Tag: خزانہ

جازان: سعودی عرب میں ایک شہری نے دوران سیاحت قدیم ترین آبی فوسلز دریافت کر لیے۔

تفصیلات کے مطابق سعودی عرب کے شہر جازان میں سیاحت کے دوران ایک سعودی شہری ابراہیم مشرقی نے لاکھوں برس پرانے سمندری فوسلز دریافت کر لیے ہیں۔

جیولوجیکل سروے بورڈ کے ماہرین کا کہنا ہے کہ یہاں 140 سے 180 ملین برس پرانے فوسلز ہیں، العربیہ نیٹ کے مطابق جازان مملکت کے جنوب مغرب میں واقع ہے، اور جازان کے جنوب میں سمندری فوسلز بہت بڑے علاقے میں پھیلے ہوئے ہیں۔

ماہرین کا کہنا ہے کہ یہاں ایک بڑا علاقہ ان فوسلز سے بھرا ہوا ہے، اس کے اطراف السروات کا کوہستانی سلسلہ بھی واقع ہے، یہاں پائے جانے والے فوسلز میں مختلف قسم کے خول شامل ہیں۔

سعودی شہری کا کہنا تھا کہ اس کے وہم و گمان میں بھی نہ تھا کہ یہاں لاکھوں برس پرانے سمندری فوسلز کا علاقہ واقع ہے، جب اس نے فوسلز دیکھے تو حیران ہو گیا، اور پھر انھوں نے سعودی جیولوجیکل سروے بورڈ کو اس کی اطلاع دی۔

ماہرین نے الریث کمشنری میں واقع جبال القھر کا دورہ بھی کیا، ان کا کہنا تھا کہ جازان میں انھیں 20 سے 25 کلو میٹر کے رقبے میں حیرت انگیز تاریخی اشیا نظر آئیں۔

ماہرین کے مطابق علاقے سے سمندری للی، اسٹار فش، سمندری ارچن اور دیگر سمندری مخلوقات ملی ہیں۔

نیو انگلینڈ: امریکا کے علاقے نیو انگلینڈ میں ایک گھر میں برسوں قبل چھپایا گیا خزانہ نکل آیا، گھر کا مالک اسے بیچنا چاہتا تھا لیکن انھیں یقین تھا کہ اس میں خزانہ چھپا ہوا ہے۔

تفصیلات کے مطابق نیو انگلینڈ کے علاقے میں ایک خاندان کو شک تھا کہ ماضی میں ان کے دادا نے گھر کی دیواروں میں کہیں خزانہ چھپایا ہوا ہے، تلاش کرنے پر آخر کار ایک صندوق مل گیا جس میں 33 ہزار پونڈ رقم موجود تھی۔

یہ رقم گھر کی اٹاری میں فلوربورڈز کے نیچے چھپائی گئی تھی، گھر والے اسے دو سال سے تلاش کر رہے تھے لیکن وہ اس تک نہیں پہنچ سکے، وہ اس گھر کو مجبوری کی وجہ سے چند برس کے لیے فروخت کرنا چاہ رہے تھے لیکن انھوں نے خزانے سے متعلق افواہ سن رکھی تھی، جس کی وجہ سے وہ گھر نہیں چھوڑ رہے تھے۔

گھر والوں نے آخرکار خزانہ تلاش کرنے والے ایک پروفیشنل کیتھ ویلی کو بلایا جو دھات کی چیزوں کو تلاش کرنے میں ماہر ہیں، ابتدا میں انھوں نے چند مقامات پر تلاش کیا لیکن وہ ناکام رہے، اس کے بعد انھوں نے گھر کی اٹاری پر توجہ مرکوز کر دی، وہ ان چھوٹی چھوٹی چیزوں کا جائزہ لینے لگے جو اپنی جگہ سے بہت معمولی طور پر ہٹی ہوئی ہوں۔

اس تلاش کی ایک ویڈیو بھی یو ٹیوٹب چینل پر شیئر کی گئی، جس میں دیکھا جا سکتا ہے کہ ماہر نے ایک گھنٹے کی تلاش کے بعد آخر کار لکڑی کی چھت پر ایک جگہ چھوٹے نشان دیکھے، اس کے بعد انھوں نے وہاں دراڑ میں ایک چھوٹا سا کیمرہ داخل کیا تو اندر ایک دھاتی صندوق کی موجودگی کا انکشاف ہوا جو سر بہ مہر تھا۔

کیتھ نے وہاں سے صندوق نکال کر اسے ہتھوڑی سے کھولا تو اس میں سے 46 ہزار ڈالرز کے بلز نکل آئے جو 1930 سے 1950 کے تھے، جن میں سے کچھ چاندی کے سرٹیفکیٹس تھے، جن کی اہمیت اصل مالیت سے بھی زیادہ تھی۔

صندوق میں سے جو رقم نکلی تھی وہ 5 ہزار ڈالرز کے بنڈلز پر مبنی تھی، اس خزانے کی تلاش گھر والے دو سال سے کر رہے تھے، لوگوں کی گم شدہ چیزیں تلاش کرنے والے کیتھ نے بتایا کہ اس صندوق کی تلاش میری اب تک کی سب سے زیادہ سنسنی خیز تلاش تھی۔

برلن: جرمنی میں سونے کے سکوں اور نقد رقم پر مشتمل خزانہ ملنے کے بعد شہری کو عدالتی چکر کاٹنے پڑے لیکن پھر بھی اس کے ہاتھ کچھ نہ آیا۔

تفصیلات کے مطابق جرمنی میں ایک شخص کو بڑی تعداد میں سونے کے سکے اور نقدم رقم ملی لیکن عدالتی حکم کے بعد مذکورہ شخص کے حصے میں کچھ بھی نہ آیا۔

یہ چار سال پہلے 2016 کی بات ہے جب جرمنی کے جنوبی مغربی شہر ڈنگلاگے کے باغات کی صفائی کرنے والی ایک کمپنی کے ایک کارکن کو پلاسٹک کے ڈبے میں سے سونے کے سکے اور نقد رقم ملی جس پر اس نے پولیس کو اطلاع دے دی۔

بات اتنی ہوتی تو معاملہ ختم ہو جاتا، لیکن اس واقعے کے بعد ایک بار پھر صفائی کرنے والے کارکن کو جھاڑیوں میں سے مزید پلاسٹک کے ڈبے ملے جن میں سونے کے مزید سکے موجود تھے جن کی مالیت تقریباً 5 لاکھ یورو سے زائد بنتی تھی۔

شہری انتظامیہ کو معلوم ہوا تو اس خزانے کو قبضے میں لے کر اصل مالک کی تلاش شروع کر دی گئی، لیکن جس شخص کو خزانہ ملا تھا اس نے شہری انتظامیہ کے خلاف عدالت سے رجوع کر لیا اور خزانے کی ملکیت کا دعویٰ کر دیا۔

مذکورہ شخص کا کہنا تھا کہ سونے کی سکے اور رقم کے ملنے کے 6 ماہ بعد بھی کسی شخص نے اس کی ملکیت کے لیے رابطہ نہیں کیا اس لیے اب وہی اس خزانے کا قانونی مالک ہے۔

عدالت نے یہ دعویٰ مسترد کرتے ہوئے کہا سونے اور رقم سے بھرے ڈبے کوئی گم شدہ خزانہ نہیں بلکہ اسے جان بوجھ کر چھپایا گیا تھا، اس لیے اس واقعے پر خزانے کی ملکیت کا قانون لاگو نہیں ہوتا اور وہ انعام کا بھی حق دار نہیں۔

واضح رہے کہ جرمن قانون کے مطابق اگر کسی شخص کو کوئی گم شدہ خزانہ ملتا ہے تو وہ اس کا نصف اپنے پاس رکھ سکتا ہے۔