ARYNews.tv | Urdu – Har Lamha Bakhabar

Tag: حیرت انگیز

  • دنیا کے منفرد جڑواں بچے، جو الگ الگ سال میں پیدا ہوئے

    دنیا کے منفرد جڑواں بچے، جو الگ الگ سال میں پیدا ہوئے

    کیلیفورنیا: امریکا میں جڑواں بچوں کی پیدائش کا ایک ایسا حیرت انگیز واقعہ رونما ہوا ہے جس کے بارے میں جان کر لوگ حیران رہ گئے ہیں۔

    یہ واقعہ امریکی ریاست کیلیفورنیا کا ہے، جہاں ایک اسپتال میں ایک خاتون فاطمہ مدریگال نے جڑواں بچوں کو جنم دیا، لیکن یہ دنیا کے منفرد جڑواں بچے بن گئے کیوں کہ یہ الگ الگ سال میں پیدا ہوئے۔

    سال کے فرق سے پیدا ہونے والے ان جڑواں بہن بھائی کی نہ صرف سال گرہ کا دن الگ ہوگا، بلکہ مہینہ اور سال بھی الگ ہوگا۔

    یہ بچے دراصل 15 منٹ کے فرق سے پیدا ہوئے، جس کی وجہ سے یہ عجیب صورت حال پیدا ہوئی ہے، بتایا جاتا ہے کہ اس طرح کے امکان کی شرح 20 لاکھ پیدائشوں میں سے ایک ہوتی ہے۔

    اسپتال کی جانب سے کیے گئے ٹوئٹ کے مطابق خاتون فاطمہ نے بیٹے الفریڈو کو 31 دسمبر کو رات 11 بج کر 45 منٹ پر جنم دیا، جب کہ 15 منٹ بعد رات کے 12 بجنے کے بعد یکم جنوری کو بیٹی آئلن کی پیدائش ہوئی۔

    اس طرح ایک بچہ 2021 اور دوسرا 2022 میں پیدا ہوا، اس 15 منٹ کے وقفے سے بچوں کی سالگرہ مختلف دن، مہینے اور سال میں ہوگی۔

    ایک رپورٹ کے مطابق امریکا میں ہر سال ایک لاکھ 20 ہزار جڑواں بچوں کی پیدائش ہوتی ہے جو تمام بچوں کی پیدائش کا 3 فی صد ہے مگر سالگرہ کی مختلف تاریخ کی شرح نہ ہونے کے برابر ہے۔

  • غوطہ خور اور سفید شارک بالکل آمنے سامنے آ گئے (دہشت ناک ویڈیو)

    غوطہ خور اور سفید شارک بالکل آمنے سامنے آ گئے (دہشت ناک ویڈیو)

    شمالی کیرولائنا: آپ نے شارک کی بہت سی خطرناک ویڈیوز دیکھی ہوں گی، لیکن یہ ویڈیو امریکی ریاست شمالی کیرولائنا کی ہے جس میں ایک غوطہ خور کو انتہائی خطرناک طور پر ایک بڑی شارک کے منہ کے بالکل قریب دیکھا جا سکتا ہے۔

    سمندر کی تہہ میں ویڈیوز بنانا خود ایک بہت ہمت کا کام ہے، لیکن اگر اس دوران آپ کے سامنے اچانک ایک بھیانک شارک آ جائے، اور آپ اس کی ویڈیو بنانے لگ جائیں تو یقیناً یہ آپ کی زندگی کے سب سے یادگار لمحات ہوں گے۔

    ایسے ہی ایک واقعے میں غوطہ خور اور سفید شارک بالکل آمنے سامنے آ گئے، ڈیوڈ شیرر نامی امریکی مچھیرے نے شمالی کیرولائنا کے آؤٹر بینکس ایریا میں ایک عظیم الجثہ سفید شارک کی شان دار ویڈیو بنا ڈالی، وہ اپنے اسپیئر گن کے ساتھ تیراکی کر رہا تھا کہ اچانک سفید شارک بالکل اس کے پاس آ گئی، اور اس نے اس کی ایک شان دار فوٹیج بنا لی۔

    یہ ویڈیو بڑی تیزی سے انٹرنیٹ پر وائرل ہوئی، ویڈیو دیکھتے ہوئے اندازہ ہوتا ہے کہ ڈیوڈ شیرر بظاہر کسی حملے کے خلاف اپنا دفاع کرنے کے لیے تیار تھا کیوں کہ وہ شکار کی طرف اپنی اسپیئر گن سے اشارہ کرتے ہوئے نظر آتا ہے۔

    شارک نے اتنے قریب آ کر بھی غوطہ خور کو کچھ نہیں کہا، شاید یہ اس کی خوش قسمتی تھی کہ شارک کے پاس شاید دوسرے منصوبے تھے اس لیے وہ مڑ کر چلی گئی۔

  • 18 ماہ بغیر دل زندہ رہنے والا شخص (ویڈیو)

    18 ماہ بغیر دل زندہ رہنے والا شخص (ویڈیو)

    مشیگن: امریکا میں ایک شخص 18 ماہ 20 دن تک بغیر دل زندہ رہا۔

    تفصیلات کے مطابق امریکی ریاست مشیگن کے ایک شہری اسٹین لارکن 555 دن تک بغیر دل کے زندہ رہے، اس دوران وہ اپنے دوستوں کے ساتھ کھیلوں کی سرگرمیوں میں بھی بھرپور حصہ لیتے رہے۔

    تقریباً دو سال تک موت کی دہلیز پر کھڑے رہنے والے لارکن نے اپنی ہمت سے لوگوں کو حیران کر دیا تھا۔

    میڈیا رپورٹس کے مطابق اسٹین لارکن کو 25 سال کی عمر میں فیملیئل ڈائلیٹڈ کارڈیومایوپیتھی (Familial dilated cardiomyopathy) کی بیماری لاحق ہوئی تھی، لارکن کی کہانی اس لیے بھی منفرد ہے کہ ان کے بڑے بھائی ڈومنیک کو بھی یہی بیماری لاحق تھی۔

    دراصل یہ دل کی بیماریوں میں ایک جینیاتی مرض ہے، یہ تب لاحق ہوتا ہے جب دل کے کم از کم کسی ایک چیمبر میں پٹھے پتلے اور کم زور ہو جاتے ہیں، جس سے دل کے اس خانے کا کھلا حصہ بڑا (dilated) ہو جاتا ہے، نتیجے کے طور پر دل معمول کی طرح مؤثر انداز میں خون پمپ کرنے سے قاصر ہو جاتا ہے۔

    اسٹین لارکن کو دل کے ٹرانسپلانٹ کی ضرورت تھی اور انھیں مستقل طور پر اسپتال میں رہنا تھا تاکہ ڈاکٹر ان کی مسلسل نگرانی کر سکیں، ڈاکٹرز نے ان کی پشت پر ایک مصنوعی دل لگایا جو 555 دن تک دھڑکتا رہا، اور انھیں زندہ رکھا۔

    2016 میں یونیورسٹی آف مشیگن کے امراض قلب کے مرکز کے ڈاکٹرز نے جب میچنگ دل والا ڈونر تلاش کر لیا تو انھوں نے لارکن کو مصنوعی دل سے ہٹا کر دل کی پیوند کاری کر دی۔

    لارکن کے دل کے اسپیشلسٹ ڈاکٹر جوناتھن ہافٹ کا کہنا تھا کہ جب وہ پہلی بار لارکن سے ملے تو وہ آئی سی یو میں لائف سپورٹ کی بہت ساری مشینوں پر رفتہ رفتہ موت کی جانب بڑھ رہا تھا، اسے مصنوعی دل پر شک بھی تھا لیکن زندہ رہنے کے لیے وہ اس ڈیوائس کو اپنے ساتھ لگائے رکھتا تھا۔

    دل کے ٹرانسپلانٹ کے بعد اسٹین لارکن صحت یاب ہو گئے اور وہ آج بھی زندہ ہیں، ان کے بڑے بھائی کا بھی 2015 میں دل کی پیوندکاری ہوئی تھی۔

    دونوں بھائیوں میں لڑکپن ہی میں فیملیئل سی ڈی ایم کی تشخیص ہوئی تھی، یہ ہارٹ فیلیئر کی ایسی قسم ہے جو صحت مند لوگوں کو بغیر تنبیہ اچانک حملہ کر کے گرا دیتی ہے۔ یہ وہ حالت ہے جس کا ایتھلیٹس میں اچانک موت سے بھی تعلق ہے۔

  • سی سی ٹی وی کیمرے نے وہ منظر قید کر لیا جسے دیکھ کر خوف سے رونگٹے کھڑے ہو گئے (ویڈیو)

    سی سی ٹی وی کیمرے نے وہ منظر قید کر لیا جسے دیکھ کر خوف سے رونگٹے کھڑے ہو گئے (ویڈیو)

    بھارت میں ایک ایسی ویڈیو سامنے آئی ہے جس نے دیکھنے والوں کے خوف سے رونگٹے کھڑے کر دیے، یہ بھارت کے کسی شہر کی ایک گلی کا منظر ہے جس میں کھڑی موٹر سائیکل اچانک خود بخود چل پڑی۔

    سی سی ٹی وی فوٹیج میں دیکھا جا سکتا ہے کہ گلی میں کھڑی موٹر سائیکل اچانک خود بخود چل پڑی اور پھر گر پڑی، یہ ویڈیو سوشل میڈیا پر بڑی تیزی سے وائرل ہوئی، اور بڑی تعداد میں لوگوں نے اسے دیکھا اور شیئر کیا۔

    سوشل میڈیا پر آئے دن ویڈیوز وائرل ہوتی رہتی ہیں، انھی میں سے کچھ ویڈیوز مافوق الفطرت سرگرمیوں پر بھی مبنی ہوتی ہیں جنھیں دیکھ کر صارفین اس کی توجیہہ نہیں کر پاتے، کبھی حیران ہوتے ہیں اور کبھی خوف زدہ، یہ بھی ایسی ہی ایک ویڈیو ہے۔

    اس ویڈیو میں گلی میں کھڑی بائیک خود بخود چل پڑتی نظر آتی ہے، یہ 30 سیکنڈز کی فوٹیج ٹوئٹر پر ایک صارف نے شیئر کی تو دیکھنے والوں کو اپنی ریڑھ کی ہڈی میں سنسنی دوڑتی محسوس ہوئی۔

    فوٹیج کے مطابق گلی میں ایک گھر کے سامنے دو بائیکس کھڑی ہیں، چند سیکنڈز کے بعد ایک بائیک نے خود سے حرکت شروع کر دی، بائیک دائرے میں تھوڑی سے گھومی اور پھر اچانک زمین پر گر پڑی، ویڈیو میں کوئی انسان نظر نہیں آتا۔

    ویڈیو شیئر کرنے والی صارف نے کیپشن لکھا کہ یہ منظر کیمرے میں قید ہو گیا ورنہ کوئی یقین نہ کرتا۔ سوشل میڈیا پر صارفین نے بھی اس پر مختلف تبصرے کیے، کسی نے اسے ناقابل یقین قرار دیا اور کسی نے مافوق الفطرت واقعات کو مذاق کا نشانہ بنایا۔

    ایک صارف نے لکھا بھوت نے پی رکھی تھی اس لیے گر گیا، ایک اور نے لکھا بھوتوں کو بھی ڈرائیونگ لائسنس پاس کرنا پڑتا ہے، تیسرے صارف نے لکھا یہ کس کی روح گھس گئی بائیک میں۔

  • امریکی شخص نے حیرت انگیز کارنامہ سر انجام دے دیا

    امریکی شخص نے حیرت انگیز کارنامہ سر انجام دے دیا

    اداہو: ڈیوڈ رش دنیا بھر میں گنیز بک آف ورلڈ ریکارڈ میں ڈیڑھ سو سے زائد بار اپنے نام درج کرانے کے باعث شہرت رکھتے ہیں، ایک بار پھر انہوں نے کارنامہ سر انجام دیتے ہوئے اپنے ریکارڈ میں اضافہ کیا ہے۔

    بین الاقوامی میڈیا رپورٹ کے مطابق اس بار انہوں نے کچھ حیرت انگیز کارنامہ سر انجام دیا، ڈیوڈ رش نے بتایا کہ منفرد ریکارڈ بنانے کے لئے انہوں نے اپنے پڑوسی جوناتھن ہنن کی مدد سے ایک منٹ میں زیادہ سے زیادہ کچے انڈے منہ کے زریعے پکڑنے کا ریکارڈ بنایا۔

    ڈیوڈ رش کو پڑوسی نے چھ اعشاریہ پانچ فٹ کے فاصلے سے کچے انڈے پھینکے، ایک منٹ کے دوران انہوں نے چوبیس انڈے پکڑے جبکہ اٹھارہ انڈے ٹوٹ گئے، رش کا کہنا تھا کہ انڈے ٹوٹنے کے باعث ان کا ہونٹ زخمی ہوا تاہم انہوں نے مقابلہ جاری رکھنے کا فیصلہ کیا، اس جدوجہد میں ڈیوڈ رش منہ سے پندرہ انڈے پکڑنے کا اپنا سابقہ ریکارڈ توڑا۔اس سے قبل گذشتہ ماہ بھی رش نے حیرت انگیز کارنامہ سر انجام دیتے ہوئے ایک بار پھر اپنا نام گنیز بک آف ورلڈ ریکارڈ میں درج کرایا تھا، رش نے اپنے منہ کے ذریعے ٹینس بال کو ایک ہی ترتیب کے ساتھ سامنے لگے شیشے سے ٹکرایا، ڈیوڈ نے محض تیس سیکنڈ میں 43 مرتبہ ٹینس بال کو منہ کے زریعے اچھال کر یہ ریکارڈ اپنے نام کیا، اس سے قبل یہ ریکارڈ برطانوی شہری رینالڈس نے سال دوہزار اٹھارہ میں بنایا تھا، مگر ان کی ٹینس بال فضا میں اچھالنے کی تعداد 34 تھی۔

    یہ بھی پڑھیں:  امریکی شہری نے 150سے زائد اعزازات اپنے نام کرلئے

    واضح رہے کہ ڈیوڈ رش اسٹیم ایجوکیشن کو فروغ دینے کے حوالے سے عالمی شہرت رکھتے ہیں۔

  • روس میں ندی خون کا منظر پیش کرنے لگی ، ویڈیو وائرل

    روس میں ندی خون کا منظر پیش کرنے لگی ، ویڈیو وائرل

    ماسکو: روس میں پر اسرار آلودگی کے باعث سرخ ہونے والی ندی میں بطخوں نے بھی تیرنے سے انکار کردیا ہے۔

    بین الاقوامی میڈیا رپورٹ کے مطابق اسکیٹیمکا ندی کا پانی پر اسرار طور پر چقندر کی طرح سرخ ہوا، اس سے قبل روس کی دو ندیاں اس طرح کی صورت حال سے گزر چکی ہے۔

    مقامی افراد کا کہنا ہے کہ یہ پانی کیمروو شہر کے بند نالے سے یہاں منتقل ہوا ہے، حیرت ناک امر یہ ہے کہ ندی کے پانی کو دیکھ کر بطخوں نے ندی میں تیرنے سے انکار کردیا ہے اور سارے بطخ کنارے پر آگئے ہیں۔

    دریائے اسکیٹمکا کی موجودہ صورت حال نے صنعتی کیمروو شہر کے رہائشیوں کو پریشانی میں مبتلا کردیا ہے، رہائشی الینا ڈوبروسکایا کا کہنا ہے کہ آج یہ دریا نہیں ہے ، یہ کرینبیری جیلی کی طرح ہے، مقامی افراد کا شکوہ ہے کہ انہیں اس آلودگی کی کوئی وجہ نہیں بتائی گئی ہے، یہ بھی واضح نہیں ہے اس صورت حال میں ڈیڑھ لاکھ افراد پر مشتمل آبادہ کی صحت کو خطرہ تو لاحق نہیں ہے۔

    یہ بھی پڑھیں:  ایک رات میں دریا کے پانی کا رنگ تبدیل، شہری خوفزدہ

    ماحولیاتی حکام نے تصدیق کی ہے کہ ندی میں آنے والا سرخ رنگ کا پانی بلاک شدہ نالے کا ہی ہے، مگر اس کی جانچ پڑتال جاری ہے کہ اسے ندی میں کیوں چھوڑا گیا ہے۔

    واضح رہے کہ اس سے قبل دو دیگر روسی دریا بھی اسی طرح کی رنگینی کا شکار ہو چکے ہیں، جن میں نورو-فومنسک اور دریائے گوزوڈنیا شامل ہیں۔

  • آسٹریلوی جزیرے سے چوری ہونے والے پارسل کا معمہ حل

    آسٹریلوی جزیرے سے چوری ہونے والے پارسل کا معمہ حل

    سڈنی: میلبرن پولیس نے مارننگٹن جزیرے سے چوری ہونے والے پارسل کا معمہ حل کرلیا ہے۔

    بین الاقوامی میڈیا رپورٹ کے مطابق پولیس نے میلبرن کے مارننگٹن جزیرے کے اطراف مبینہ طور پر چوری ہونے والے دس ہزار ڈالرز مالیت کے پارسل برآمد کیے ہیں، اگست اور اکتوبر کے درمیان پورٹسیہ، روز بڈ، سورنٹو، رائی اور توتگاروک کے علاقوں میں متعدد پارسل غائب ہونے کے بعد آسٹریلیا پوسٹ اور وکٹوریہ پولیس نے مشترکہ تحقیقات کا آغاز کیا۔

    مشترکہ تحقیقات کے نتیجے میں سری لنکا سے تعلق رکھنے والے چوبیس سالہ ماؤنٹ واورلی کو گرفتار کیا گیا، ملزم سے چوری شدہ پارسلز  برآمد کئے گئے ہیں، جس میں فٹنس کا سامان، باورچی خانے کی اشیا، ڈیزائنر کے جوتے ، شراب اور کھلونے شامل تھے۔

    ماؤنٹ واورلی پر مجرمانہ چوری اور میل مضامین کی چوری کا الزام عائد کیا گیا تھا اور اسے 20 جولائی 2021 کو فرینکسٹن مجسٹریٹ عدالت میں پیش ہونے کے لئے ضمانت دے دی گئی ہے۔

    دوسری جانب پولیس نے برآمد ہونے والا سامان مطلوبہ وصول کنندگان تک پہنچانا شروع کردیا ہے، ان وصول کنندگان میں ایک ضعیف العمر خاتون بھی شامل ہیں، جو اپنے نواسے کے لئے لاک ڈاؤ ن کے درمیان خریدی گئی فٹ بال ملنے کا بے چینی سے انتظار کررہی تھی۔

  • آکٹوپس کس طرح ذائقہ محسوس کرتا ہے، وجہ جانئے

    آکٹوپس کس طرح ذائقہ محسوس کرتا ہے، وجہ جانئے

    آکٹوپس بلاشبہ دنیا کے ذہین ترین اور اسمارٹ غیر انسانی جانداروں میں سے ایک جان دار ہیں، آکٹوپس سے متعلق انکشاف ہوا ہے کہ وہ اپنے آٹھ بازوؤں سے شکار یا غذا کو چاٹ کر اس کا ذائقہ محسوس کرتا ہے اور اس طرح زہریلی غذا کھانے سے بچے رہتے ہیں۔

    ماہرین نے بتایا کہ سمندر کی عجیب و غریب مخلوق آکٹوپس کے بازو گویا انسانی زبان کی طرح کام آتے ہیں اور ان سے غذا کو چاٹ کرکھانے کا ذائقہ محسوس کرتے ہیں، ان کے بازوؤں کے اندرونی طرف نرم ابھا ریا سکرس ہوتے ہیں جو چپکنے کا کام کرتے ہیں۔اس کے علاوہ ان کے اندر اعصابی خلیات کی بڑی مقدار ہوتی ہے، ایک جانب تو یہ خود اس مخلوق کو احساس دلاتے ہیں اور دوسری جانب بتاتے ہیں کہ آیا غذا اس کے لیے بہتر ہے یا مضر اور زہریلی ہے۔

    ہارورڈ یونیورسٹی کے نکولس بیلونو نے کہا کہ پہلے خیال تھا کہ اس کے منہ میں زبان جیسا ایک عضو ‘ریڈیولا’ یہ کام کرتا ہے لیکن معلوم ہوا کہ ریڈیولا دانتوں کا کام کرتے ہوئے غذا کے ٹکڑے کرنے میں مدد دیتا ہے۔

  • عمارت "چل کر” ایک جگہ سے دوسری جگہ پہنچ گئی، ویڈیو وائرل

    عمارت "چل کر” ایک جگہ سے دوسری جگہ پہنچ گئی، ویڈیو وائرل

    ٹوکیو: چین ٹیکنالوجی کے حوالے سے کسی ملک سے کم نہیں اور دنیا بھر میں اس نے اپنا لوہا منوایا ہے،یہی نہیں چین عجائبات سے بھرپور ملک ہے جہاں حیرت انگیز عمارات اور سڑکیں دیکھ کر انسانی عقل دنگ رہ جاتی ہے۔

    بین الاقوامی میڈیا رپورٹ کے مطابق چین نے جدید ترین ٹیکنالوجی کا استعمال کرتے ہوئے پانچ منزلہ عمارت کو ایک جگہ سے دوسری جگہ منتقل کیا، اس مقصد کے لئے مقامی کمپنی نے دو سو سے زائد موبائل سپورٹ کا سہارا لیا۔

    یہ کارنامہ چینی صوبے شنگھائی کے ہوانگپو ضلع میں سرانجام دیا گیا، جہاں پچاسی سالہ قدیم پرائمری اسکول کو دو سو سے زائد موبائل سپورٹ کے زریعے دوسری جگہ منتقل کیا، جس کا مقصد شہر کے تاریخی ڈھانچے کو محفوظ رکھنا ہے۔

    جدید ٹیکنالوجی کے استعمال کے دوران شہری بھی قدیم عمارت کو چلتا دیکھ کر حیران رہ گئے، کمپنی حکام کا کہنا تھا کہ اس عمارت کی خالی جگہ پر سال دو ہزار تئیس تک تجارتی کپملیکس بنائیں جائیں گے۔

    مقامی حکام کا کہنا ہے کہ اس عمارت کا مجموعی وزن 7،600 ٹن تھا، یہ اقدام نہایت حیرت انگیز تھا کیوں کہ عمارت کو سیدھے لکیر کی بجائے 203 فٹ ایک مڑے ہوئے سمت میں منتقل کرنا پڑا تھا۔

  • سوشل میڈیا اسٹار نے اپنی مرسیڈیز کو آگ لگادی

    سوشل میڈیا اسٹار نے اپنی مرسیڈیز کو آگ لگادی

    ماسکو: معروف روسی یو ٹیوبر نے کمپنی کے رویے سے دلبرداشتہ ہوکر اپنی مرسیڈیز کو جلا کر بھسم کردیا ہے۔

    بین الاقوامی میڈیا رپورٹ کے مطابق چار سو ستانوے ملین یو ٹیوب سبسکرائبر رکھنے والے میخائل لیٹوین نے یہ انتہائی اقدام جرمن کار کمپنی کی جانب سے مرسیڈیز کی بہتر سروس نہ کرنے پر اٹھایا۔

    میخائل لیٹوین اتنی زیادہ رقم کی ادائیگی کے باوجود وہ اس گاڑی کی پائیداری اور پر فارمنس سے مطمئن نہیں تھے، انہوں نے کہا کہ گزشتہ دس ماہ میں صرف 15 ہزار کلومیٹر (9300 میل) کی ڈرائیو کے دوران بھی ان کی گاڑی کو مرمت کی ضرورت پڑی اور وقتاً فوقتاً ورکشاپس پر گئی۔

    مقامی میڈیا رپورٹس کے مطابق میخائل لیٹوین کی گاڑی خریداری کے بعد سے 4 مرتبہ مرسڈیز سروس شاپ میں گئی اور ہر مرتبہ مرسڈیز ڈیلر شپ نے مرمت کے اخراجات اٹھانے میں ہچکچاہٹ کا اظہار کیا اور گاڑی مکمل طور پر ٹھیک کیے بغیر انہیں واپس کردی۔

    لٹوین کا کہنا تھا کہ مرسیڈیز کار کمپنی کے ساتھ ہونے والے تنازعے کے بعد میرے ذہن میں کئی سوالات پیدا ہوئے مگر سب سے بہتر یہی تھا کہ میں مرسیڈیز(جسے یوٹیوبر شارک کے نام سے پکارتا تھا) کو آگ لگادوں، میں اس فیصلے پر قطعی خوش نہیں ہوں۔

    معروف یو ٹیوبر کے ہاتھوں جلائی جانے والی مرسیڈیز کی مالیت تیرہ ملین روبل (پاکستانی دو کروڑ چوہتر لاکھ) ہے، گاڑی کا نمبر اے ایم جی جی ٹی تریسٹھ ایس ہے۔

    روسی شہری کی جانب سے ویڈیو چوبیس اکتوبر کو پوسٹ کی گئی تھی، جسے اب تک 11.5 ملین سے زائد لوگ دیکھ چکے ہیں، صارفین لٹون کے اس طرز عمل پر دنگ رہ گئے ہیں۔