجوہات کی بنا پربزنس فورم کے ارکان کو وزیراعظم کو تاج پہنانے سے روک دیا گیا۔

مارچ 27, 2017
معطلی کے باوجود شرجیل خان کی نیازاسٹیڈیم میں نیٹ پریکٹس

حیدر آباد : اسپاٹ فکسنگ اسکینڈل میں معطل ہونے والے کھلاڑی شرجیل خان نے حیدرآباد کے نیاز اسٹیڈیم میں پریکٹس کی قانونی طور پر معطل کھلاڑی پی سی بی کی کسی بھی قسم کی سہولیات سے فائدہ نہیں اٹھا سکتا، بیٹنگ کے دوران شرجیل نے میڈیا سے بات کرنے سے انکار کردیا۔

تفصیلات کے مطابق پی ایس ایل اسپاٹ فکسنگ کے الزام میں معطل ہونے والے حیدرآباد کے کرکٹر شرجیل خان نے کرکٹ کے میدان میں دبنگ انٹری دے دی، کئی دنوں سے غائب شرجیل خان حیدرآباد کے نیاز اسٹیڈیم پہنچے اور وہاں نیٹ پر پریکٹس کرتے رہے۔

بائیں ہاتھ کے ہارڈ ہٹنگ بیٹسمین شرجیل نیٹ پریکٹس میں بولرز کو زور دار شاٹس لگاتے رہے، ان کی بیٹنگ سے لگ رہا تھا کہ وہ اپنا غصہ نکال رہے ہوں۔ پریکٹس کے دوران اے آر وائی نیوز کے نمائندے نے شرجیل خان سے بات کرنے کی بھی کوشش کی، لیکن شرجیل نے صاف انکار کردیا۔

یاد رہے کہ پی سی بی قواعد وضوابط کے مطابق کوئی بھی معطل کرکٹر پی سی بی کی کوئی بھی سہولت سے فائدہ نہیں اٹھا سکتا، لیکن شرجیل نے نیٹ پر پریکٹس کی اور وہ بھی قومی ٹیم کا ہیلمٹ پہن کر۔

واضح رہے کہ پی سی بی اس غیرقانونی اقدام پر شرجیل خان اور حیدرآباد ریجن کے خلاف کاروائی کر سکتا ہے۔

مارچ 14, 2017
تیز رفتار یونیورسٹی بس کی زد میں آ کر طالبہ جاں بحق

حیدر آباد: صوبہ سندھ کے شہر حیدر آباد میں طالبہ سندھ یونیورسٹی کی بس کی زد میں آ کر شدید زخمی اور بعد ازاں جاں بحق ہوگئی۔ یونیورسٹی کے ہزاروں طلبہ نے بس کو گھیر کر احتجاج اور نیشنل ہائی وے کی جانب مارچ کیا۔

تفصیلات کے مطابق حیدرآباد میں سندھ یونیورسٹی کے تیز رفتار پوائنٹ کی زد میں آ کر ایک طالبہ زخمی ہو گئی جسے فوری طور پر اسپتال منتقل کیا گیا، تاہم وہ زخموں کی تاب نہ لاتے ہوئے جاں بحق ہوگئی۔

حادثے کی اطلاع پہنچتے ہی یونیورسٹی کے طلبہ و طالبات سڑکوں پر نکل آئے اور انتظامیہ کے خلاف شدید احتجاج کیا۔ احتجاج میں شامل طلبہ کا کہنا تھا کہ بس کے نیچے طالبہ کے آنے کے بعد بھی ڈرائیور نے بس نہیں روکی۔

طلبہ نے اسپتال میں ہنگامہ آرائی کی جبکہ کچھ طلبا نے احتجاجاً سپر ہائی وے بلاک کر دیا جس سے گاڑیوں کی طویل قطاریں لگ گئیں۔ بعد ازاں انہوں نے نیشنل ہائی وے کی جانب مارچ کیا۔ جاں بحق طالبہ کے اہل خانہ اور طلبا نے انڈس ہائی وے پر لاش رکھ کر بھی احتجاج کیا۔

بعد ازاں سندھ یونیورسٹی کے وائس چانسلر احتجاجی طلبا سے مذاکرات کے لیے پہنچے۔ وائس چانسلر کا کہنا تھا کہ طالبہ کے قتل کا انصاف ہوگا اور ٹرانسپورٹ کے معاملات میں تبدیلی لائی جائے گی۔

وائس چانسلر کی یقین دہانی پر طلبہ نے احتجاج ختم کرتے ہو ئے مطالبہ کیا کہ یونیورسٹی کے ٹرانسپورٹ نظام کو فوری طور پر درست کیا جائے۔

یاد رہے کہ چند روز قبل کراچی میں بھی اسی نوعیت کے واقعات پیش آچکے ہیں جن میں کراچی کے علاقے گلشن اقبال میں یونیورسٹی روڈ پر تیز رفتار بس بے قابو ہوگئی اور بس اسٹاپ پر کھڑے افراد کو کچلتی چلی گئی۔ حادثے میں وفاقی جامعہ اردو کی 3 ہونہار طالبات سمیت 4 افراد جاں بحق ہوگئے تھے۔

اس سے قبل یونیورسٹی ہی کے قریب ایک اور ٹریفک حادثے میں طالبہ ہنزہ خان شدید زخمی ہو کر 2 ہفتہ موت و زیست کی کشمکش میں مبتلا رہنے کے بعد چل بسی تھیں۔ دونوں واقعات کے خلاف طلبا نے شدید احتجاج کرتے ہوئے سڑک کو بلاک کردیا تھا اور وائس چانسلر کی برطرفی کا مطالبہ کیا تھا۔

فروری 16, 2017
طالبہ خودکشی کیس: ملزم انیس خاصخیلی کا 6 روزہ ریمانڈ

حیدر آباد: سندھ یونیورسٹی میں طالبہ نائلہ کی خودکشی کیس میں عدالت نے ملزم انیس خاصخیلی کو 6 روزہ ریمانڈ پر پولیس کے حوالے کر دیا۔

تفصیلات کے مطابق حیدر آباد سندھ یونیورسٹی کی طالبہ نائلہ کیس کی سماعت ہوئی۔ ملزم انیس خاصخیلی کو ڈسٹرکٹ اینڈ سیشن جج کی عدالت میں پیش کیا گیا۔

سماعت کے دوران پولیس نے ملزم کے 15 روزہ جسمانی ریمانڈ کی درخواست کی تاہم عدالت نے انیس خاصخیلی کو 6 روزہ جسمانی ریمانڈ پر پولیس کے حوالے کر دیا۔

واضح رہے کہ چند روز قبل سندھ یونیورسٹی کے ہاسٹل سے طالبہ نائلہ کی لاش برآمد ہوئی تھی۔ پولیس نے یونیورسٹی کے طالبعلم انیس خاصخیلی کو گرفتار کر کے موبائل سے نائلہ کی تصویریں اور ویڈیوز برآمد کی تھیں۔

پولیس حکام کا کہنا تھا کہ یونیورسٹی کے سابق طالبعلم انیس نے نائلہ کو شادی کا جھانسہ دیا۔ انیس کے انکار کے بعد نائلہ نے دلبرداشتہ ہو کر خودکشی کی۔

جنوری 7, 2017
پیپلزپارٹی کیخلاف کارروائی حکمرانوں کو بھگتنا پڑے گی، مولا بخش چانڈیو

حیدر آباد : مشیر اطلاعات سندھ مولا بخش چانڈیو نے کہا ہے کہ اب حکومت سے مفاہمت نہیں مقابلہ ہوگا، اپنی اڑان کل بی بی کی برسی میں بتائیں گے، پیپلز پارٹی کیخلاف انتقامی کارروائی حکومت کو بھگتنا پڑے گی، سندھ کے وزیر ٹرانسپورٹ ناصرشاہ نےبھی انورمجید کےخلاف کارروائی میں بھی چوہدری نثار کی جانب انگلی اٹھادی۔

تفصیلات کے مطابق حیدر آباد میں پریس کانفرنس کرتے ہوئے پیپلزپارٹی کے وزراء نے ایک بارپھر چوہدری نثار پر چڑھائی کردی۔

مشیر اطلاعات سندھ مولا بخش چانڈیو نے کہا کہ پیپلز پارٹی کیخلاف انتقامی کارروائی حکومت کو بھگتنا پڑے گی، آپ کے ظلم و ستم سے پیپلز پارٹی ختم نہیں ہو گی۔ ایک ماہ پہلے تک حکومت پریشان تھی لیکن راحیل شریف کے جانے سے اس میں جان آ گئی ہے۔ ان ہمراہ صوبائی وزیر ٹرانسپورٹ ناصرشاہ بھی موجود تھے۔

مولا بخش چانڈیو کا مزید کہنا تھا کہ وزراء کہتے تھے کہ فوج اور ہم ایک صفحے پر ہیں لیکن اب نیشنل ایکشن پلان کا جائزہ لینے کی باتیں کی جا رہی ہیں۔

انہوں نے کہا کہ حکومت مقدمات بنائے جو انتقامی کارروائیاں کرنا چاہے کر لے لیکن اس کے نتائج اسے بھگتنا ہی پڑیں گے۔ ہم محب وطن ہیں اور ہمیں کوئی خوف نہیں ہے۔ آپ کے ظلم و ستم سے پارٹی کی رفتار سست تو ہو سکتی ہے لیکن پیپلز پارٹی کبھی ختم نہیں ہو سکی۔

مزید پڑھیں : آصف زرداری کی واپسی سے مخالفین میں کھلبلی مچ گئی ہے، مولا بخش چانڈیو

بینظیر بھٹو شہید ہو گئیں مگر پی پی آ ج بھی قائم ہے، اسے ختم کرنے کی سوچ لئے کئی لوگ مر کھپ گئے۔ ناصر شاہ نے کراچی میں انورمجید کے خلاف کارروائی میں بھی چوہدری نثار کی جانب انگلی اٹھاتے ہوئے کہا کہ یہ کارروائیاں رینجرز کے لیےبھی سوالیہ نشان ہیں۔

مزید پڑھیں : رینجرز کی کارروائیوں سے سیاسی انتقام کا تاثر ابھرا، مولا بخش

ڈی جی رینجرز کو دیکھنا ہوگا کہ کوئی انہیں ناکام کرنا تو نہیں چاہتا، انہوں نے کہا کہ سابق صدرآصف زرداری یہ بات کہہ چکے ہیں کہ انورمجید سے ان کےقریبی تعلقات ہیں جس کا وہ انکار نہیں کرتے۔ وزیرداخلہ کےاشارے پر انورمجید کے خلاف کارروائی کی گئی۔

دسمبر 26, 2016
حیدر آباد: رینجرز کی بروقت کارروائی، خودکش بمبار ہلاک

حیدرآباد: حیدر آباد بڑی تباہی سے بچ گیا۔ لطیف آباد امام بارگاہ میں گھسنے کی کوشش کرنے والا خودکش بمبار مارا گیا۔ بم ڈسپوزل اسکواڈ نے خودکش جیکٹ ناکارہ بنا دی۔

تفصیلات کے مطابق قانون نافذ کرنے والے اداروں نے بروقت کارروائی کرتے ہوئے حیدرآباد کو بڑی تباہی سے بچا لیا۔ لطیف آباد میں دہشت گردی کی کوشش ناکام بنادی گئی۔

ترجمان رینجرز کے مطابق رینجرز کی بروقت کارروائی میں خودکش بمبار مارا گیا۔ ترجمان کا کہنا ہے کہ خودکش بمبار نے امام بارگاہ میں داخل ہونے کی کوشش کی۔ نماز جمعہ کے دوران خودکش بمبار نے رینجرز کی موبائل پر دستی بم سے حملہ بھی کیا۔

ہلاک بمبار سے خود کش جیکٹ، اسلحہ اور ایمونیشن بھی برآمد ہوا۔

ترجمان کے مطابق ہلاک دہشت گرد کا ایک اور ساتھی تھا جو فرار ہونے میں کامیاب رہا تاہم اس کی تلاش جاری ہے۔

دسمبر 16, 2016
عوام کو حقوق نہ دینا قوم پر حملے کے مترادف ہے، مصطفیٰ کمال

کراچی : پاک سرزمین پارٹی کے سربراہ سید مصطفیٰ کمال کا کہنا ہے کہ سب سیاست کر رہے ہیں عوام کے مسائل پر کوئی بات نہیں کررہا ہے نہ نظام کو بہتر بنانے کے لیے ٹھوس قدم اُٹھائے جا رہے ہیں۔

وہ کراچی میں واقع اپنی جماعت کے مرکزی آفس میں میڈیا سے بات کر رہے تھے انہوں نے کہا کہ پاکستان میں سب اپنی اپنی سیاست چمکا رہے ہیں کوئی عوامی مسائل،م اور ان کے حل پر بات نہیں کرتا۔

مصطفی کمال کا کہنا تھا کہ پاکستان میں دو کروڑ سے زائد بچے صاف پانی اور غذائی قلت کی وجہ ذہنی اور جسمانی امراض میں مبتلا ہو چکے ہمارا مستقبل تباہ ہو رہا ہے ہیں جس کے لیے کسی کو ہم پر جنگ مسلط کرنے کی ضرورت نہیں ہمارے مسائل ہی ہمیں تباہ کرنے کو کافی ہیں۔

پاک سرزمین پارٹی کے سربراہ نے کہا کہ ہمیں محض بجلی ہی نہیں چاہیے بلکہ سستی بجلی اور گیس چاہیے، پینے کو صاف پانی چاہیے،بچوں بزرگوں کو جدید اسپتال اور نوجوانوں کو نوکریاں چاہیے، پینشن نہ ملنے کی وجہ سے بزرگ چھ منزلہ عمارت سے چھلانگ لگا رہے ہیں۔

انہوں نے کہا کہ ہم پکا قلعہ گراؤند کے سامنے 23 دسمبر کو جلسہ عام کرنے جارہے ہیں اس میں ان تمام مسائل پر نہ صرف یہ کہ پالیسی بیان دیں گے بلکہ ان کا حل بھی پیش کریں گے،عوام کو درپیش مسائل سے کسی طور صرفِ نظر نہیں کریں گے۔

نومبر 28, 2016