بنگلادیش کی سابق وزیراعظم خالدہ ضیاء وطن واپس پہنچ گئیں، وطن پہنچنے کے بعد ملک میں انتخابات کروانے کا مطالبہ بھی کردیا۔
بین الاقوامی خبر رساں ادارے کی رپورٹ کے مطابق سابق وزیر اعظم خالدہ ضیاء بیماری کے باعث علاج کیلیے لندن میں تھیں، 4 ماہ کے علاج کے بعد وہ منگل کی صبح لندن سے واپس وطن پہنچ گئیں۔
غیرملکی میڈیا کا اس حوالے سے کہنا ہے کہ سابق وزیر اعظم کے استقبال کیلیے ڈھاکا میں ایئرپورٹ پر لوگوں کی بڑی تعداد جمع تھی، وہ اپنی 2 بہوؤں کے ساتھ قطر کے امیر شیخ تمیم بن حمد الثانی کی طرف سے بندوبست کی گئی ایک خصوصی ایئر ایمبولینس میں وطن واپس پہنچی ہیں۔
بنگلادیش نیشنلسٹ پارٹی کی رہنما کی واپسی کے بعد حکومت پر انتخابات کے انعقاد کیلیے دباؤ بڑھ گیا ہے، عبوری حکومت پر اس سال دسمبر میں انتخابات کروانے کے لیے سخت دباؤ ہے۔
رواں برس جنوری میں سابق وزیراعظم خالدہ ضیاء کو بنگلادیش کی سپریم کورٹ نے کرپشن کیس میں بری کردیا تھا۔
سابق وزیراعظم اور دیگر پر 2001 سے 2006 کے دوران غیرملکی عطیات میں سے مبینہ طور پر ایک لاکھ 73 ہزار ڈالر چوری کرنے کا الزام تھا۔
گزشتہ سال نومبر میں سابق وزیر اعظم کو بدعنوانی کے ایک اور مقدمے میں بری کر دیا گیا تھا جس میں ان پر 2005 میں ایک اور ٹرسٹ سے 31.5 ملین ٹکا کے غلط استعمال کا الزام لگایا گیا تھا۔
بھارت اور بنگلا دیش کی ایک دوسرے پر تجارتی پابندیاں
یاد رہے کہ گزشتہ سال اگست میں طلبا کے احتجاج کے نتیجے میں حسینہ واجد کی حکومت کا تختہ اُلٹنے کے بعد خالدہ ضیاء کو رہائی مل گئی تھی، رہائی کے بعد خالدہ ضیاء علاج کے لیے لندن روانہ ہوگئیں تھیں۔
واضح رہے کہ سابق وزیر اعظم ضیاء 1991 سے 1996 تک اور پھر 2001 سے 2006 تک بنگلادیش کی وزیراعظم کے منصب پر فائز رہ چکی ہیں۔
