کراچی : ماہر نفسیات ڈاکٹر نوشابہ نے خواتین سے ہراسگی کے بڑھتے ہوئے واقعات پر کہا کہ ایک کوے کو لٹکائیں گے تودوسرے کوے باز آئیں گے۔
تفصیلات کے مطابق کراچی کےمختلف علاقوں میں راہ چلتی خواتین سے ہراسگی کے واقعات بڑھ گئے، چہرہ واضح نظرآنے کے باوجود بھی ملزمان آزاد ہیں۔
ماہر نفسیات ڈاکٹر نوشابہ نے خواتین سے ہراسگی کے بڑھتے ہوئے واقعات پر کہا کہ ایک کوے کو لٹکائیں گے تودوسرے کوے باز آئیں گے۔
ڈاکٹر نوشابہ کا کہنا تھا کہ خواتین کو ہراساں کرنے والے اوباشوں کوسزا دینی ہوگی، والدین بچیوں کی شکایات کو غور سے سنیں اور ان کواعتماد دیں۔
ماہر نفسیات نے روز دیا کہ لڑکیاں بھی ہمت دکھائیں اوراوباشوں کے کرتوت سامنے لائیں۔
خیال رہے کراچی میں ہراسگی کا ناسور تیزی سے پھیلتا جارہا ہے، سمن آباد میں گلی میں چلتی خاتون اوباش موٹر سائیکل سوار کا نشانہ بنی۔
ڈارھی ٹوپی والے شخص نے پردے دار خاتون سےغیراخلاقی حرکت کی تاہم خاتون کو ہراساں کرنے میں ملوث شخص کو پولیس تلاش کر رہی ہے۔
پولیس کےمطابق متاثرہ خاتون کون ہے اس بات کا بھی تعین نہیں ہوسکا ہے اور کسی متاثرہ خاتون نے پولیس سے رابطہ بھی نہیں کیا۔
حکام کا کہنا تھا کہ اطراف کےعلاقوں میں دیگر سی سی ٹی وی کیمروں کی وڈیو حاصل کررہے ہیں۔۔ اہل محلہ سے بھی معلومات حاصل کی ہیں، اب تک واقعہ کا کوئی بھی عینی شاہد سامنے نہیں آیا ہے۔
اس سے قبل بھی گلستان جوہر میں بھی ایک ماہ پہلے خاتون سے نازیبا حرکت کرنے والا ملزم اب تک پکڑا نہیں جاسکا ہے، واقعہ پر وزیراعلیٰ سندھ کے نوٹس کے باوجود ضلع شرقی کی پولیس کارکردگی نہ دکھا سکی۔
وزیراعلیٰ سندھ کے نوٹس کے بعد گلشن پولیس نے تین مشکوک افراد کوحراست میں لیا، تفتیش کے بعد چھوڑ دیا۔
