راجن پور: پنجاب کے ضلع راجن پور کے علاقے بستی بسم اللہ میں بد بخت سوتیلے باپ نے کم سن بیٹی سے زبردستی شادی کر لی۔
تفصیلات کے مطابق راجن پور میں سوتیلے باپ نے کم سن بیٹی سے زبردستی شادی کر لی، سوتلی بیٹی حنا تحفظ کے لیے تھانہ سٹی پہنچ گئی، پولیس نے سوتیلے باپ کے خلاف مقدمہ درج کر لیا۔
پولیس کا کہنا ہے کہ حنا کی ماں نے اشرف سے دوسری شادی کی تھی، سوتیلی بیٹی سے شادی کرنے والے ملزم کو گرفتار کر لیا گیا ہے۔
پاکپتن میں نوسرباز خواتین
ادھر پنجاب کے ضلع پاکپتن کے علاقے صرافہ بازار میں نوسرباز خواتین نے بچے کے ہم راہ واردات میں جیولری شاپ سے زیورات کا ڈبا اڑا لیا۔
واقعے کی سی سی ٹی وی فوٹیج اے آر وائی نیوز کو موصول ہو گئی، ویڈیو میں نوسرباز خواتین کے ساتھ موجود بچہ زیور کا ڈبا چراتے دکھائی دیتا ہے، واردات کی اطلاع ملتے ہی سٹی پولیس نے نوسرباز خواتین کے گروہ کی تلاش شروع کر دی۔
خان پور میں عجیب واردات
ضلع رحیم یار خان کے شہر خان پور کے نواحی علاقے میں ایک جنرل اسٹور پر 10 لاکھ روپے کی ڈکیتی کی عجیب واردات کی گئی ہے، 3 ڈاکوؤں نے گارڈ کی آنکھوں میں مرچیں ڈال کر اسلحہ چھینا۔
پولیس کا کہنا ہے کہ خان پور میں ڈکیتی کی واردات میں مزاحمت پر ڈاکوؤں نے فائرنگ بھی کی جس سے سیکورٹی گارڈ سمیت 3 افراد زخمی ہو گئے ہیں۔
شیخوپورہ
پنجاب کے ضلع شیخوپورہ کے علاقے مریدکے پرانا نارنگ میں جھگڑے پر فائرنگ میں ایک شخص جاں بحق ہو گیا ہے، پولیس کا کہنا ہے کہ واردات کر کے ملزم فرار ہو گیا ہے جس کی گرفتاری کے لیے چھاپے مارے جا رہے ہیں۔
باغبان پورہ
ادھر لاہور میں باغبان پورہ کے علاقے سلامت پورہ میں گھر سے ایک شخص کی لاش ملی ہے، ریسکیو ذرایع کا کہنا ہے کہ 70 سالہ شخص گھر میں اکیلا رہتا تھا جس کی شناخت اعظم کے نام سے ہوئی ہے۔
فیصل آباد کے شہر جڑانوالہ کے نواحی علاقے میں دیوار گر گئی، ریسکیو ذرایع کے مطابق دیوار گرنے سے 8 سال کا بچہ جاں بحق ہو گیا ہے۔
لاہور میں پولیس نے مختلف علاقوں میں ون ویلرز کے خلاف کریک ڈاؤن کرتے ہوئے 31 ملزمان گرفتار کر لیے، جن کے خلاف 21 مقدمات درج کر لیے گئے ہیں۔
