Tag: خواتین کا عالمی دن

کراچی: ملک بھر میں خواتین کاعالمی دن آج منایاجارہاہے، پاکستان میں ایک سال کے دوران خواتین پرتشدد کےچھ ہزار کیسزرپورٹ ہوئے۔

 خواتین کی معاشرے میں اہمیت اجاگر کرنے کیلئے جہاں دنیا بھر میں عالمی دن منایا جاتاہے،تو وہیں خواتین نے ثابت بھی کیا ہے کہ ان کی شمولیت کے بغیر کوئی بھی معاشرہ ترقی کی راہ پر گامزن نہیں ہوسکتا۔

خواتین کے حقوق کا عالمی دن منانے کا مقصد ان بہادر خواتین کو خراج تحسین پیش کرنا ہے جنہوں نے اپنے حقوق کے حصول کی جنگ لڑی، اس دن دنیا بھر میں مختلف ممالک کی ہزاروں تنظیمیں خواتین کی سماجی، سیاسی اور اقتصادی ترقی کیلئے کوششوں کو اجاگر کرنے کیلئے واکس اور تقاریب کا اہتمام کریں گی۔

پاکستان میں بھی اس حوالے سے تقاریب منقد کی جائیں گی، سول سوسائٹی کی تنظمیں خواتین کو درپیش مسائل اور چیلنجوں کو اجاگر کرنے کیلئے واکس، سیمینارز اور مباحثوں کا بھی اہتمام کریں گی۔

خواتین کے عالمی دن پر ملک بھر میں تقاریب ہوتی ہیں لیکن دیہات میں حوا کی بیٹیاں آج بھی ظلم کی شکار ہیں، گذشتہ برس خواتین پر تشدد کے چھ ہزار سے زائد واقعات ہوئے۔

خواتین کے عالمی دن کے موقع پرگورنر سندھ ڈاکٹر عشرت العباد خان نے کہا ہے کہ حکومت خواتین کی بھرپور حمایت و معاونت جاری رکھے ہوئے ہے تاکہ وہ ملکی ترقی کیلئے زیادہ سے زیادہ اپنا کردار ادا کرسکے کسی بھی ترقی یافتہ ملک میں خواتین کا کلیدی کردار ہوتا ہے وہ نہ صرف اپنے خاندان کو سپورٹ کررہی ہوتی ہیں بلکہ کمیونٹی ڈیویلپمنٹ میں بھی ان کا کردار اہم ہوتا ہے۔

خواتین کے عالمی دن کے موقع پرمتحدہ قومی موومنٹ کے قائد الطاف حسین نے کہا ہے کہ ہم ملک میں خواتین کیلئے زندگی کے ہرشعبہ میں مساوی حقوق چاہتے ہیں اوران کے ساتھ کئے جانے والے ہرقسم کے امتیازکاخاتمہ چاہتے ہیں۔