لاہور: جوہر ٹاؤن دھماکے کے سلسلے میں گرفتاریاں جاری ہیں، پولیس نے ایک خاتون سہولت کار کو بھی گرفتار کر لیا ہے۔
تفصیلات کے مطابق حراست میں لیے گئے پیٹر پال ڈیوڈ کی نشان دہی پر سہولت کار کرن کو گرفتار کر لیا گیا ہے، زیر حراست پیٹر پال لاہور کے علاقے ریواز گارڈن کے ہوٹل میں قیام کرتا تھا، سہولت کار کرن بھی ہوٹل میں اس کے ساتھ قیام کرتی تھی۔
پولیس نے ہوٹل سے ریکارڈ اور سی سی ٹی وی فوٹیج تحویل میں لے لی، پولیس حکام کا کہنا ہے کہ نجی ہوٹل کے ملازمین سے بھی تفتیش کی جا رہی ہے، اب تک کی جانے والی تمام گرفتاریاں پیٹر پال ڈیوڈ کی نشان دہی پر کی گئی ہیں۔
آج ہی ذرائع نے بتایا ہے کہ جوہر ٹاؤن دھماکے کے مبینہ دہشت گرد سجاد حسین کو بھی منڈی بہا الدین سےگرفتار کر لیا گیا ہے، ملزم نے گاڑی لاہور منتقل کرنے کا بھی اعتراف کر لیا ہے، حساس اداروں نے ملزم کو نامعلوم مقام پر منتقل کر دیا۔
لاہور جوہرٹاؤن دھماکے میں ملوث مبینہ دہشت گرد گرفتار، گاڑی لاہور منتقل کرنے کا اعتراف
پولیس نے 3 مشکوک افراد کو حراست میں لیا تھا، جنھیں سی ٹی ڈی کے حوالے کر دیا گیا، جب کہ حساس اداروں نے ایک کار مکینک کو بھی حراست میں لیا، جس پر بھی دھماکے میں ملوث ہونے کا شبہ ہے۔
گزشتہ روز تحقیقاتی اداروں نے لاہور دھماکے کے مبینہ ماسٹر مائنڈ کی شناختی دستاویزات حاصل کی تھیں، دستاویزات میں شناختی کارڈ، لائسنس اور تصاویر شامل تھیں، تحقیقاتی ذرائع کے مطابق پیٹر ڈیوڈ پال 25 سال سے بحرین میں مقیم تھا، شناختی کارڈ کے مطابق پیٹر ڈیوڈ پال کی تاریخ پیدائش 1964 ہے۔
یاد رہے کہ بدھ کو لاہور کے علاقے جوہر ٹاؤن میں دھماکے کے نتیجے میں 3 افراد جاں بحق اور 24 افراد زخمی ہوگئے تھے، زخمیوں میں خواتین سمیت 2 بچے بھی شامل تھے۔
