اسلام آباد: وفاقی دار الحکومت کی پولیس نے ایک خواجہ سرا کو ڈرائیونگ لائسنس جاری کر دیا، یہ اپنی نوعیت کا اسلام آباد میں پہلا ڈرائیونگ لائسنس ہے۔

تفصیلات کے مطابق اسلام آباد پولیس نے پہلی خواجہ سرا کو ڈرائیونگ لائسنس جاری کر دیا، علی لیلیٰ ٹرانس جینڈر کمیونٹی کی رہنما ہیں۔

علی لیلیٰ نے پندرہ سال پہلے ڈرائیونگ شروع کی، جب کہ انھیں اسلام آباد پولیس کی جانب سے ابھی ڈرائیونگ لائسنس ملا۔ ان کا کہنا ہے کہ 2000 میں ان کے والد نے ڈرائیونگ سکھائی تھی۔

علی لیلیٰ راولپنڈی میں آواز شی میل فاؤنڈیشن کی صدر بھی ہیں، وہ ڈرائیونگ سیکھنے کے بعد سے جڑواں شہروں میں بغیر لائسنس کے پندرہ سال تک گاڑی چلاتی رہی ہیں۔

یہ بھی دیکھیں:  پاکستان میں پہلی بار خواجہ سراؤں کے لیے ڈرائیونگ لائسنس کا اجرا

علی لیلیٰ کو ڈرائیونگ لائسنس کے لیے درکار تمام ٹیسٹ پاس کرنے کے بعد لائسنس جاری کیا گیا، انھوں نے کہا کہ آج میں بہت خوش ہوں، اب میری کمیونٹی کے دوسرے ممبرز کو بھی لائسنس مل سکے گا۔

خیال رہے کہ سپریم کورٹ آف پاکستان کے احکامات کے بعد علی لیلیٰ کو صنفی نشان ایکس والا قومی شناختی کارڈ بھی جاری کیا جا چکا ہے۔

مارچ کے شروع میں خیبر پختونخوا پولیس کی جانب سے 30 ٹرانس جینڈر پرسنز کو ڈرائیونگ لائسنس جاری کیے جا چکے ہیں۔

اسلام آباد: پاکستان میں رواں ماہ ہونے والے عام انتخابات میں خواجہ سراؤں کو نمائندگی دینے کے لیے ایک غیر سرکاری تنظیم کی جانب سے انہیں انتخابات کی نگرانی کرنے کا موقع فراہم کیا گیا ہے۔

برطانوی خبر رساں ادارے کی رپورٹ کے مطابق یہ اقدام پاکستان میں انتخابات کو مانیٹر کرنے والی غیر سرکاری تنظیم ٹرسٹ فار ڈیموکریٹک ایجوکیشن اینڈ اکاؤنٹیبلیٹی (ٹی ڈی ای اے) کی جانب سے کیا گیا ہے۔

پراجیکٹ منیجر زاہد عبداللہ کا کہنا ہے کہ اس مقصد کے لیے کل 375 ممبران الیکشن ڈے کے حوالے سے تمام تر انتخابی عمل کا جائزہ لیں گے جن میں 125 خواجہ سرا، 125 جسمانی طور پر معذور افراد اور 125 خواتین شامل ہیں۔

انہوں نے بتایا کہ کراچی، لاہور، اسلام آباد، پشاور اور کوئٹہ سے 25، 25 ممبران یہ کام سر انجام دیں گے، ان ممبران کو الیکشن ڈے پر آبزرویشن کرنے کی تربیت ٹی ڈی ای اے کی جانب سے فراہم کی جارہی ہے۔

زاہد عبداللہ کے مطابق ایسا پہلی بار ہورہا ہے کہ معذور افراد، خواجہ سرا اور خواتین انتخابات کی نگرانی کریں گے، ان ممبران کو الیکشن کمیشن کی جانب سے کارڈز فراہم کیے جائیں گے تاکہ یہ افراد بذات خود ہر پولنگ اسٹیشن پر جاکر جائزہ لے سکیں۔

یہ ممبران ووٹنگ کے روز صبح آٹھ بجے پولنگ اسٹیشن جائیں گے اور وہاں موجود پریزائیڈنگ افسران کا انٹرویو کریں گے، اس کے علاوہ وہاں خواجہ سراؤں، خواتین اور جسمانی طور پر معذور افراد کے لیے موجودہ سہولیات کا جائزہ بھی لیا جائے گا۔

بعدازاں تمام ممبران معلومات سے اپنے ادارے کو آگاہ کریں گے جو اس حوالے سے الیکشن کمیشن کو بتائے گا۔

بندیا رانا جو کہ خود ایک خواجہ سرا ہیں انہوں نے خوشی کا اظہار کرتے ہوئے کہا ہے کہ ایسا پہلی بار ہورہا ہے کہ خواجہ سرا اور معذور افراد جنہوں نے سرے سے اہمیت ہی نہیں دی جاتی وہ الیکشن کی مانیٹرنگ کریں گے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔