بٹگرام(15 اگست 2025): خیبر پختونخوا کے ضلع میں خاتون کے قتل کو خودکشی کا رنگ دینے کی کوشش ناکام بنادی گئی جبکہ خاوند کو گرفتار کرلیا گیا۔
تفصیلات کے مطابق خیبر پختونخوا کے ضلع بٹگرام میں تھانہ شملائی کی حدود ملزمان مقتولہ کی تدفین کر رہے تھے، پولیس موقع پر پہنچ گئی اور لاش کو پوسٹ مارٹم کیلئے اسپتال منتقل کردیا۔
پولیس کا کہنا ہے کہ واقعہ شملائی کے دور افتادہ گاؤں ولاڑ گٹ میں پیش آیا ہے، مقتولہ 3 بچوں کی ماں تھی جبکہ خاوند کو گرفتار کرلیا گیا ہے اور دوسرے ملزم کی تلاش جاری ہے۔
پولیس کا کہنا ہے کہ ابتدائی تحقیقات کے مطابق خاتون کو بہیمانہ تشددکے بعد قتل کیا گیا، مقتولہ کے والد کی مدعیت میں مقدمہ درج کرلیا گیا ہے۔
https://urdu.arynews.tv/rawalpindi-daughter-in-law-dies-due-to-violence14-august-2025/
دوسری جانب آج ہی راولپنڈی تھانہ دھمیال کے علاقہ میں ایک افسوسناک واقعہ پیش آیا ہے جہاں مبینہ طور پر سسرالیوں کے تشدد سے بہو جان کی بازی ہار گئی۔
ذرائع کا کہنا ہے کہ سسرالیوں نے بہو پر تشدد سے ہلاکت کے معاملے کو دبانے کی کوشش کی، مقتولہ کی لاش تابوت میں بند کر کے والدین کو جنازے کے وقت اطلاع دی۔
تابوت بند لاش دیکھ کر والدین کو شک ہوا تو میت کو غسل دینے پر اصرار کیا، تابوت کھلنے پر متوفیہ کے جسم پر زخموں کے نشانات پائے گئے۔
والد غلام اختر نے پولیس کو بیان دیا کہ میری بیٹی کو تشدد کر کے قتل کیا گیا ہے جس کے بعد دھمیال پولیس نے لاش پوسٹمارٹم کے لیے اسپتال منتقل کر دی۔
