Tag: خروج نہائی

ریاض: سعودی عرب میں ملازمت کے دوران اگر کفیل خروج نہائی لگا دے تو کیا ایگزٹ کینسل کیا جا سکتا ہے؟

تفصیلات کے مطابق جوازات کے ٹوئٹر پر فائنل ایگزٹ کو کینسل کرانے کے حوالے سے ایک شخص نے دریافت کیا کہ کفیل نے میرا خروج نہائی لگا دیا ہے معلوم یہ کرنا ہے کہ میں ایگزٹ کو کینسل کرا سکتا ہوں، کیا اس کے لیے کوئی جرمانہ ادا کرنا ہوگا؟‘

جوازات کا کہنا تھا کہ جو شخص خروج نہائی ویزا حاصل کرنے کے بعد واپسی کا ارادہ ملتوی کرتا ہے، اسے چاہیے کہ وہ 60 روزہ مہلت ختم ہونے سے قبل ویزہ کینسل کرائے۔

تاہم جوازات نے وضاحت کی کہ یہ کام کفیل ہی انجام دے سکتا ہے یا اس کی جانب سے وہ شخص جسے کفیل نے سرکاری معاملات کی انجام دہی کے لیے مختار نامہ دیا ہوا ہو۔

خروج نہائی ویزے کو اگر دی گئی 60 روزہ مہلت کے دوران کینسل کر دیا جائے تو کوئی جرمانہ نہیں ہوتا، مہلت ختم ہونے کے بعد ایک ہزار ریال جرمانہ ہوتا ہے جسے ادا کرنے کے بعد ہی ویزہ کینسل ہوتا ہے۔

فائنل ایگزٹ کی 60 روزہ مہلت کے دوران اگر واپس جانے کا ارادہ ملتوی ہو جائے اور اس دوران اقامہ بھی ایکسپائر ہو تو اس صورت میں اقامہ تجدید کرانا ہوگا۔

واضح رہے کہ خروج نہائی ویزا لگانے کی کوئی فیس نہیں ہوتی تاہم فائنل ایگزٹ ویزا حاصل کرنے کے لیے لازمی ہے کہ کارکن کا اقامہ کار آمد ہو اور اس کے پاسپورٹ کی مدت 60 روز سے زائد ہو۔

ریاض: سعودی عرب میں اگر کسی شخص پر موبائل کا بل بھی واجب الادا ہو تو اس کو خروج نہائی نہیں لگایا جا سکتا۔

تفصیلات کے مطابق ایک شخص نے جوازات کے ٹویٹر پر دریافت کیا کہ میں نے قسطوں پر اشیا خریدی ہیں جن کی رقم باقی ہے، کیا خروج نہائی لگ سکتا ہے؟

جوازات کا کہنا تھا کہ جب تک قسطوں پر خریدی گئی اشیا کی ادائیگی نہیں کر دی جاتی، خروج نہائی ویزہ جاری نہیں کرایا جا سکتا۔

جوازات کے مطابق ادائیگی کے حوالے سے اگر کسی نے قسطوں پر گاڑی خریدی ہے یا اس کے ذمہ موبائل، انٹرنیٹ، بجلی کا بل وغیرہ واجب الادا ہو، تو اس صورت میں بھی اس کا خروج نہائی ویزہ یعنی فائنل ایگزٹ نہیں لگے گا، اس کے لیے لازمی ہے کہ کسی بھی قسم کے واجبات باقی نہ ہوں۔

ادائیگی باقی ہونے کی صورت میں غیر ملکی کارکن کی فائل میں ان کا اندراج ہوتا ہے اور جب تک تمام ادائیگیاں مکمل نہ کر دی جائیں، خروج نہائی نہیں لگایا جا سکتا۔

واضح رہے کہ سعودی عرب میں غیر ملکیوں کا اقامہ نمبر تمام سرکاری معاملات کی انجام دہی کے لیے استعمال ہوتا ہے، اقامہ نمبر پر ٹریفک چالان یا دیگر خلاف ورزیاں رجسٹر کی جاتی ہیں، اکثر سائلین دریافت کرتے ہیں کہ کارکن کے اقامہ پر ٹریفک چالان ہے کیا اقامہ کی تجدید ہو سکتی ہے؟

جوازات کے مطابق ایسے غیر ملکی کارکن جن کے خلاف کسی بھی قسم کے جرمانے واجب الاد ہوں ان کے اقامے یا ڈرائیونگ لائسنس کی اس وقت تک تجدید نہیں کرائی جا سکتی جب تک چالان کی رقم ادا نہ کر دی جائے، ٹریفک چالان کی بروقت ادائیگی ضروری ہے، ورنہ اقامہ تجدید نہیں کیا جا سکتا نہ ہی دیگر سرکاری معاملات انجام دیے جا سکتے ہیں۔