بھارت میں خاتون ٹرینی ڈاکٹر کو قتل کرنے والا ملزم تمام ثبوت مٹانے کے باجود اپنی ایک چھوٹی سی غلطی کی وجہ سے پکڑا گیا۔
کلکتہ کے سرکاری اسپتال میں خاتون ڈاکٹر کے ریپ اور قتل کیس میں گرفتار ملزم سنجے رائے نے کئی انکشافات کیے ہیں، عصمت دری اور قتل کرنے کے بعد وہ گھر میں سکون سے سوگیا تھا جبکہ سنجے نے سارے ثبوت مٹا دیے تھے مگر ایک نشان کی وجہ سے اس کی شناخت ہوئی۔
پولیس نے بتایا کہ اب تک اکٹھے ہونے والے شواہد سے لگتا ہے کہ ملزم بالکل ایک درندہ ہے، خاتون کو ہوس کا نشانہ بنانے اور قتل کرنے کے بعد وہ گھر جاکر سو گیا، اگلی صبح بیدار ہونے پر اس نے سب سے پہلے ثبوت مٹانے کے لیے اپنے کپڑے دھوئے۔
ملزم کی ایک غلطی اس پر بھاری پڑگئی، اس نے خون کے تمام نشانات مٹا دیے لیکن پولیس کو اس کے جوتے پر خون کے دھبے ملے جس سے اس کی شناخت ہوئی۔
یہ نشانم اس کی گرفتاری کا سبب بن گیا جنہیں پولیس نے ثبوت کے طور پر محفوظ کر لیا ہے، پولیس نے اسے ہفتہ کی شام گرفتار کرلیا تھا۔
پولیس کے مطابق اس کی گرفتاری میں ایک بلو ٹوتھ ایئر فون بھی بڑا ثبوت بنا، جو فوری طور پر اس کے فون سے کنیکٹ ہوگیا تھا، اس کے فون سے کئی فحش ویڈیوز بھی ملے ہیں۔
کلکتہ کے پولیس کمشنر ونیت گوئل نے کہا کہ جرم کرنے کے بعد ملزم گھر چلا گیا تھا اور جمعہ کی صبح دیر تک سوتا رہا، نیند سے بیدار ہونے کے بعد اس نے ثبوت مٹائے۔ تلاشی کے دوران اس کے جوتے ملے جن پر خون کے دھبے تھے۔
کمشنر سے سوال کیا گیا کہ کیا اس جرم میں کوئی اور بھی شامل تھا تو انھوں نے کہا کہ ابھی تک اس کا کوئی ثبوت نہیں ملا ہے۔
ونیت گوئل نے بتایا کہ پولس پوسٹ مارٹم رپورٹ کا انتظار کر رہی ہے تاکہ اسے اپنی تحقیقات کے نتائج کے ساتھ ملا سکے پولیس کچھ چھپانے کی کوشش نہیں کر رہی ہے اور تفتیش شفاف ہے۔
خیال رہے کہ بھارت میں خاتون ڈاکٹر کے ریپ اور قتل کے خلاف مظاہرے شروع ہو گئے ہیں، کئی ریاستوں میں ہڑتال کر کے ڈاکٹر سڑکوں پر نکل آئے ہیں۔
مغربی بنگال میں ایک سرکاری اسپتال میں زیر تربیت ڈاکٹر کی عصمت دری اور بے دردی سے قتل کے واقعے نے بھارت کو جھنجھوڑ کر رکھ دیا ہے اور وہاں غم و غصے کی لہر دوڑ گئی ہے، کانگریس کی طلبہ تنظیم این ایس یو آئی نے ملزمان کو جلد از جلد سخت سزا دینے کا مطالبہ کیا ہے۔