Tag: خاتون ریسلر

نئی دہلی: بھارت میں ایک خاتون ریسلر نے بدنام زمانہ تہاڑ جیل میں تعینات اسسٹنٹ سپرنٹنڈنٹ سے لاکھوں روپے ٹھگ لیے، ریسلر کے بارے میں بتایا جا رہا ہے کہ وہ نیشنل اور اسٹیٹ لیول چیمپئن رہی ہیں۔

غیر ملکی میڈیا رپورٹس کے مطابق تہاڑ جیل کے ایک اسسٹنٹ سپرنٹنڈنٹ دیپک شرما نے پولیس تھانے میں شکایت درج کرائی ہے کہ انھیں ایک خاتون اور اس کے شوہر نے ہیلتھ پروڈکٹ کے کاروبار میں سرمایہ کاری کے نام پر 50 لاکھ روپے کا فراڈ کیا ہے۔

دیپک شرما باڈی بلڈنگ کے باعث سوشل میڈیا پر مشہور ہیں، انھوں نے رونق گُلیا نامی خاتون ریسلر اور ان کے شوہر پر 50 لاکھ روپے فراڈ کا مقدمہ درج کروایا ہے۔

پولیس رپورٹ کے مطابق دیپک شرما کی ملاقات نیشنل اور اسٹیٹ لیول چیمپئن رونق گُلیا سے ڈسکوری چینل کے ریئلٹی شو ’انڈیاز الٹی میٹ واریئر‘ پر ہوئی، جہاں خاتون نے انھیں بتایا کہ ان کے شوہر ایک معروف بزنس مین ہیں اور اُن کا ہیلتھ کیئر کا کاروبار ہے۔ دیپک شرما نے اُن کے کاروبار میں 50 لاکھ روپے کا سرمایہ لگایا، پہلے تو میاں بیوی نے انھیں خوب منافع دینے کے وعدے کیے تاہم بعد میں وہ رقم واپس کرنے سے مکر گئے۔

واضح رہے انسٹاگرام پر رونق گلیا کے فالوورز کی تعداد ساڑھے چار لاکھ ہے، جب کہ دیپک شرما بھی انسٹاگرام انفلوئنسر ہیں۔ مقدمہ درج ہونے کے بعد پولیس نے دونوں میاں بیوی کی گرفتاری کے لیے چھاپے شروع کر دیے ہیں۔