بنگلورو : بھارتی فلموں کے اداکار کی تیز رفتار کار کی ٹکر سے خاتون ہلاک جبکہ اُس کا شوہر شدید زخمی ہوگیا، پولیس نے اداکار کو گرفتار کرکے مقدمہ درج کرلیا۔
تفصیلات کے مطابق کانندا فلموں کے اداکار ناگا بھوشن ایس ایس کو ایک خاتون کو قتل اور اس کے شوہر کو زخمی کرنے کے الزام میں پولیس نے گرفتار کرلیا ہے۔
بھارتی میڈیا رپورٹ کے مطابق گزشتہ شب اُن کی تیز رفتار کار فٹ پاتھ پر چلتے ہوئے میاں بیوی سے ٹکرا گئی تھی جس کے نتیجے میں 48 سالہ پریما اور اُن کے 58 سالہ شوہر کرشنا شدید زخمی ہوگئے۔
حادثے کے بعد جوڑے کو زخمی حالت میں اسپتال منتقل کیا گیا جہاں خاتون زخموں کی تاب نہ لاتے ہوئے چل بسیں جبکہ اُن کے شوہر ابھی بھی زخمی حالت میں زیرِ علاج ہیں۔
پولیس نے اداکار ناگا بھوشن کو گرفتار کرلیا، اداکار نے پولیس کو دیے گئے اپنے بیان میں کہا کہ وہ لاپرواہی اور جلدی میں کار چلا رہے تھے۔
پولیس کاکہنا ہے کہ اداکار کے خلاف مقدمہ درج کر لیا گیا ہے اور مزید تفتیش کے لیے اداکار کی گاڑی کو قبضے میں لے لیا گیا ہے۔
واضح رہے کہ اداکار ناگا بھوشن نے متعدد کانندا فلموں میں کام کیا ہے جن میں اُنہوں نے زیادہ تر مزاحیہ کردار کیے۔
