Tag: خالی نشست

کراچی : تحریک انصاف نے عامر لیاقت کے انتقال کے سبب خالی نشست پر الیکشن لڑنے کا اعلان کردیا ، این اے 245 میں پولنگ27جولائی کو ہوگی۔

تفصیلات کے مطابق پاکستان تحریک انصاف نے ڈاکٹر عامر لیاقت کے انتقال کے سبب خالی ہونے والی این اے245کی نشست پر الیکشن لڑنے کا فیصلہ کرلیا۔

الیکشن کمیشن نے این اے245میں ضمنی انتخاب کاشیڈول جاری کردیا ہے ، این اے 245میں پولنگ27جولائی کوہوگی جبکہ ضمنی انتخاب کے کاغذات نامزدگی 22 سے 24 جون تک جمع ہوں گے۔

یاد رہے الیکشن کمشنر سندھ اعجاز انور نے کہا تھا کہ پی ٹی آئی کے رکن قومی اسمبلی عامر لیاقت حسین کے انتقال کے باعث خالی ہونے والی قومی اسمبلی کی نشست پر ضمنی الیکشن 11 اگست سے قبل ہوں گے۔

واضح رہے کہ عامر لیاقت حسین نے 2018 کے عام انتخابات میں این اے 245 پر ایم کیو ایم کے ڈاکٹر فاروق ستار کو شکست دے کر پی ٹی آئی کے ٹکٹ پر رکن قومی اسمبلی منتخب ہوئے تھے۔

گذشتہ روز کراچی سے قومی اسمبلی کے حلقہ این اے 240 کی نشست پر ضمنی انتخابات کے لئے پولنگ ہوئی تھی ، جس میں ایم کیو ایم نے میدان مار لیا۔

مذکورہ نشست ایم کیو ایم کے اقبال محمد علی کے انتقال کے باعث خالی ہوئی تھی۔

کوئٹہ: نیشنل پارٹی کے سربراہ میر حاصل خان بزنجو کی وفات سے بلوچستان سے خالی ہونے والی سینیٹ کی نشست پر پولنگ کا عمل جاری ہے۔

تفصیلات کے مطابق سینیٹ کی خالی نشست پر ضمنی انتخاب ہو رہا ہے اور پولنگ کا عمل شام 4 بجے تک جاری رہے گا۔بلوچستان اسمبلی کے 64 ارکان ووٹ کاسٹ کریں گے۔

اس نشست پر بلوچستان عوامی پارٹی کے میرخالد بزنجو ،جمعیت علمائے اسلام (ف) کے غوث اللہ اور پاکستان تحریک انصاف کے ڈاکٹر منیر بلوچ امیدوار بھی انتخاب لڑ رہے ہیں۔

کوئٹہ، بلوچستان اسمبلی میں بلوچستان عوامی پارٹی کی 24 نشستیں ہیں،جمعیت علمائے اسلام اور بلوچستان نیشنل پارٹی کی 10، 10 نشستیں ہیں۔پی ٹی آئی کی7،عوامی نیشنل پارٹی کی 4 اور بی این پی عوامی کی 3 نشستیں ہیں۔

ایچ ڈی پی کی 2، ن لیگ ،پشتونخواملی عوامی پارٹی کی ایک ایک نشست ہے،جمہوری وطن پارٹی کی بھی ایک بلوچستان اسمبلی میں ایک نشست ہے۔

واضح رہے کہ سینیٹ کی مذکورہ نشست میر حاصل بزنجو کی وفات کے بعد خالی ہوئی تھی۔حاصل بزنجو کینسر کے عارضے میں مبتلا تھے، طبعیت خراب ہونے پر انہیں کراچی کے نجی اسپتال منتقل کیا گیا تھا،جہاں وہ انتقال کر گئے تھے۔

پشاور: خیبرپختونخواہ اسمبلی میں سینیٹ کی خالی نشست پر انتخاب کے لیے پولنگ جاری ہے، تحریک انصاف کے ذیشان خانزادہ اور اپوزیشن کے فرزند علی خان آمنے سامنے ہیں۔

تفصیلات کے مطابق خیبرپختونخواہ سے خالی ہونے والی سینیٹ کی نشست پر انتخاب کے لیے ووٹنگ جاری ہے۔ پولنگ صبح 9 بجے سے شام 4 بجے تک بغیر کسی وقفے کے جاری رہے گی جبکہ 145 اراکین صوبائی اسمبلی خفیہ رائے شماری کے ذریعے اپنا ووٹ کاسٹ کریں گے۔

نشست پیپلزپارٹی کے سابق سینیٹرخانزادہ خان کے مستعفی ہونے کے بعد خالی ہوئی تھی۔ خانزادہ خان نے پیپلزپارٹی چھوڑنے اور تحریک انصاف میں شمولیت کی وجہ سے استعفیٰ دیا تھا۔ تحریک انصاف کے ذیشان خانزادہ مستعفی ہونے والے سینیٹر خانزادہ خان کے فرزند ہیں۔

الیکشن کے قواعد وضوابط کے مطابق سینیٹ کی اس نشست پر منتخب رکن 2021 تک مسند نشین رہے گا کیونکہ اس نشست پر 2015 میں انتخابات ہوئے تھے۔

صوبائی اسمبلی میں تحریک انصاف کے 96، متحدہ مجلس عمل کے 18 اور عوامی نیشنل پارٹی کے 12 ممبران ہیں اسی طرح مسلم لیگ ن کے 6، پیپلزپارٹی کے 5، آزاد 6، بلوچستان عوامی پارٹی کے 5 اور مسلم لیگ ق کا ایک ممبر ہے۔